دوقتىرحان تۇرلىبەك, تالعات ايتباي ۇلى, تولىمبەك الىمبەك ۇلى, تالعات ءسۇيىنباي باستاعان قالامگەرلەردى الدىمەن جۋالى اۋدانىنىڭ اكىمى جالعاس مۇرتازا ارنايى قابىلداپ, مەرەيتوي يەلەرىن قۇتتىقتادى. بۇدان ارمەن قاراي جۋرناليستيكا مەن ادەبيەتتە قاتار جارقىراعان قالامگەرلەر تۋعان جەر توسىندەگى ءىس-شارالارعا قاتىستى.
ءتاتتىباي دۇيسەباي اۋلىندا جازۋشى-جۋرناليست تالعات ءسۇيىنبايدىڭ 70 جاسقا تولۋىنا وراي «تۇلعالارعا تۇعىر بەرگەن قالامگەر» اتتى ادەبي-سازدى كەش ۇيىمداستىرىلدى.
ءىس-شارا بارىسىندا مادەنيەت ءۇيى قىزمەتكەرلەرى تالعات ءسۇيىنبايدىڭ شىعارماشىلىق جولىنا توقتالىپ, قالامگەردىڭ كىتاپتارىنا شولۋ جاسادى. اۋداندىق ءماسليحات توراعاسى زيادحان بۇرلىباەۆ, اۋداندىق مادەنيەت جانە تىلدەردى دامىتۋ ءبولىمىنىڭ باسشىسى عازيزا ەستاەۆا جەرلەس قالامگەرگە قۇرمەت كورسەتىپ, ىزگى تىلەگىن جەتكىزدى. ءىس-شارا بارىسىندا ت.ءسۇيىنبايدىڭ سىنىپ جەتەكشىسى مەن سىنىپتاس دوستارى قالامگەر تۋرالى ەستەلىكتەرىمەن ءبولىستى.
كەزدەسۋ بارىسىندا اۋىل وقۋشىلارى ونەرلەرىن ورتاعا سالدى. ءبىرى بي بيلەسە, ەندى ءبىرى قالامگەرگە ارناعان ولەڭدەرىن وقىدى. ءىس-شارانىڭ سوڭىندا وقۋشىلار كوكەيلەرىندە جۇرگەن سۇراقتارىن قويىپ, تۇشىمدى جاۋاپ الدى.
بۇل كۇنى جۋالى اۋدانىنىڭ قۇرمەتتى ازاماتى, بەلگىلى قالامگەر تالعات ايتباي ۇلى تۋعان اۋلى قوشقاراتا ەلدى مەكەنىندە وقىرماندارىمەن كەزدەسۋگە قاتىستى. «جومارت تۇلەك» جوباسى اياسىندا ءوزى ءبىلىم العان №9 اباي اتىنداعى ورتا مەكتەپ وقۋشىلارىمەن جۇزدەسىپ, «تۋعان ولكە تاريحى» مۋزەيىنىڭ اشىلۋىنا قاتىسىپ, ۇستازدارعا جانە ءبىلىم الۋشىلارعا ىزگى تىلەگىن جەتكىزدى. قالامگەردىڭ مەرەيتويىنا ارنالعان ءىس-شارا مادەنيەت ۇيىندە جالعاسىن تاۋىپ, ت.ايتباي ۇلى جەرلەستەرى تاراپىنان تۋىنداعان ءتۇرلى ساۋالعا جاۋاپ بەردى. بالالىق شاعى مەن شىعارماشىلىق جولى تۋرالى قىزىقتى ەستەلىكتەر ايتتى.
«تۇركى الەمى» حالىقارالىق تەلەكومپانياسىنىڭ باس ديرەكتورى, جازۋشى دوقتىرحان تۇرلىبەك تە اۋىلداستارىمەن جۇزدەسىپ, جەرلەستەرىنىڭ قۇرمەتىنە بولەندى. ول قاراساز اۋلىنداعى پۋشكين اتىنداعى ورتا مەكتەپتىڭ ۇجىمىمەن كەزدەسۋگە قاتىسىپ, اۆتورلىق كىتاپتارىن مەكتەپ ۇجىمىنا تابىستادى.
جامبىل وبلىسى,
جۋالى اۋدانى
