جۋىردا تۇركيا مەملەكەتىنىڭ ىستانبۇل قالاسىندا حالىقارالىق «Ipek Yolu» بالالار جانە جاس تالانتتار ونەر فەستيۆالى ءوتتى. ونەر دوداسىنا قاتىسقان تولە بي اۋدانى لەڭگىر قالاسىنداعى №5 مەكتەپ-گيمنازيا وقۋشىسى مەيىرحان راحىم جوعارى دارەجەدە ونەر كورسەتكەنى ءۇشىن گران-پري يەگەرى اتاندى. حالىقارالىق بايقاۋعا الەمنىڭ بارلىق مەملەكەتىنەن تالانتتى جاستار قاتىسىپ, باق سىنادى. ساراپشىلار كىشكەنتاي ونەرپازدىڭ ساحنادا ءوزىن-ءوزى ۇستاۋىنا, داۋىس ىرعاعىنا, سەزىمتالدىعىنا جوعارى باعا بەرگەن. ۇستازى, مۋزىكا ءپانىنىڭ مۇعالىمى تاتيانا ماتۆەەۆانىڭ قولداۋىمەن, اۋەزدى داۋسىمەن ونەرىن شىڭداي بىلگەن جاس تالانت يەسى باس جۇلدەنى جەڭىپ الدى. ديماش قۇدايبەرگەننىڭ اندەرىن تىڭداپ وسكەن مەيىرحان تۋما تالانت يەسى. وسى كەزگە دەيىن اۋداندىق, وبلىستىق, رەسپۋبليكالىق دەڭگەيدەگى بايقاۋلارعا قاتىسىپ, ونەرىمەن ورگە شىقتى. رەسپۋبليكالىق بالالار شىعارماشىلىق «Bala Fest» فەستيۆالىندە باس جۇلدە يەلەنسە, ال «Zhibek zholy Kazakhstan» بايقاۋىنىڭ گران-پري يەگەرى اتاندى. وسى بايقاۋ ناتيجەسىمەن تۇركياعا ارنايى جولداما ۇتىپ الىپ, تالانتىمەن الەمدىك دەڭگەيگە كوتەرىلدى.
ەل تۋىن تۇركيادا جەلبىرەتكەن تاعى ءبىر دارىن يەسى – سايرام اۋدانىنداعى م.ورازاليەۆ اتىنداعى №41 مەكتەبىنىڭ 9-سىنىپ وقۋشىسى كاۋسار نۇرلانقىزى كوكتەمدە جاس سۋرەتشىلەردىڭ « ۇلى دالا ۇرپاعى» رەسپۋبليكالىق بايقاۋىنا قاتىسقان بولاتىن. بايقاۋ بارىسىندا «بەينەلەۋ ونەرى» اتالىمىمەن ماراپاتتالىپ, استانادا وتكەن «اتادان مۇرا» قورىنىڭ رەسپۋبليكالىق بايقاۋلارىنىڭ سۋپەرفينالىنا, ودان كەيىن تۇركيا ەلىندەگى حالىقارالىق بايقاۋعا جولداما جەڭىپ العان ەدى. مىنە, ەندى كاۋساردىڭ جارىس جولى تۇركيا مەملەكەتىنىڭ ىستانبۇل قالاسىندا جالعاستى. الەمنىڭ كۇللى ەلىنەن قاتىسقان قىلقالام شەبەرلەرى سايىسىندا ونىڭ سالعان سۋرەتى ۇزدىك سانالدى. ناتيجەسىندە, «دارىندى جۇلدىزدار» بالالار مەن جاسوسپىرىمدەر ورتالىعىنىڭ ۇيىمداستىرۋىمەن وتكەن «Ipek yolu» حالىقارالىق بالالار فەستيۆالىندە باس جۇلدەنى جەڭىپ الدى. ەلىمىزدىڭ تۋىن الەمدىك دەڭگەيدە بيىككە كوتەرىپ, ءانۇرانىن شىرقاتىپ جۇرگەن جاستار قانشاما. شەتەلدەرگە جارىسقا نەمەسە بايقاۋعا اتتاناتىنداردىڭ بارلىعى ەل رامىزدەرىنىڭ ءمان-ماعىناسى, سيپاتى مەن تاريحىن جاتقا بىلەتىنى انىق.
جاتقا بىلەدى دەمەكشى, دۇنيەجۇزى مەملەكەتتەرىنىڭ اتاۋلارى مەن جالاۋلارىن جاڭىلماي تانيتىن وقۋشى بار. تۇركىستان وبلىسىندا. بويىنداعى دارىنىمەن ەرەكشەلەنگەن وقۋشىنى ۇستازدارى دا ماقتان تۇتادى. ءار ەلدىڭ اتاۋى كوبىنە سول ەلدى قۇرايتىن ۇلتقا بايلانىستى قويىلادى. ماقتاارال اۋدانىنا قاراستى نۇرلىباەۆ اۋىلدىق وكرۋگى №26 ى.التىنسارين مەكتەبىنىڭ 6-سىنىپ وقۋشىسى باعلان ابدىعاپپار اتاۋلاردىڭ شىعۋ تاريحى مەن ماعىناسىن بىلۋگە قىزىعىپتى. ۇستازدارىنىڭ ايتۋىنشا, شەت مەملەكەتتەردىڭ استاناسى مەن اتاۋلارىن جاتتاۋعا 9-10 جاسىنان باستاپ قىزىعۋشىلىق تانىتقان. سودان بەرى دۇنيەجۇزىنىڭ كارتاسىنان ءوزى ىزدەنە وتىرىپ, 207 مەملەكەتتى جاتتاعان. باعلاننىڭ دارىنىن العاش بايقاعان – اتاسى ابدىعاپپار. نەمەرەسىنىڭ بويىنداعى ەرەكشەلىكتى دامىتۋ ءۇشىن ول باعلاننىڭ سوڭىنان ەرگەن ءىنى-قارىنداستارىنا دا مەملەكەتتەردىڭ اتاۋلارى مەن استانالارىن ورنالاسقان جەرى بويىنشا ۇيرەتۋدى ادەتىنە اينالدىرعان. ءاردايىم نەمەرەسىنىڭ ىنتا-ىقىلاسىن دامىتىپ وتىرۋدى قولعا العان ابدىعاپپار اقساقال باعلاننىڭ بۇل ەرەكشەلىگىن ودان ءارى دامىتىپ, كوپكە ۇلگى بولسا دەگەن نيەتتە.
تۇركىستان وبلىسى
