فوتو: gov.kz
جۋىردا پاۆلودار وبلىسىندا پوليتسەيلەر «سينتەتيكانىڭ» ءىرى پارتياسىن تاسىمالداعان كۋرەردى ۇستادى. پاۆلودار قالاسىنىڭ اۋماعىندا تىيىم سالىنعان زاتتاردىڭ زاڭسىز تارالۋى تۋرالى جەدەل اقپارات العان ءتارتىپ ساقشىلارى جەدەل-ىزدەستىرۋ ءىس-شارالار كەشەنىن جۇرگىزىپ, ناتيجەسىندە كۇدىكتىنى انىقتادى. ول 28 جاستاعى جەرگىلىكتى تۇرعىن بولىپ شىقتى. جەدەل ۋاكىلدەر ونى «قاپتامانى» جاسىرىپ جاتقان كەزىندە قالا اۋداندارىنىڭ بىرىندە قولعا ءتۇسىردى.
ول تانىمال مەسسەندجەردەگى ينتەرنەت-دۇكەننىڭ كۋرەرى ەكەن. كۇدىكتىنى تەكسەرۋ بارىسىندا جەدەل ۋاكىلدەر ودان تىيىم سالىنعان زاتتاردىڭ ورنالاسقان جەرى تۋرالى اقپاراتى بار ۇيالى تەلەفوندى تاركىلەدى. سونىمەن قاتار پوليتسەيلەر جالپى سالماعى 1,6 كەلىدەن اساتىن سينتەتيكالىق پرەپاراتتارى بار 18 كونۆوليۋتسيا مەن 4 پلاستيكالىق كونتەينەردى, قۇرامىندا ەسىرتكى بار 189 تابلەتكانى تاپتى. قولعا تۇسكەن ەسىرتكى 3 400 بىررەتىك دوزانى قۇرايدى.
وسى فاكتى بويىنشا قك-ءنىڭ 297-بابى (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ), 3-بولىگى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. كۇدىكتى پاۆلودار قالاسى پب ۋۇي-عا قاماۋعا الىندى.
پوليتسەيلەر وبلىس تۇرعىندارىنا ەسىرتكى زاتتارىن ساتۋمەن اينالىساتىن كۋرەر بولىپ جۇمىس ىستەۋ تۋرالى ۇسىنىستاردان باس تارتۋدى قاتاڭ تۇردە ەسكەرتەدى. ەسىرتكى ساۋداگەرلەرىنىڭ كۋرەرلەرگە ۋادە ەتكەن انونيمدىلىگى مەن جازاسىزدىعى ويدان شىعارىلعان. پوليتسيا قىزمەتكەرلەرىنىڭ زاڭسىز زاتتارمەن بايلانىسسىز ساۋدانى توقتاتۋعا, وتكىزۋ سحەماسىنىڭ بارلىق قاتىسۋشىسىن انىقتاۋعا جانە ءبارىنىڭ كىناسىن ايعاقتايتىن دالەلدەمەلەردى جيناۋعا جەتكىلىكتى مۇمكىندىكتەرى بار. ەسىرتكىنىڭ زاڭسىز اينالىمىنا بايلانىستى قىلمىستار ءۇشىن ەڭ جوعارى جازا رەتىندە ءومىر بويىنا باس بوستاندىعىنان ايىرۋ قاراستىرىلعانىن بۇگىندە كوپ ادام بىلە بەرمەيدى.
وسى سىندى تاعى ءبىر قىلمىس قوستاناي وبلىسىنىڭ رۋدنىي قالاسىندا تىركەلدى. پوليتسەيلەر ەسىرتكى جاسىرىپ كەتۋشىنى ۇستاپ, كۇدىكتىدەن 29 گرامنان اسا مەفەدرون تاركىلەدى. جەدەل-ىزدەستىرۋ ءىس-شارالارىن جۇرگىزۋ كەزىندە قولعا تۇسكەن 39 جاستاعى جەرگىلىكتى تۇرعىننان 129 مەفەدرون قاپتاماسى تابىلعان.
