جەرگىلىكتى تۇرعىن نۇرجان وماروۆ جەتەكشىلىك ەتەتىن كاسىپورىندا وندىرىلەتىن زاتتار شارۋالار اراسىندا سۇرانىسقا يە بولىپ وتىر. سونىمەن قاتار, بىلتىر تامشىلاتىپ سۋعارۋعا ارنالعان زاتتار ءوندىرىسى دە قولعا الىنعان. بۇل جوبا كاسىپكەرلەردىڭ قىتاي مەملەكەتىنە ساپارى ناتيجەسىندە جۇزەگە اسقان. تامشىلاتىپ سۋارۋ تەحنولوگياسىن شىعاراتىن كاسىپورىننىڭ جوبالىق قۋاتى – ساعاتىنا 12 مىڭ مەتر. جالپى قۇنى – 100 ملن تەڭگە. كاسىپورىندى جەكە كاسىپكەر ءوز قاراجاتى ەسەبىنەن اشقان. جيىرما ادامدى تۇراقتى جۇمىسپەن قامتىپ وتىرعان تسەحتا جۇمىسشىلاردىڭ ورتاشا جالاقىسى – 200 مىڭ تەڭگە.
ايتا كەتەيىك, تسەحتا جارامسىز پوليەتيلەن پلەنكالارى, پلاستماسسالار قايتا وڭدەلەدى. وتكەن جىلدىڭ قورىتىندىسىمەن جالپى كەلەس اۋدانى بويىنشا 3 900 توننا قوقىس جيناقتالىپ, ونىڭ 741 تونناسى, ياعني 19%-ى قايتا وڭدەۋگە باعىتتالدى.
وڭىردە اۋىل شارۋاشىلىعىن دامىتۋعا, ءونىمدى تەرەڭ وڭدەۋگە, جەرگىلىكتى تۇرعىنداردى جۇمىسپەن قامتۋعا باعىتتالعان كاسىپورىندار كوپ. ولاردىڭ قاتارىن كوبەيتە ءتۇسۋ ماقساتىندا قولعا الىنعان ماڭىزدى ينۆەستيتسيالىق جوبالاردىڭ ينفراقۇرىلىمىنا اكىمدىك تاراپىنان تۇراقتى قولداۋ كورسەتىلىپ جاتىر. مىسالى, سوزاق اۋدانىنداعى كۇكىرت قىشقىلىن ءوندىرۋ زاۋىتى جانە 2 كەزەڭنەن تۇراتىن ۋراندى قايتا وڭدەۋ كەشەنىنىڭ قۇرىلىسى اياقتالعان سوڭ 700-دەي جۇمىس ورنى اشىلادى. شاردارا اۋدانىندا جۇگەرى داندەرىن تەرەڭ وڭدەۋ زاۋىتىن «كازكراحمال» جشس ىسكە اسىرىپ جاتىر. جەرگىلىكتى بيۋدجەتتەن سىرتقى ينفراقۇرىلىمدى جۇرگىزۋگە 200 ملن تەڭگە ءبولىندى. جوبا تولىق ىسكە قوسىلسا, 500 جۇمىس ورنى اشىلماق. «Beibars-Bottlers» جشس تۇلكىباس اۋدانىندا اۋىزسۋ جانە ءتۇرلى ءتۇستى سۋسىن ءوندىرۋ زاۋىتىن سالىپ جاتىر. مۇندا 96 ادام جۇمىسپەن قامتىلادى. تولەبي اۋدانىندا لوگيستيكالىق ورتالىق سالۋ جانە جۇك تاسىمالدارىن ۇيىمداستىرۋ جوباسىن «Monotrans» جشس جۇزەگە اسىرۋدا, ول جەردە 190 ادام جۇمىس ىستەيتىن بولادى. اۋداندا بيىل اشىلاتىن «Kazplast» جشس-نىڭ تىگىن فابريكاسى 150 ادامدى جۇمىسپەن قامتيدى. كەنتاۋ قالاسىندا ونەركاسىپكە ارنالعان مەتالل كونسترۋكتسيالارى, مەتالل بۇيىمدارىن شىعاراتىن زاۋىت قۇرىلىسى اياقتالعاندا 80 جۇمىس ورنى اشىلادى. تۇركىستان قالاسىنداعى «Turkistan» ارنايى ەكونوميكالىق اۋماعىندا پوليمەرلى قۇبىرلاردى, پلاستماسسادان جاسالعان بۇيىمداردى شىعاراتىن ءىرى-توراپتىق زاۋىت ىسكە قوسىلسا 80 جۇمىس ورنى قۇرىلادى.
