فوتو: gov.kz
وبلىستىق پوليتسيا دەپارتامەنتىنىڭ ءباسپاسوز قىزمەتى تاراتقان دەرەككە جۇگىنسەك, ون كۇن ىشىندە پوليتسيا قىزمەتكەرلەرى تاراپىنان ىزدەستىرىلىپ جۇرگەن 6 قىلمىسكەر قولعا تۇسكەن. سونداي-اق تىيىم سالىنعان زاتتاردى زاڭسىز ساقتاعان, وزىمەن بىرگە الىپ جۇرگەن 16 ادام قۇرىقتالسا, 14 ميگرانت ۇستالعان. جالپى سانى 84 قىلمىس اشىلعان.
«ون كۇنگە سوزىلعان «قۇقىقتىق ءتارتىپ» جەدەل-پروفيلاكتيكالىق ءىس-شاراسى بارىسىندا زاڭدى وكىلسىز ويىن-ساۋىق ورىندارىندا جانە ۇيىنەن تىس جەردە بولعان 955 كامەلەتكە تولماعان ءجاسوسپىرىم انىقتالدى. سونداي-اق ماس كۇيىندە كولىك تىزگىندەگەن جۇرگىزۋشىلەر دە كەزدەستى. ءىس-شارا اياسىندا 10 ازامات كولىك جۇرگىزۋ قۇقىعىنان ايىرىلدى», دەلىنگەن وبلىستىق پوليتسيا دەپارتامەنتى تاراتقان مالىمەتتە.
دەرەككە جۇگىنسەك, «قۇقىقتىق ءتارتىپ» ءىس-شاراسى كەزىندە جالپى سانى 10 313 اكىمشىلىك قۇقىق بۇزۋشىلىق انىقتالىپتى. ناقتىراق ايتار بولساق, ۇساق بۇزاقىلىقتىڭ 592 دەرەگى تىركەلسە, تىركەۋسىز نەمەسە قۇجاتسىز جۇرگەن 2 298 ازامات جاۋاپكەرشىلىككە تارتىلعان.
ء«ىس-شارا كەزىندە وتباسىلىق-تۇرمىستىق قاتىناستار سالاسىنداعى قۇقىققا قايشى ارەكەتكە بارعانى ءۇشىن 289 ازامات جاۋاپقا تارتىلدى. سونداي-اق 1 220 كولىك جۇرگىزۋشىسى بەلگىلەنگەن قوزعالىس جىلدامدىعى شەگىنەن اسىرا كولىك جۇرگىزگەنى ءۇشىن جازالانسا, 3 349 تۇرعىن جاياۋ جۇرگىنشى جولاعى جوق جەردە ەرەجە بۇزىپ وتكەنى ءۇشىن اكىمشىلىك جاۋاپكەرشىلىككە تارتىلدى. جالپى العاندا, ءوڭىر بويىنشا 286 اۆتوكولىك ايىپتۇراققا قويىلدى», دەيدى وبلىستىق پوليتسيا دەپارتامەنتى ءباسپاسوز قىزمەتىنىڭ وكىلدەرى.
جامبىل وبلىسى
