سۋرەتتى تۇسىرگەن – ەرلان ومار, «EQ»
وتكەن جىلى وڭىردە شومىلۋ ماۋسىمى كەزىندە بەس تۇرعىن باقيلىق بولدى. وكىنىشكە قاراي, مەرت بولعانداردىڭ ىشىندە ءۇش ءجاسوسپىرىم بار. ءۇش ءۇيدىڭ ءۇمىتى ەرتە ءسوندى.
بىلتىر جاسوركەن اۋىلىندا بولعان قايعىلى جاعداي تالاي جانعا اۋىر ءتيدى. جەتى جاسار نەمەرەسىن قۇتقارماق بولعان الپىستان اسقان قاريا دا تاۋ سۋىنىڭ ەكپىنىنە شىداس بەرمەي ومىرمەن قوش ايتىسقان ەدى...
بيىلعى شومىلۋ ماۋسىمىنا دايىندىق جۇمىستارى ويداعىداي جۇرگىزىلدى مە؟ توتەنشە جاعدايلار دەپارتامەنتى جۇمىستى جۇيەلەپ ۇلگەردى مە؟ سۋ ايدىندارى ماڭىنداعى جاعداي قالاي؟ ماماندار كەز كەلگەن جاعدايعا ساقاداي ساي دايىن با؟
رەسمي دەرەككە جۇگىنسەك, وڭىردە گيدروگرافيالىق ساناتقا ەنگەن جۇزدەن استام وزەن مەن 112 توعان ورنالاسقان. شومىلۋ ماۋسىمى كەزىندە وسى وزەندەر مەن توعاندارعا باراتىندار از ەمەس. شىلىڭگىر شىلدەدە كەيبىر تۇرعىندار ەسكەرتۋ جازبالارعا دا قاراي بەرمەيدى... كىسى شىعىنى بولماۋى ءۇشىن جان-جاقتى ازىرلىك كەرەك ەكەنى ايتپاسا دا تۇسىنىكتى.
«سۋ ايدىندارىنداعى پروفيلاكتيكالىق ءىس-شارالارعا تۇراقتى تۇردە تارتىلاتىن وبلىس اۋماعىنداعى ۆولونتەرلىك ۇيىمداردىڭ باسشىلارى مەن ۇيلەستىرۋشىلەرى ساناتىنداعى ازاماتتار وبلىستىق توتەنشە جاعدايلار دەپارتامەنتىندە دايارلىق كۋرسىنان ءوتتى. كۋرسقا جالپى سانى 59 ادام تارتىلعانىن ايتا كەتكەن ءجون. ولارعا ماماندار وزدەرى بىلەتىن دۇنيەنى تولىقتاي ۇيرەتتى.
وڭىردەگى سۋ ايدىندارىنىڭ قاۋىپتى ۋچاسكەلەرىندە كىسى شىعىنى ورىن الۋ دەرەكتەرى, ولاردىڭ سەبەپتەرى جانە وقيعاعا ىقپال ەتكەن ءمان-جايلار كورسەتىلگەن 360 ەسكەرتۋ بەلگىلەرىنە جانە 8 كورنەكى ستەندكە تۇگەندەۋ جۇمىستارى جۇرگىزىلدى. باق جانە الەۋمەتتىك جەلىلەر ارقىلى نەگىزگى قاۋىپسىزدىك شارالارىنىڭ تالاپتارى تۇراقتى تۇردە تۇرعىندار نازارىنا ۇسىنىلىپ جاتىر.
شومىلۋ ماۋسىمى باستالعانعا دەيىن جاعاجايلاردىڭ تومەنگى قاباتىن تەكسەرۋ, ارنايى قالتقىلار مەن ەسكەرتۋ بەلگىلەرى, ۇگىت-ناسيحات ستەندتەرىن قويۋ جۇمىستارى جۇرگىزىلەتىن بولادى», دەيدى وبلىستىق توتەنشە جاعدايلار دەپارتامەنتىنىڭ باسشىسى ارمان توقانوۆ.
ا.توقانوۆتىڭ ايتۋىنشا, قازىرگى كەزگە دەيىن ءۇش جاعاجايدىڭ ءتۇبىن تەكسەرۋ جۇمىسى تالاپقا ساي جۇرگىزىلگەن ەكەن. ال وڭىردەگى سۋ ايدىندارىنىڭ 16-سىندا شومىلۋعا رۇقسات بەرىلىپتى. سونداي-اق وبلىستىق ءماسليحاتتىڭ 2019 جىلعى شەشىمىنە سايكەس ششومىلۋعا تىيىم سالىناتىن ورىندار ءتىزىمى انىقتالعان.
شىنى كەرەك, شومىلۋ ماۋسىمى كەزەڭىن ادام شىعىنىنسىز وتكىزۋ سوڭعى جىلدارى مۇڭعا اينالىپ تۇر. ارينە, وتكىر ماسەلەگە كەلگەندە جەرگىلىكتى تۇرعىنداردىڭ وزدەرى دە قاتەلىككە بوي الدىرىپ جاتاتىنى انىق. بالالاردىڭ قاراۋسىز قالۋى سالدارىنان ورىن العان قايعىلى وقيعالار دا از ەمەس. ايتكەنمەن, قۇزىرلى ورگاندار شومىلۋ ماۋسىمى كەزىندە تۇرعىندارعا قاۋىپسىزدىك شارالارىن تولىققاندى تۇسىندەرگەننەن ەشكىمنىڭ ۇتىلمايتىنى ءسوزسىز.
«ەلدى مەكەندەردە تۇرعىن ۇيلەرگە جاقىن ماڭدا اعاتىن سۋارمالى ارنالاردىڭ قاۋىپتى ۋچاسكەلەرىنىڭ جيەگىن قورشاعان ءجون. تۇرعىندارعا قولجەتىمدى شومىلاتىن ورىنداردى جاعاجاي رەتىندە قالىپتاستىرۋ ماسەلەسىن پىسىقتاپ, ولاردىڭ سانىن ارتتىرۋعا نازار اۋدارۋىمىز كەرەك.
بۇدان بولەك, شومىلۋعا قاۋىپتى ورىندارعا پوليتسيا قىزمەتكەرلەرى مەن ۆولونتەرلەردى تارتا وتىرىپ, كۇندەلىكتى نەگىزدە پروفيلاكتيكالىق-رەيدتىك ءىس-شارالاردى جۇرگىزۋ جۇمىستارىن مىقتاپ قولعا العان ءلازىم. سوندا عانا ءبىز كىسى شىعىنىن بولدىرماۋعا قولدان كەلگەنشە ىقپال ەتەمىز», دەيدى دەپارتامەنت باسشىسى.
قالاي دەسەك تە سۋعا شومىلۋ ماۋسىمىندا تەك جامبىل وبلىسىندا عانا ەمەس, باسقا وڭىرلەردە دە قايعىلى وقيعالار ءجيى تىركەلىپ جاتادى. وتكەن جىلى بەس ادامنىڭ ومىرمەن قوش ايتىسقانى كىمدى دە بولسا ويلاندىرسا كەرەك. وسى جىلى جامبىلدىق شەندىلەر شومىلۋ ماۋسىمىن تراگەدياسىز وتكىزە الا ما؟ كىم ءبىلسىن... بەلگىلىسى, ازىرگە جاۋاپتى مەكەمەلەر دايىندىق جۇمىستارىنا مىقتاپ كىرىسىپ كەتتى.
جامبىل وبلىسى
