ەرلىك پەن باتىرلىقتى دارىپتەگەن ءىس-شارانى «Atamnyn Amanaty» قوعامدىق بىرلەستىگى مەن قورعانىس مينيسترلىگى ۇيىمداستىردى.
قورعانىس مينيسترلىگى تاربيە جانە يدەولوگيالىق جۇمىس دەپارتامەنتى وكىلدەرى, قارۋلى كۇشتەر ارداگەرلەرى, ۇلتتىق قورعانىس ۋنيۆەرسيتەتى, اسكەري كافەدرالار, وقۋ ورىندارىنىڭ العاشقى اسكەري دايارلىق ءپانى وقىتۋشىلارى, س.نۇرماعامبەتوۆ پەن ر.قوشقارباەۆتىڭ تۋىستارىنىڭ كەزدەسۋى دوڭگەلەك ۇستەل فورماتىندا ۇيىمداستىرىلدى.
وتىرىستا ەلوردالىق ەۋرازيا ۇلتتىق ۋنيۆەرسيتەتى, قازاق تەحنولوگيا جانە بيزنەس ۋنيۆەرسيتەتى جانىنداعى كوللەدجدەردىڭ, كولىك جانە كوممۋنيكاتسيا جوعارى كوللەدجىنىڭ, م.جۇماباەۆ اتىنداعى حالىقارالىق كوللەدجدىڭ جانە ع.مىرزاعۇلوۆا اتىنداعى «دانالىق» جوعارى مەديتسينالىق كوللەدجىنىڭ ستۋدەنتتەرى بايانداما جاسادى. ولار كەڭەس وداعىنىڭ باتىرلارى – ىسقاق ىبىراەۆ, لەونيد بەدا, سۇندەتقالي ەسقاليەۆ جانە ءانۋار ءابۋتالىپوۆتىڭ جاۋىنگەرلىك جولى مەن ەرلىگى جايلى ايتىپ بەردى.
– بيىل ءبىز قازاق حالقىنىڭ كورنەكتى ۇلدارى – كەڭەس وداعىنىڭ باتىرى, تاۋەلسىز قازاقستاننىڭ ءبىرىنشى قورعانىس ءمينيسترى, حالىق قاھارمانى, ارميا گەنەرالى ساعادات نۇرماعامبەتوۆتىڭ جانە حالىق قاھارمانى راقىمجان قوشقارباەۆتىڭ ءجۇز جىلدىعىن اتاپ وتۋدەمىز. ۋاقىت بىزدەن بەيبىتشىلىك پەن بوستاندىق جولىندا حالىق باسىنان وتكەرگەن سۇراپىل سوعىس جىلدارىنىڭ اۋىرتپالىعىنان, تاۋەلسىزدىك العاننان كەيىنگى العاشقى قيىندىقتاردان الشاقتاتىپ بارادى. اعا بۋىننىڭ جاساعان ۇلى ىستەرى تاريح ەنشىسىندە. وسى تىنىمسىز ۋاقىت اعىمىندا كەشەگى مەن بۇگىنگىنى بايلانىستىرۋشى دانەكەردى ساقتاي ءبىلۋ – پارىزىمىز, – دەدى «قارۋلى كۇشتەردىڭ ارداگەرلەرى» رقب توراعاسىنىڭ ورىنباسارى, وتستاۆكاداعى گەنەرال-مايور مارات ناعۇمانوۆ.
كەزدەسۋ بارىسىندا دوڭگەلەك ۇستەلدىڭ وزگە دە قاتىسۋشىلارى ءسوز سويلەدى. ساعادات نۇرماعامبەتوۆتىڭ نەمەرەسى ليرا تالعاتقىزى مەن راقىمجان قوشقارباەۆتىڭ نەمەرەسى داۋرەن جانات ۇلى دا اتالارى جايلى ەستەلىكتەرىمەن ءبولىستى.
ءىس-شارا سوڭىندا دوڭگەلەك ۇستەل وتىرىسىندا ءسوز سويلەگەن كوللەدج ستۋدەنتتەرىنە سەرتيفيكاتتار تاپسىرۋ ءراسىمى ءوتتى. سونىمەن قاتار استانا قالاسىنىڭ كوللەدجدەرى اراسىندا «باتىر بابا تاريحى» زياتكەرلىك ويىنىنىڭ ۇزدىك قاتىسۋشىلارى انىقتالدى. ءبىرىنشى ورىندى م.جۇماباەۆ اتىنداعى حالىقارالىق كوللەدجدىڭ بىلگىرلەرى, ەكىنشى ورىندى سەرۆيس جانە تۋريزم كوللەدجى, ءۇشىنشى ورىندى ع.مىرزاعۇلوۆا اتىنداعى «دانالىق» جوعارى مەديتسينالىق كوللەدجىنىڭ «الاش» كومانداسى يەلەندى.
