بۇگىندە بۇل – اقتوبە وبلىسىنىڭ اگراريلەرى ءۇشىن ءداندى, جارما, مايلى, جەمشوپ داقىلدارىنىڭ ەليتالىق جانە بىرەگەي تۇقىمدارىن وندىرۋگە رۇقساتى بار ايماقتاعى جالعىز اگرارلىق بەيىندەگى عىلىمي زەرتتەۋ مەكەمەسى. اقتوبە سەلەكتسياسىنىڭ سۇرىپتارى قازاقستاننىڭ باسقا وبلىستارىندا جانە رەسەيدىڭ شەكارالاس ايماقتارىندا دا قولدانىلادى.
ء«وڭىر مال ازىعىن دايىنداۋعا جانە مال شارۋاشىلىعىنا ماماندانعان. ءبىزدىڭ سۇرىپتاردى جەمگە دە, ءداندى داقىلدارعا دا قولدانۋعا بولادى, ويتكەنى ولار ءتورت ت ۇلىكتىڭ اۋزىنا تۇسكەن كەزدە كوپ اقۋىز ءارى جاسىل ماسسا بولەدى. ءبىزدىڭ تارى بارلىق استىق ەگەتىن ايماقتاردا وسەدى. مەملەكەتتىك تىزىلىمدە تىركەلگەن 20 تارى سۇرپىنىڭ جەتەۋىن اقتوبەلىك عالىمدار تاڭدادى», دەدى اشتس باس ەكونوميسى گالينا بارانوۆا.
كاسىپورىن قازىر قيىن جاعدايعا تاپ بولىپ, قارىزدىق مىندەتتەمە ارقالاپ وتىر. وسىعان بايلانىستى عىلىمي ازىرلەمەلەردى ودان ءارى دامىتۋ, قارجىلاندىرۋ جانە كوممەرتسيالاندىرۋ مۇمكىن ەمەس. جاقىن ارادا كاسىپورىندى قالپىنا كەلتىرۋ ءۇشىن ونىڭ بازاسىندا جىلقى شارۋاشىلىعى جانە جەمشوپ ءوندىرۋ ينستيتۋتى قۇرىلادى.
«مال شارۋاشىلىعى – اۋىل شارۋاشىلىعىنىڭ نەگىزگى باعىتتارىنىڭ ءبىرى, ءبىز قازىر وعان ۇلكەن ماڭىز بەرىپ وتىرمىز. جىلقى شارۋاشىلىعى ينستيتۋتى قۇرىلعاننان كەيىن اقتوبە وبلىسى قوستاناي, اداي جىلقىسى سياقتى اسىل تۇقىمدى, سپورتتىق جىلقىلاردى, سونداي-اق ەت باعىتىنداعى جىلقىلاردى زەرتتەيتىن ءارى دامىتاتىن ورتالىققا اينالادى», دەپ اتاپ ءوتتى سەرىك جۇمانعارين.
بۇگىندە رەسپۋبليكادا جىلقىنىڭ 14 تۇقىمى كەزدەسەدى. ەڭ كوپ تارالعاندارى – جابى, مۇعالجار جانە كوشىم جىلقىسى سەكىلدى قازاقى تۇقىم. ولار ەلدىڭ ءارتۇرلى ايماعىندا ءساتتى ءوسىرىلىپ جاتىر. جالپى, جىلقى ءوسىرۋ جىل وتكەن سايىن سۇرانىسقا يە كاسىپكە اينالۋدا جانە جاڭا عىلىمي ازىرلەمەلەر مەن پاتەنتتەر اتالعان شارۋاشىلىقتىڭ دامۋىنا ىقپال ەتە تۇسەرى انىق.
ساپار اياسىندا ۇكىمەت باسشىسىنىڭ ورىنباسارى ايتەكە بي, ىرعىز جانە مارتوك اۋداندارىندا بولىپ, كوكتەمگى ەگىس بارىسى, شەگىرتكەگە قارسى كۇرەس شارالارى جانە اگرارشىلاردىڭ وزەكتى ماسەلەلەرىمەن تانىستى.
