ەلگە كەلىپ, ەڭسەمىز تىكتەلدى

الىستا ءجۇر­گەن ادامعا اتامەكەننەن ىستىق جەر بولمايتىنى ايتپاسا دا تۇسىنىكتى. ءبىز باسىندا قاراقالپاقستاندا تۇرىپ جاتتىق. ەلىمىز ەگەمەندىك العان سوڭ-اق, اتا-انام ەدىل ايتىمبەتوۆ پەن قارلىعا ابدىعاليەۆا اتامەكەنگە قونىس اۋدارۋعا قامداندى. ءسويتىپ, ءتورت بالاسىمەن 2004 جىلى اتا-بابالارىنىڭ كىندىك قانى تامعان اقتوبە وڭىرىنە اتباسىن بۇرىپ, مۇعالجار اۋدانىنىڭ اقكەمەر اۋىلىنا تابان تىرەدىك. كۆوتا بويىنشا بولىنگەن قارجىعا ءۇي ساتىپ الىپ, «كوپپەن كورگەن ۇلى توي» دەگەندەي, تىرشىلىككە ارالاسىپ, ەلدەن قالماۋعا تالپىندىق. مەن وبلىس ورتالىعىنداعى «راۋان» كوللەدجىن كەدەن ءىسى ماماندىعى بويىنشا بىتىرگەننەن كەيىن ەكى جىلداي «يمك سەكيۋرتي» جشس-ىندە كۇزەتشى بولىپ جۇمىس ىستەدىم. اراسىندا وبلىس ورتالىعىنداعى جيھاز جيناۋ تسەحىندا جۇمىس ىستەپ, اعاش شەبەرلىگىنە دە توسەلىپ الدىم. ءسويتىپ, جيھاز جاساۋدىڭ قىر-سىرىن دا يگەردىم. بىرەۋگە تاۋەلدى بولعانشا اۋىلعا بارىپ, ءوز ءىسىمدى نەگە اشپاسقا دەگەن وي كەلدى قاپەرىمە. نارتاۋەكەل دەپ 2007 جىلى ءساۋىر ايىندا «ايتىمبەتوۆا.ع.ە.» جەكە كاسىپورىنىن اشىپ, تىركەۋدەن وتكىزدىم. «وقۋ ويدان ارتىق ەمەس» دەگەندەي, وسىلاي جيھاز جاساۋعا كىرىسىپ كەتتىم. قۇرال-جابدىعىمدى تۇگەندەپ, قاجەتتى ماتەريالدى اقتوبە قالاسىنان جەتكىزۋگە تۋرا كەلدى. ول ءۇشىن ارينە, كولىك كەرەك بولدى. بتا بانكى وبلىستىق فيليالىنان 600 مىڭ تەڭگە نەسيە الىپ, جيھاز قۇراستىرۋ ستانوگىن, قوراپتى «گازەل» اۆتوكولىگىن ساتىپ الدىم. جيھازدى باسىندا ىڭعايلاستىرىلعان ورىنداردا جينادىم. ءوز قولىمنان شىققان جيھازعا تاپسىرىس كوبەيە تۇسكەنىن اڭعارعان سوڭ ارنايى تسەح سالۋدى ويلاستىردىم. «قۇلاننىڭ قاسۋىنا, مىلتىقتىڭ باسۋى» دەگەندەي, وسى كەزدە مۇعالجار وڭىرىندە قارا التىن وندىرۋمەن اينالىساتىن رەسەيدىڭ «لۋكويل» كومپانياسى وسى وڭىردەگى اۋىلداردا ءوز ءىسىن اشۋعا ۇمىتكەرلەرگە «اراي» ارناۋلى باعدارلاماسىن جۇزەگە اسىرۋعا كىرىستى. ءبىر ەرەكشەلىگى, بۇل باعدارلاما بويىنشا بولىنەتىن گرانت وتەمسىز تەگىن بەرىلەتىن ەدى. ءوز بيزنەس-جوبامدى