دارىندى بالالارعا ارنالعان مامانداندىرىلعان ليتسەيدىڭ 10-سىنىپ وقۋشىلارى انەل قۇمقاي مەن اسقار ءابدىراحمان ىزدەنىس ىزىنە تۇسكەن. ولار جاڭا تەحنولوگيا مەن جاساندى ينتەللەكتىنى پايدالانا وتىرىپ, شالعايداعى ەلدى مەكەن تۇرعىندارىنىڭ ءومىر ءسۇرۋ دەڭگەيىن كوتەرۋگە ىقپال ەتەتىن, ەكونوميكا مەن ينفراقۇرىلىمدى وركەندەتۋگە ارنالعان جوبانى دۇنيەگە اكەلگەن.
وقۋشىلار كەلتىرگەن دەرەككە جۇگىنسەك, جوبا ارقىلى ەگىنشىلىك پەن مال شارۋاشىلىعىنداعى كىسى كۇشىن كوپ تالاپ ەتەتىن جۇمىستار اۆتوماتتاندىرىلماق. سونداي-اق «Arduino» پلاتفورماسى ارقىلى ەگىن القابىن اۆتوماتتاندىرىلعان سۋارۋ جۇيەسىمەن قامتۋعا دەن قويىپتى. بۇدان بولەك, اعىن سۋدى لاستاماۋ ماقساتىندا جاساندى ينتەللەكت كومەگىمەن ىسكە اساتىن كانالدار ورناتىلادى. سونىمەن قاتار قوراداعى ءتورت ت ۇلىكتىڭ قيىن تازالاپ, قويماعا جيناۋ جانە ونى ەگىن شارۋاشىلىعىنا تىڭايتقىش رەتىندە قولدانۋدى دا قاراستىرىپتى.
«بۇل جوبانى اۋىل شارۋاشىلىعىن وركەندەتۋ ماقساتىندا ىسكە اسىرۋدى ءجون دەپ تاپتىق. ءبىز ەنەرگيانى تابيعي جولمەن ءوندىرۋدىڭ 3 ءتۇرىن تاڭداپ وتىرمىز. ولار: سۋ ەنەرگياسى (گيدروەلەكتروستانسا), كۇن ەنەرگياسى (كۇن پانەلدەرى), جەل ەنەرگياسى (جەل ديىرمەندەرى). ارينە, جوبانى جان-جاقتى ويلاسا وتىرىپ قولعا العان جايىمىز بار. ءبىرىنشى كەزەكتە ادام كۇشىن ۇنەمدەۋ قاجەتتىگىنە دەن قويدىق. ويتكەنى تەحنولوگيا دامىعان ۋاقىتتا كوپ جۇمىس اۆتوماتتاندىرىلعان جۇيە ارقىلى جۇزەگە اسقانى ءجون. ول بارلىعىمىز ءۇشىن ءتيىمدى بولماق.
ءبىزدىڭ جوبامىز بىرنەشە جۇيەنى قامتيتىنىن ايتىپ كەتكەن ءجون. ماسەلەن, اۋىل ماڭىنداعى وزەن نەمەسە كول ارقىلى گيدروەلەكتروستانسا ەلەكتر توعىن وندىرسە, اۋا رايىنا بايلانىستى كۇن مەن جەل ەنەرگياسى دا قارقىندى وندىرىلەدى. وسى ءۇش تابيعي جولمەن وندىرىلگەن ەلەكتر ەنەرگياسى نەگىزگى ستانساعا جينالادى. سودان كەيىن جينالعان ەنەرگيا كوزى بارلىق اۋىلداعى تۇرعىن ۇيلەردى ەلەكتر توعىمەن, جىلۋمەن جانە جارىقپەن قامتاماسىز ەتەدى.
«Arduino» پلاتفورماسىنداعى جاساندى ينتەللەكتتە وسى ۇدەرىستىڭ بارلىعى اۆتوماتتاندىرىلعان تۇردە باقىلاۋعا الىنادى. سونداي-اق ەلەكتروستانساداعى ەنەرگيانىڭ مولشەرىن دە كورسەتەدى», دەيدى جاس ونەرتاپقىشتار.
تارازدىق وقۋشىلار وزدەرى ويلاپ تاپقان جوبانىڭ اۋىز تولتىرىپ ايتارلىقتاي ناتيجە بەرەتىنىنە بەك سەنىمدى. ولار جاڭا جوبا لايىقتى تۇردە جۇزەگە اسسا, ەلىمىزدەگى ۋربانيزاتسيا ۇدەرىسىندەگى وزەكتى ماسەلەلەر وزدىگىنەن شەشىمىن تابادى دەپ وتىر.
تاراز