قوستاناي وبلىسى پد ەسىرتكى قىلمىسىنا قارسى ءىس-قيمىل باسقارماسى باستىعىنىڭ مىندەتىن اتقارۋشى ايات قارتباەۆتىڭ ايتۋىنشا, كۇدىكتى ءار جولى ۇيدەن ەسىرتكى سالىنعان پاكەتتەردى اۋزىنا سالىپ, الىپ شىققان. ءوزىن ەشكىم باقىلاپ تۇرماعانىنا كوز جەتكىزگەننەن كەيىن عانا ءتيىستى جەرگە جەتكىزىپ وتىرعان. ەندى وعان ەسىرتكىنى اسا ءىرى مولشەردە ساقتاعانى ءۇشىن مۇلكى تاركىلەنىپ, ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋ قاۋپى ءتونىپ تۇر.
ءبىر وكىنىشتىسى, ەسىرتكى زاتتارىن جاسىرىپ كەتۋ قىلمىستارىنا بالالاردىڭ دا تارتىلۋ جاعدايلارى ورىن الىپ ءجۇر. ماسەلەن, جىل باستالعالى بەرى 19 بالا ەسىرتكى تاراتقانى ءۇشىن ۇستالعان. جاستار ەسىرتكى تاراتۋدىڭ جانە جارنامالاۋدىڭ قۇقىقتىق سالدارى تۋرالى بىلسە دە, ولاردىڭ كەيبىرى ەسىرتكىنىڭ زاڭسىز اينالىمىنان باس تارتار ەمەس. ناشاقورلىققا قارسى يممۋنيتەت قالىپتاستىرۋدا وتباسىنىڭ ايرىقشا ءرولىن ەسكەرە وتىرىپ, ءىىم اتا-انالارعا جازعى دەمالىس قارساڭىندا بالالار ومىرىنە بارىنشا كوڭىل قويۋ كەرەكتىگىن ەسكەرتەدى.
ء«وز بالالارىڭىزدىڭ ارالاساتىن ورتاسىن ءبىلۋ, ولار پايدالاناتىن ينتەرنەت-رەسۋرستاردى باقىلاۋ اسا ماڭىزدى. زاتتارىنىڭ ىشىنەن مەديتسينالىق پرەپاراتتاردىڭ قورابىن, فولگا نەمەسە شىنى تۇتىكشەلەر بايقاساڭىز, ەلەۋسىز قالدىرماڭىز. مۇنىڭ ءبارى سينتەتيكالىق ەسىرتكى تۇتىنۋعا ارنالعان بولۋى ابدەن مۇمكىن. ساباقتاعى ۇلگەرىمىنىڭ ناشارلاۋى, ساباققا بارماۋى جانە ارالاساتىن ورتاسىنىڭ وزگەرۋى اتا-انا نازارىنان تىس قالماۋى كەرەك. اگرەسسيا, اياق استىنان كوڭىل كۇيىنىڭ وزگەرۋى, شارشاڭقى كۇيگە ءجيى ءتۇسۋى دە ەسىرتكى تۇتىنىپ جۇرگەنىنىڭ بەلگىلەرى بولۋى ىقتيمال. بالانىڭ بويىنان ءۇش نەمەسە ودان دا كوپ وسىنداي بەلگىلەر بايقالسا, تەز ارادا شارا قولدانۋ قاجەت. اقشا جۇمساۋى جيىلەسە نەمەسە قاراجاتى كوپ بولسا, بۇل دا – الاڭداۋعا تۇرارلىق ماسەلە. ويتكەنى بالانى ەسىرتكى تۇتىنۋعا عانا ەمەس, ونى تاراتۋعا دا تارتۋى مۇمكىن. ەگەر بالانىڭ تەلەفونى مەن مەسسەندجەرلەرىنەن گەولوكاتسيا كورسەتىلگەن سۋرەتتەر, ءۇي قابىرعالارى مەن باعاندارداعى شتامپتاردى بايقاساڭىز, بۇل دا – كۇمان تۋدىراتىن جايت. سەبەبى وندا ەسىرتكى جاسىرىلعان جەرلەر كورسەتىلۋى مۇمكىن. نومىرلەر جانە ءتۇرلى سايتتىڭ سىلتەمەلەرى جازىلعان تىزىمگە, يزولەنتاعا ورالعان زاتتارعا دا نازار سالعانىڭىز ابزال. ەسىرتكى قىلمىستارى ءۇشىن جاۋاپكەرشىلىك 16 جاستان باستالاتىنىن ەستەرىڭىزگە سالامىز», – دەيدى ءىىم رەسمي وكىلى شىڭعىس الەكەشەۆ.