بيىل اقتوبە وبلىسىندا 747,3 مىڭ گا القاپقا ەگىن ەگۋ جوسپارلانعان. نەگىزگى كولەم ءداندى داقىلدار (430,3 مىڭ گا), جەمشوپ (247 مىڭ گا) جانە مايلى داقىلدارعا (59 مىڭ گا) ارنالعان. قازىر وڭىردە 283,1 مىڭ گا ەگىلدى. اۋا رايى جاعدايىن ەسكەرە وتىرىپ, ەگىس ناۋقانىن ماۋسىم ايىنىڭ باسىندا اياقتاۋ جوسپارلانىپ وتىر.
ايتەكە بي, مارتوك اۋداندارىندا ۆيتسە-پرەمەرمەن كەزدەسۋگە شارۋا قوجالىقتارىنىڭ باسشىلارى مەن اۋىل شارۋاشىلىعى كاسىپكەرلەرى قاتىستى. جيىنعا قاتىسۋشىلاردىڭ ءبىرى, شارۋا قوجالىعىنىڭ باسشىسى مارلەن بايماعامبەتوۆ ديقانداردىڭ ماسەلەسىن كوتەردى. ونىڭ ايتۋىنشا, 2021 جىلى ەگىس القاپتارىن سۋارۋ ءۇشىن جاڭبىرلاتقىش ماشينالار ساتىپ الىنعان. الايدا «قازسۋشار» جەرگىلىكتى فيليالى وسى ۋاقىتقا دەيىن كانالدان سۋ بەرۋگە قاجەتتى ينفراقۇرىلىمدى قامتاماسىز ەتكەن جوق. ال شارۋالارعا نەسيە تولەۋ كەرەك.
كەلەسى كۇنى بارلىق مۇددەلى تاراپتارمەن كەڭەس وتكىزگەن سەرىك جۇمانعارين «اگرارلىق نەسيە كورپوراتسياسىنا» جاڭبىرلاتقىش ماشينالار ساتىپ العان شارۋالاردىڭ نەسيەلەرىن قايتا قۇرىلىمداۋدى, «قازسۋشار» جەرگىلىكتى فيليالىنا ەكى اپتا ىشىندە شارۋالاردى سۋمەن قامتاماسىز ەتۋدى تاپسىردى.
ەگىس القاپتارىندا شەگىرتكەگە قارسى وڭدەۋ جۇمىستارى ءجۇرىپ جاتقان ىرعىز اۋدانىندا ۆيتسە-پرەمەرگە باقىلاۋشى دروننىڭ جۇمىسى كورسەتىلدى. تەكسەرۋشى دروننىڭ ۇشقىشسىز ۇشاتىن بۇرىككىشتەن ايىرماشىلىعى – شەگىرتكەلەردىڭ ورنالاسقان جەرىن, ولاردىڭ ءدارى-دارمەكپەن وڭدەلگەننەن كەيىنگى جاعدايىن, دەرناسىلدەردىڭ جاڭا ينكۋباتسيالارى جانە اۋىل شارۋاشىلىعى داقىلدارىنىڭ ۆەگەتاتيۆتى احۋالى تۋرالى ناقتى مالىمەتتەر الۋعا مۇمكىندىك بەرەدى. ءدال وسى قۇرىلعىلاردى اۋىل شارۋاشىلىعى مينيسترلىگى جاقىن ارادا رەسپۋبليكالىق فيتوسانيتارلىق دياگنوستيكا جانە بولجامدار ادىستەمەلىك ورتالىعىنىڭ ماماندارى مەن ايماقتارداعى فيتوسانيتارلىق ينسپەكتورلار ءۇشىن ساتىپ الۋدى جوسپارلاپ وتىر.
جالپى, اقتوبە وبلىسىندا 784,4 مىڭ گەكتار القاپتى شەگىرتكەگە قارسى وڭدەۋ جوسپارلانعان. ونىڭ 533,5 مىڭ گەكتارى جەردەن, 250,9 مىڭ گەكتارى اۋا ارقىلى وڭدەلەدى. بارلىق اۋدانعا حيميالىق وڭدەۋگە قاجەتتى پرەپاراتتار جەتكىزىلدى. كومەككە تۇركىستان وبلىسىنان تەحنيكالار اكەلىندى. قازىر العا, بايعانين, مۇعالجار, ويىل, تەمىر, شالقار, ىرعىز اۋداندارىندا حيميالىق وڭدەۋ جۇمىستارى جۇرگىزىلىپ جاتىر. بۇگىندە وبلىس بويىنشا 11 مىڭ گەكتاردان استام القاپ وڭدەلدى.
