سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
– مادەنيەت پەن ونەر – ەل ومىرىندەگى وتە ماڭىزدى سالا. ونەر – ۇلتتىڭ جانى, ال مادەنيەت – رۋحاني كەلبەتى. بۇل قوس قۇندىلىقتى وركەنيەتىمىزدىڭ وزەگى دەۋگە بولادى. ونى ساقتاپ, بايىتا ءتۇسۋ – ورتاق پارىز. ءابىش كەكىلباي ۇلى «مادەنيەت تاريحى – تۇپتەپ كەلگەندە, ادامزات تاريحى» دەگەن. قازاقتىڭ ءبىتىم-بولمىسىن ونىڭ ءتول ونەرىنەن كورۋگە بولادى, – دەدى قاسىم-جومارت توقاەۆ.
مەملەكەت باسشىسى مادەنيەت پەن ونەردى دامىتۋ مەملەكەتىمىز ءۇشىن نەگىزگى باسىمدىقتىڭ ءبىرى سانالاتىنىن جەتكىزدى. سونىمەن قاتار ۇلت رۋحانياتىن جاڭعىرتۋ ىسىنە قاتىستى ناقتى شارالار قولعا الىنىپ جاتقانىن اتاپ ءوتتى.
– بىلتىر مادەني ساياساتتىڭ 2029 جىلعا دەيىنگى تۇجىرىمداماسىن قابىلدادىق. بۇگىندە مەملەكەت وسى ماڭىزدى سالانىڭ ينفراقۇرىلىمىن جان-جاقتى دامىتۋعا باسا ءمان بەرەدى. تەك كەيىنگى ءۇش جىلدا ەل اۋماعىندا 700-دەن استام عيماراتقا جوندەۋ جۇمىستارى جۇرگىزىلىپ, 168 جاڭا نىسان سالىندى. مادەنيەت جانە ونەر مەكەمەلەرىن جابدىقتاۋ دەڭگەيى بىرتىندەپ جاقسارىپ كەلەدى. كەيىنگى وتىز جىلدا العاش رەت بەيىندى وقۋ ورىندارى مەن مەملەكەتتىك كونتسەرت ۇيىمدارىنا مۋزىكالىق اسپاپتار ساتىپ الۋعا بيۋدجەتتەن قارجى ءبولىندى, – دەدى پرەزيدەنت.
قاسىم-جومارت توقاەۆ مۇحتار اۋەزوۆ اتىنداعى قازاق ۇلتتىق دراما تەاترىنىڭ عيماراتى جاقىندا تولىقتاي قايتا جاڭعىرتىلاتىنىن ايتتى. بۇل جۇمىس اتالعان ونەر ورتالىعىنىڭ 100 جىلدىق مەرەيتويىنا وراي, ياعني 2026 جىلى اياقتالادى.
– بىلتىر مەنىڭ جارلىعىممەن ەلىمىزدەگى ىرگەلى مادەنيەت وردالارىنا «ۇلتتىق» جانە «اكادەميالىق» مارتەبە بەرىلدى. بۇل شەشىم ونەر ۇجىمدارىنىڭ شىعارماشىلىق ءورىسىن كەڭەيتىپ, ولاردىڭ كاسىبي تۇرعىدا شىڭدالا تۇسۋىنە جول اشاتىنى ءسوزسىز. وسى باعىتتاعى جۇمىس بيىل دا جالعاسادى, – دەدى پرەزيدەنت.
مەملەكەت باسشىسى ەلىمىزدەگى ەڭ باستى ءۇش مۋزەيگە ۇلتتىق مارتەبە بەرىلەتىنىن جەتكىزدى.
– قازىرگى زامان تالابىنا ساي مۋزەي قوعام ساناسىن جاڭعىرتۋعا زور ىقپال ەتەتىن وزىق ينستيتۋتقا اينالۋى كەرەك. سول ارقىلى جاس ۇرپاق ءتول تاريحىمىز بەن سالت-ءداستۇرىمىزدى تەرەڭ تانىپ, ودان تاعىلىم الۋى قاجەت. جالپى, ەلىمىزدە تاريحي-مادەني مۇرانى ساقتاۋ جانە مولايتۋ ماقساتىندا اۋقىمدى ءارى ۇزدىكسىز جۇمىس جۇرگىزىلىپ كەلەدى. ۇزاق جىلدان بەرى العاش رەت جاقىندا ماتەريالدىق ەمەس مادەني مۇرانىڭ ۇلتتىق تىزبەسى ايتارلىقتاي كەڭەيدى. يۋنەسكو-نىڭ ماتەريالدىق ەمەس مادەني مۇرالار تىزىمىنە ءبىزدىڭ «سالبۋرىن» جانە «بەتاشار» سياقتى ۇلتتىق داستۇرلەرىمىزدى ەنگىزۋ ماسەلەسى پىسىقتالىپ جاتىر, – دەدى قاسىم-جومارت توقاەۆ.