ساۋران اۋدانىندا قاتتى تۇرمىستىق قالدىقتاردى قايتا وڭدەۋ وندىرىستىك كەشەنىنىڭ قۇرىلىسى اياقتالىپ, پايدالانۋعا بەرۋ اكتىسىن الۋ بويىنشا جۇمىس جۇرگىزىلىپ جاتىر. ارىس قالاسىندا تەمىرجول ۆاگوندارىن جوندەۋ جوباسىن ىسكە قوسۋ 2024 جىلدىڭ ەكىنشى جارتىجىلدىعىندا جوسپارلانعان. 50 جۇمىس ورنى قۇرىلادى. تۇلكىباس اۋدانىندا قۋاتتىلىعى جىلىنا 5 000 توننا جەمىس وڭدەۋ تسەحىن «تۇلكىباس جەمىس جيدەكتەرى» اوك ىسكە اسىرادى. سايرام اۋدانىندا ماقسارى مايىن شىعاراتىن زاۋىت, ەتتى قايتا وڭدەۋ, مال سويۋ تسەحى جانە بورداقىلاۋ الاڭى, ارنايى تەحنيكالاردى, شاناقتاردى قۇراستىرۋ زاۋىتى سالىنسا, قازىعۇرتتا تسەمەنت زاۋىتىنىڭ قۇرىلىسى ءجۇرىپ جاتىر.
تۇركىستان يندۋستريالدىق ايماعىندا ورنالاسقان وندىرىستىك عيماراتتار قۇرىلىسى اياقتالىپ, تولىقتاي ىسكە قوسىلدى. اتالعان وندىرىستىك عيماراتتاردا جيھاز جانە ش ۇلىق تسەحتارى جوبالارى جۇزەگە اسىرىلعان. ينۆەستيتسيالىق جوبالاردى ارتتىرۋ ماقساتىندا وبلىستا شاعىن جانە ورتا كاسىپكەرلىكتى دامىتۋعا باعىتتالعان وندىرىستىك پاركتىڭ قۇرىلىسى ءجۇرىپ جاتىر. جالپى, كولەمى 66 مىڭ مىڭ شارشى مەتر بولاتىن, 30 گەكتار جەردە ورنالاسقان ايماقتا 42 عيمارات ورنالاسادى. وندىرىستىك پاركتىڭ قۇنى – 13 ملرد تەڭگە. قوسىمشا 70 گەكتار جەر تەلىمى انىقتالىپ, ۇلعايتۋ جوسپارلانىپ وتىر.
«تۇركىستان» الەۋمەتتىك كاسىپكەرلىك كورپوراتسياسى باسقارما توراعاسى فايزۋللا بايدۋللاەۆتىڭ بايانداۋىنشا, جۇمسالعان بيۋدجەتتىك 1 تەڭگەگە 7 تەڭگە ينۆەستيتسيا تارتۋ كۇتىلىپ وتىر. قۇرىلىس 3 كەزەڭمەن جۇزەگە اسىرىلادى. ءبىرىنشى كەزەڭگە تارتىلاتىن ينۆەستيتسيا كولەمى – 31 ملرد تەڭگە. 500 جاڭا جۇمىس ورنى اشىلادى. وندىرىستىك پاركتەر اۋماعىندا اكىمشىلىك عيماراتىن سالۋ دا جوسپاردا بار. عيماراتتا پارك قاتىسۋشىلارى وندىرگەن ونىمدەرىنىڭ كورمە زالى ۇيىمداستىرىلادى. ءارتۇرلى كولەمدەگى وندىرىستىك كومپانيالاردى تارتۋ ارقىلى ولاردىڭ ءوزارا ارەكەتتەسۋى نەگىزىندە ۇيلەسىمدى وندىرىستىك ورتا قۇرۋ ماقساتىنداعى جوبا كەزەڭ-كەزەڭىمەن جۇزەگە اسىرىلادى.
وبلىس اكىمدىگىنىڭ مالىمەتىنە قاراعاندا, الدا تاعى 32 عيمارات سالىنادى. ءوندىرىس ايماعىنا تارتىلاتىن جەكە ينۆەستيتسيا كولەمى – 98 ملرد تەڭگە. وندىرىستىك پارك تولىعىمەن ىسكە قوسىلعان سوڭ 2 000-نان استام تۇراقتى جۇمىس ورنى اشىلماق. ونىڭ اۋماعىندا «BNK Group» جشس سۋ ۇنەمدەۋ تەحنولوگياسىن ەنگىزىپ, جاڭبىرلاتىپ سۋارۋ جانە تامشىلاتىپ سۋارۋ جۇيەلەرىن شىعاراتىن كاسىپورىن جۇمىسىن باستادى. سونداي-اق «Aqniet Holding» جشس مەكتەپكە ارنالعان جانە مەديتسينالىق جيھازدار شىعارىپ جاتىر. مۇندا ۋكراينالىق «UBC Group» كومپانياسى ونەركاسىپتىك توڭازىتقىش جاسايدى. مەديتسينالىق ونىمدەر, بولمەارالىق ەسىكتەر جانە تاعى باسقا ونىمدەردى شىعاراتىن كاسىپورىندار دا جۇمىسىن باستاعان.
سونداي-اق وندىرىستىك پاركتەردى اۋدانداردا سالۋ جوسپارلانعان. اتاپ ايتقاندا, ورداباسى اۋدانىنداعى بادام يندۋستريالدى ايماعىندا ينفراقۇرىلىم تارتىلعان 12 عيمارات سالىنباق. شۇبار اۋىلى ماڭىندا دا سالۋ جوسپاردا بار. سايرام اۋدانىنداعى وندىرىستىك پارك كولەمى 90 گەكتاردان اسادى.
تۇركىستان وبلىسى
