سەبەبى بۇل كەزەڭدە جامبىل جاباەۆ ەسىمى بۇكىل كەڭەس وداعىنا دۇركىرەي تانىلعان بولاتىن. دەسە دە اقىن ءومىرىنىڭ كەيبىر تۇستارى ءالى كۇنگە دەيىن بەيمالىمدەۋ بولىپ كەلگەنى جانە راس. مىنە, جاڭا تۋىندى ءدال وسى ولقىلىقتاردىڭ ورنىن تولتىرۋعا كۇش سالىپتى. سونىڭ ءبىر مىسالى, جامبىل جاباەۆ توقسانعا كەلگەندە قازاقستان ونەرپازدارىنىڭ ەكىنشى سلەتىنە قاتىسىپ, اقىندار اراسىندا باس جۇلدە الادى. ونىڭ سۇرانشى باتىر تۋرالى داستانىن قالماقان ابدىقادىروۆ قولما-قول جازىپ الىپ, گازەتكە باسادى. وسى وقيعادان سوڭ كەڭەس يدەولوگتەرى جامبىلدىڭ ابىرويى مەن تانىمالدىلىعىن پايدالانۋعا كىرىسەدى. جامبىل تۇلعاسىمەن تولىقتاي اينالىسا باستايدى. ونىڭ كوپتەگەن ولەڭىن كەڭەس ساياساتىنا تەلىپ بۇرمالايدى. الايدا جامبىل بۇعان دەيىن دە قازاق اراسىندا زور ابىروي مەن كەڭ تانىمالدىلىققا يە بولاتىن. ول ءوزىنىڭ ولەڭدەرىن بۇرمالاۋشىلارمەن كەلىسىمگە كەلگىسى جوق ەدى. بىراق كەڭەس بيلىگى قولداعى بار تەتىكتەردى پايدالانا وتىرىپ, ونىڭ اساۋ باسىن نوقتاعا سىيدىرۋعا تىرىسادى. فيلم جەلىسى سۋىرىپسالما اقىننىڭ ءومىرىنىڭ وسى تۇسىنا كوبىرەك ءمان بەرەدى. سونىمەن قاتار تۋىندى اۆتورلارى ارحيۆتەن تابىلعان تىڭ دەرەكتەرگە دە سۇيەنگەن. اراسىندا 1936 جىلى اقىن ونەرىن ناسيحاتتاۋعا اتسالىسقان ماسكەۋلىك مامان يوسيف گيلماننىڭ نەمەرەسىندە ساقتالعان قۇندى دايەكتەر بار.
تاريحي بايوپيك مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن. ستسەناريست ءارى قويۋشى-رەجيسسەر – جاندوس قۇسايىنوۆ. ونىڭ ايتۋىنشا, تۋىندىعا كىرىسپەس بۇرىن ارحيۆتەر اقتارىلعان. ول ءۇشىن ءتىپتى ماسكەۋدەگى مۇراعاتتار زەرتتەلگەن. سەبەبى كارتينانى باستاعان بويدا بار جاۋاپكەرشىلىك تە, ماقسات تا – ءومىر جولى قايشىلىققا تولى تۇلعانىڭ بولمىسىن بارىنشا اشۋ بولعان.
«جامبىل اتامىز تۋرالى كوپتەگەن كىتاپ جازىلعان, فيلم تۇسىرىلگەن. بىراق ول كەزدەگى شىعارمالاردىڭ كوپشىلىگى ۇلتتىق قاجەتتىلىگىمىزدى نەمەسە تاريحي شىندىقتان گورى سول كەزدەگى جۇيەنىڭ قاجەتتىلىگىن قاناعاتتاندىرۋدان ءارى اسا المادى عوي. سوندىقتان قازىرگى جاستار سول كەزدەگى الەۋمەتتىك جاعدايدى ءبىلۋ ءۇشىن ءھام كەيبىر تاريحي ماسەلەلەرگە, تۇلعالارعا ءادىل باعا بەرۋ ءۇشىن وسىنداي فيلمدەردى كورۋى كەرەك دەپ ەسەپتەيمىن», دەپ اتاپ ءوتتى جاندوس قۇسايىنوۆ.
فيلم رەجيسسەرىنىڭ سوزىنشە, جامبىل جاباەۆ ەسىمىنە بايلانىستى ايتىلاتىن, شىندىققا سايكەس كەلە بەرمەيتىن نەشە ءتۇرلى اڭىز-وقيعالار, اڭگىمەلەر كوبەيىپ كەتكەنىنە قىنجىلىس ايتۋلى كارتينانىڭ ومىرگە كەلۋىنە بىردەن-ءبىر سەبەپ بولعان ەكەن.
«مەن ۇلى اقىننىڭ شىنايى وبرازىن حالىققا كورسەتكىم كەلدى. سول داۋىرگە تەرەڭ بويلاي وتىرىپ, ناقتى ءارى شىنايى فاكتىلەرگە قول جەتكىزۋ ءۇشىن تاريحي-مۇراعاتتىق قۇجاتتاردى اقتارىپ, اقىن تۋرالى جازىلعان بىرنەشە تاۋىندىنى وقىپ شىقتىم. ناتيجەسىندە, دەرەكتى فيلممەن شەكتەلمەي, تولىقكولەمدى تاريحي-كوركەم تۋىندى تۇسىرۋگە بەكىندىم. فيلمدە جامبىلدىڭ ومىرىنە ۇلكەن اسەر ەتكەن وقيعالار باياندالادى. اتاپ ايتساق, اقىندار سلەتى, اقىن ولەڭدەرىنىڭ گازەتتەر مەن جۋرنالداردا باسىلا باستاۋى, وراز جاندوسوۆ, باۋىرجان مومىش ۇلى, ساكەن سەيفۋللين سىندى قازاقتىڭ اتاقتى قوعام قايراتكەرلەرىمەن كەزدەسۋى جانە تاعى دا باسقا تاريحي دەرەكتەر نەگىزگە الىندى», دەيدى رەجيسسەر. فيلمدە باستى ءرولدى قازاقستاننىڭ حالىق ءارتىسى دوسجان جانبوتاەۆ, جامبىلدىڭ جاستىق شاعىن استانا قالاسى جاستار تەاترىنىڭ تالانتتى اكتەرى اسىلبەك ءايتىش سومدادى. سونىمەن قاتار الماس شاياحمەتوۆ, سىرىم قاشقاباەۆ, اننا ستارچەنكو, اسان ءماجيت, ەرىك جولجاقسىنوۆ, فارحاد ماحمۋدوۆ, فيليپپ ۆولوشين سياقتى تانىمال اكتەرلەر ونەرى دە جاڭا تۋىندىنىڭ كوركەمدىك ءھام مازمۇندىق ساپاسىنا ءساتتى قىزمەت ەتكەن.
«جامبىل. جاڭا ءداۋىر» ءفيلمىن ەلىمىزدىڭ كينوتەاترلارىنان 6 ماۋسىمنان باستاپ تاماشالاۋعا بولادى.