مەملەكەت باسشىسى مادەنيەت پەن ونەر ادامدارى تاريحي ءۇردىستىڭ الدىڭعى شەبىندە ءجۇرىپ, سول ارقىلى ۇلتىمىزدىڭ قارقىندى دامۋىنا ىقپال ەتەتىنىن اتاپ ءوتتى.
– سىزدەر ءوز شىعارماشىلىقتارىڭىز ارقىلى حالقىمىزدىڭ بىرەگەي بولمىسىنىڭ جاڭا قىرىن اشاسىزدار. ازاماتتاردىڭ جاسامپاز قۋاتىن وياتاسىزدار. سوندىقتان مەملەكەت شىعارماشىلىق وكىلدەرىنىڭ بەدەلىن ارتتىرۋ ءۇشىن ءتيىستى شارالاردى قابىلدايدى. مادەنيەت جانە ارحيۆ ءىسى قىزمەتكەرلەرىنىڭ جالاقىسى ايتارلىقتاي كوبەيدى. مەنىڭ تاپسىرماممەن حالىق ءارتىسى جانە حالىق جازۋشىسى اتاعى قايتا بەرىلە باستادى, – دەدى پرەزيدەنت.
قاسىم-جومارت توقاەۆ حالقىمىز دارىندى ۇل-قىزدارىن قاشاندا قادىرلەي بىلگەنىنە نازار اۋدارىپ, استاناداعى قازاق ۇلتتىق ونەر ۋنيۆەرسيتەتىنە كۇلاش بايسەيىتوۆانىڭ ەسىمىن بەرۋ تۋرالى شەشىم قابىلداعانىن جەتكىزدى.
– بۇل – ايگىلى انشىگە كورسەتىلگەن زور قۇرمەت ءارى ەرەكشە ونەرىمەن تاريحتا قالعان تۇلعالارعا ەل ىقىلاسىنىڭ ايرىقشا بەلگىسى. تۇپتەپ كەلگەندە, مۇنى تاريحي ادىلدىكتى قالپىنا كەلتىرۋ دەپ تۇسىنگەن ءجون. اعا بۋىننىڭ ونەردەگى جولىن قازىرگى جاستارىمىز دا لايىقتى جالعاستىرىپ كەلەدى. وسى ساباقتاستىقتى ساقتاۋ وتە ماڭىزدى, – دەدى قاسىم-جومارت توقاەۆ.
پرەزيدەنت بۇگىندە كوپتەگەن جاس ونەرپازدار ەرەكشە دارىنىمەن بۇكىل الەمدى تاڭعالدىرىپ جاتقانىن اتاپ ءوتتى. بۇل ورايدا مەملەكەت باسشىسى ديماشتىڭ بىرەگەي ونەرىنە ءتانتى بولعان ءتۇرلى ەلدىڭ ازاماتتارى قازاقستاننىڭ ءانۇرانىن شىرقاپ, كوك تۋىن جەلبىرەتىپ جۇرگەنىن ايتتى.
– ونەر – تاربيە قۇرالى. مەن ۇلتتىق قۇرىلتايدىڭ وتىرىسىندا ۇلت بولاشاعىنا قاۋىپ توندىرەتىن بەس كەسەل تۋرالى ايتتىم. قوعامدى وسى كەسەلدەردەن تازارتۋعا مادەنيەت قايراتكەرلەرى زور ۇلەس قوسىپ كەلەدى. لۋدومانيا مەن ناشاقورلىقتىڭ زيانىن اشىپ كورسەتەتىن تىڭ تۋىندىلار شىعىپ جاتىر. بۇل – وتە دۇرىس باستاما, – دەدى پرەزيدەنت.
مەملەكەت باسشىسىنىڭ ايتۋىنشا, مادەنيەت سالاسىنىڭ وكىلدەرى حالىقتىڭ رۋحاني قالقانى بولۋعا ءتيىس. سونداي-اق پرەزيدەنت ولاردىڭ جاس ۇرپاقتى جاسامپازدىققا, جاڭاشىلدىققا ۇيرەتۋگە, بىرلىكتى نىعايتۋعا, ءونىمدى ەڭبەك ەتۋگە باۋلۋعا بەلسەنە اتسالىساتىنىنا سەنىم ءبىلدىردى.
