فوتو: aikyn.kz
«قازگيدرومەت» رمك ماماندارى كوكتەم جانە جاز ايلارىنداعى ماۋسىمدىق اۋا رايىنا بولجام جاساعان ەدى. وسىعان ۇڭىلسەك, ءساۋىر, مامىر ايلارىندا ەل اۋماعىنىڭ باسىم بولىگىندە اۋانىڭ ورتاشا تەمپەراتۋراسى ءبىر ايداعى نورمادان 1 گرادۋس جوعارى بولادى دەپ كۇتىلگەن. جاۋىن-شاشىن مولشەرى ەلدىڭ باسىم بولىگىندە نورمادان كوپ, سولتۇستىك-شىعىستا, ورتالىقتا جانە وڭتۇستىك وبلىستاردىڭ سولتۇستىگىندە نورما شاماسىندا تۇسەدى دەپ كۇتىلگەن. سونداي-اق كوكتەمدە «توسىنسىي» كۇتىلەتىنىن, ياعني اۋا رايى قۇبىلىپ, وتپەلى ماۋسىمدا سينوپتيكالىق ۇدەرىس وتە تۇراقسىز بولدى دەپ بولجانعان. ءتىپتى كاسپيدىڭ وڭتۇستىگى جانە رەسەيدىڭ ەۋروپالىق اۋماعىنداعى تسيكلونداردىڭ اسەرىنەن تۇندە جاڭبىر مەن قار تۇرىندە, كۇندىز جاڭبىر تۇرىندە, ال وڭتۇستىك ايماقتاردا سۋىق اۋا ماسسالارى ەنۋىنىڭ سالدارىنان ۇسىك بولۋى مۇمكىن دەگەن بولجام جاسالعان. كوكتەم دە ءوتتى. «قازگيدرومەت» رمك ماماندارى ازىرلەگەن ماۋسىمدىق بولجام دالمە-ءدال, 100 پايىز كەلدى دەمەسەك تە, شىندىققا جاناسادى.
سونىمەن, جازدا, دالىرەك ايتساق, ماۋسىمدا اۋانىڭ ورتاشا ايلىق تەمپەراتۋراسى رەسپۋبليكانىڭ باسىم بولىگىندە نورمادان 1-2 گرادۋس جوعارى بولادى دەگەن بولجام بار. ياعني كوپ وڭىردە كۇن رايى ادەتتەگىدەن ىستىق بولسا, ەلدىڭ باتىسىندا تەمپەراتۋرا نورما شاماسىندا بولادى دەپ كۇتىلەدى. ال شىلدە, تامىز ايلارىندا اۋانىڭ ورتاشا ايلىق تەمپەراتۋراسى نورما شاماسىندا بولسا, تەك تامىزدا – ەلدىڭ وڭتۇستىگى مەن وڭتۇستىك-شىعىسىندا نورمادان 1 گرادۋس جوعارى بولۋى مۇمكىن.
ەگەر جازدىڭ باسىندا, ماۋسىم ايىندا جاۋىن-شاشىن مولشەردەن از كۇتىلسە, شىلدە جانە تامىز ايلارىندا ەلدىڭ باسىم بولىگىندە جاۋىن-شاشىن مولشەرى نورما شاماسىندا جانە نورمادان كوپ ءتۇسۋى بەك مۇمكىن. تەك شىلدەدە ەلدىڭ وڭتۇستىك-باتىسىندا جانە وڭتۇستىك جارتىسىندا, ال تامىزدا ورتالىقتا, وڭتۇستىكتە جانە وڭتۇستىك-شىعىستا جاۋىن-شاشىن نورمادان از ءتۇسۋى ىقتيمال. «قازگيدرومەت» رمك ۇزاقمەرزىمدى اۋا رايىن بولجاۋ ءبولىمىنىڭ باسشىسى جۇلدىز يسابەكوۆانىڭ ايتۋىنشا, بيىل جازدىڭ باس كەزى 2006 جىلدىڭ ماۋسىم ايىنداعى اۋا رايىنا ۇقساس بولادى.
«الدىن الا بولجام بويىنشا ماۋسىمدا ەلىمىزدىڭ وڭتۇستىك-شىعىس بولىگىندە اۋا رايى نورمادان 1-2 گرادۋس جوعارى بولادى. بۇل – قالىپتى جاعداي. ورتالىق, سولتۇستىك جانە شىعىس قازاقستاندا اۋا تەمپەراتۋراسى 22–25 گرادۋستان 30–38 گرادۋسقا دەيىن اۋىتقيدى. وڭتۇستىكتە جانە وڭتۇستىك-باتىستا 25–30-دان 35–39 گرادۋسقا دەيىن جوعارىلايدى. 40 گرادۋس دەپ ايتا المايمىن, ويتكەنى ءبىز مامىر ايىندا تەمپەراتۋرا 40-قا جەتۋى مۇمكىن دەگەن ەدىك. بىراق تەمپەراتۋرا وڭتۇستىكتە 33-34 گرادۋسقا دەيىن, سولتۇستىكتە 28 گرادۋسقا دەيىن كوتەرىلدى. سوندىقتان جاز وتە ىستىق بولمايدى», دەيدى ج.يسابەكوۆا.
ماۋسىمدا ەل اۋماعىندا ىلعالدانۋ كوپجىلدىق ماندەر شاماسىندا كۇتىلگەنىمەن, بىرنەشە وڭىردە اتموسفەرالىق قۇرعاقشىلىق بايقالادى ەكەن. مىسالى, قوستاناي وبلىسىنىڭ امانگەلدى جانە جانگەلدى اۋداندارىندا, ماڭعىستاۋ وبلىسىنىڭ ماڭعىستاۋ جانە قاراقيا اۋداندارىندا, باتىس قازاقستان وبلىسىنىڭ كازتالوۆ اۋدانىندا جانە قاراعاندى وبلىسىنىڭ شەت اۋدانىندا اتموسفەرالىق قۇرعاقشىلىق كۇتىلەدى. سول سەكىلدى ماۋسىمدا شىعىس قازاقستان وبلىسىنىڭ قاتونقاراعاي اۋدانىندا, پاۆلودار وبلىسىنىڭ ۋسپەن اۋدانىندا جانە پاۆلودار قالاسىندا بىرقالىپتى ىلعالدى جاعداي كۇتىلەدى. ال باسقا وڭىرلەردە ىلعال مولشەرى وسى اي ءۇشىن قالىپتى بولادى.
ەسكەرەتىن جاي, «قازگيدرومەت» ماماندارى قازىر تەك الدىن الا بولجام جاسالعانىن, اقپاراتتار الدا تاعى ناقتىلاناتىنىن ايتادى. شىلدە ايىنىڭ بولجامى 15 ماۋسىمدا, ال تامىزعا ارنالعان بولجام 15 شىلدەدە جاريالانادى. ال قازىرگى قولدا بار اقپاراتتارعا زەر سالساق, بيىل جازداعى اۋا رايى, توپىراقتىڭ ىلعالدىلىعى قالىپتى دەڭگەيدە ساقتالاتىنعا ۇقسايدى.