– سىزدەر مادەنيەت پەن ونەر جولىنا ادال بولىپ, قاجىرلى ەڭبەك ەتىپ كەلەسىزدەر. وعان بۇكىل ەل كۋا. ونەر ادامى ءۇشىن ەڭ قۇندى ماراپات – حالىقتىڭ ىستىق ىقىلاسى. مەن ءتول مادەنيەتىمىزدى دامىتۋعا مول ۇلەس قوسىپ جۇرگەن ءبىر توپ ازاماتتى ماراپاتتاۋ تۋرالى شەشىم قابىلدادىم. مادەنيەت سالاسىندا ەرەكشە ورنى بار 7 ىرگەلى ۇجىم بيىل مەرەيلى بەلەسكە جەتىپ وتىر. سوندىقتان بۇگىن نەگىزىنەن وسى مەكەمەلەردىڭ قىزمەتكەرلەرىنە جوعارى مەملەكەتتىك ماراپات تاپسىرۋدى ءجون كوردىم, – دەدى قاسىم-جومارت توقاەۆ.
سونىمەن قاتار جيىندا قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديريجەرى جەكسەن ايسىن, ا.جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكالىق مەكتەپ-ينتەرناتىنىڭ اعا وقىتۋشىسى مۇرات بيسەنعاليەۆ ءسوز سويلەدى.
جيىندا پرەزيدەنت بىرقاتار ازاماتتى مەملەكەتتىك ناگرادالارمەن ماراپاتتادى. اتاپ ايتقاندا, «پاراسات» وردەنىمەن تىكىشەۆ تەمىر – ا.جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنىڭ وقىتۋشىسى ماراپاتتالدى.
«قۇرمەت» وردەنىمەن اسقاروۆ ازامات اسقار ۇلى – اباي اتىنداعى قازاق ۇلتتىق وپەرا جانە بالەت تەاترىنىڭ ءارتىسى;
احاتوۆ اسىلبەك قۇسىم ۇلى – قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ءارتىسى;
ءابىلدينا عاينيجامال بايكارىمقىزى – ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى;
جولمۇحامەدوۆا ايجان ابىلايحانقىزى – ا.جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنىڭ وقىتۋشىسى;
كارمەنوۆا توعجان جاناتقىزى – ا.سەلەزنەۆ اتىنداعى الماتى حورەوگرافيالىق ۋچيليششەسى ديرەكتورىنىڭ ورىنباسارى;
قالدىباەۆا گۇلجان اقماديقىزى – ءا.قاستەەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيىنىڭ سۋرەتشى-رەستاۆراتورى;
ق ۇلىش قاپاش قابىكەنقىزى – قازاق ۇلتتىق ونەر ۋنيۆەرسيتەتىنىڭ پروفەسسورى;
مەدەۋباەۆا سۆەتلانا ماگنيتقىزى – ا.سەلەزنەۆ اتىنداعى الماتى حورەوگرافيالىق ۋچيليششەسىنىڭ ءبولىم باسشىسى;
مولداشەۆا گۇلزيرا باكىرقىزى – ءا.قاستەەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيىنىڭ باس قور ساقتاۋشىسى;
مۇرتازينا قارلىعاش توكەنقىزى – «ايگۇل» ۆاا ۆوكاليسى;
ناسيروۆا گۇلباحار قاسىمقىزى – ق.قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترىنىڭ ءبولىم مەڭگەرۋشىسى;
توقجانوۆ تولەپبەرگەن توراحمەت ۇلى – قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى ماراپاتتالدى.
«ەرەن ەڭبەگى ءۇشىن» مەدالىمەن اقپاسوۆا باتەش راحمەتجانقىزى – قازاقستان رەسپۋبليكاسىنىڭ ۇلتتىق مۋزەيىنىڭ قىزمەت باسشىسى;
بيسەنعاليەۆ مۇرات قۇمارعالي ۇلى – ا.جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنىڭ اعا وقىتۋشىسى;
جاباەۆا ءاليا شۇيىنشالىقىزى – اباي اتىنداعى قازاق ۇلتتىق وپەرا جانە بالەت تەاترى رەجيسسەردىڭ كومەكشىسى;
ومىربەكوۆا مارينا سەرگەەۆنا – اباي اتىنداعى قازاق ۇلتتىق وپەرا جانە بالەت تەاترى اككومپانياتور-كونتسەرتمەيستەرى ماراپاتتالدى.
«قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديريجەرى ايسىن جەكسەن قۋان ۇلىنا;
ا.جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنىڭ وقىتۋشىسى اقمولداەۆ سايان دوسماحامبەت ۇلىنا;
اباي اتىنداعى قازاق ۇلتتىق وپەرا جانە بالەت تەاترىنىڭ باس حورمەيستەرى تەمىربەكوۆا ءاليا جانابىلقىزىنا بەرىلدى.