جاساپ, گرانتقا ىلىكتىم. گرانت بويىنشا قولىما تيگەن 1 ميلليون تەڭگەگە ءتاپ-ءتاۋىر جيھاز جيناۋ تسەحىن سالىپ الدىم. ءبىزدىڭ تسەحتا جينالعان جيھازداردىڭ دۇكەندەردەگىدەن ارتىق بولماسا, كەم تۇسپەيتىنىن اڭعارعان اۋىلداستارىم ات سابىلتىپ اقتوبەگە بارىپ, جيھاز اكەلۋدى قويدى. وسىندا تاپسىرىس بەرىپ, كىرەبەرىسكە, اس ۇيگە قوياتىن جيھازداردى, كومپيۋتەر ۇستەلى جانە باسقا جيھازداردى جاقىن جەردەن ۇيلەرىنە كىرگىزە قويۋعا داعدىلاندى. كورشى اۋىلداردان دا كەلىپ, الىپ جاتادى. ءبىر سوزبەن ايتقاندا, ءىسىم ءجۇردى, ەندى ءوندىرىستى كەڭەيتۋگە تۋرا كەلدى. «جۇمىسپەن قامتۋ-2020» باعدارلاماسى بويىنشا «بيزنەس-ناۆيگاتور» كاسىپكەرلىك ورتالىعىندا ءبىلىمىمدى كوتەرىپ, ارنايى كۋرستان ءوتتىم. وقۋى, جاتار ورنى مەن جولىن ۇكىمەت كوتەردى. قولىما ارنايى سەرتيفيكاتپەن بىرگە, وسى باعدارلامانىڭ ەكىنشى باعىتى بويىنشا 1 ميلليون تەڭگە نەسيەسى دە ءتيدى. بۇل قارجىعا قوسىمشا ماتەريال ساتىپ الىپ, ءوندىرىسىمدى كەڭەيتتىم. قازىر وسى شاعىن جيھاز تسەحىندا ءوزىم مەن ءىنىم نۇرىمنان باسقا اۋىلداستارىم – كەنەن بايسۇلتانوۆ, جاڭالىق ايماعامبەتوۆ ەڭبەك ەتەدى. ايلىقتارىمىز دا جامان ەمەس, 40-50 مىڭنان اينالادى. قاشاندا جاڭادان ءىس باستاۋ وڭاي ەمەس. مەن بۇل شارۋاعا ون ويلانىپ, مىڭ تولعانىپ بارىپ كىرىستىم. سونداي-اق, ماعان اتا-انام, باۋىرلارىمنىڭ قولداۋ كورسەتۋى دە كۇش بەردى. ەلباسى نۇرسۇلتان نازارباەۆتىڭ الەۋمەتتىك باعدار ۇستانعان سارا ساياساتىنىڭ ارقاسىندا قولعا العان ىسىمىزدە بەرەكەت تاپتىق دەسەم ارتىق ايتقاندىق بولماس. كاسىپكەرلىكتى, سونىڭ ىشىندە, اۋىلدا شاعىن جانە ورتا بيزنەستى دامىتۋعا باعىتتالعان باعدارلامالاردىڭ تيىمدىلىگى ءسوزسىز. مۇنداي مۇمكىندىكتى جالقاۋ, ەنجار ادام عانا پايدالانبايدى. «قولىمىزعا قارماق بەردى» عوي, ەندى سونىڭ يگىلىگىن كورۋ اركىمنىڭ ءوز ىنتا-ىقىلاسىنا بايلانىستى. ءبىز كوپتەگەن تۇرمىسقا قاجەتتى جيھازداردى قۇراستىرىپ, شىعارۋدى جولعا قويدىق. ءبىزدىڭ جيھازدارىمىز فيرمالىق ونىمدەردەن كەم تۇسپەيدى, ەسەسىنە ارزان, تاسىمالعا دا شىعىندانىپ جاتپايدى. سوندىقتان بولار سۇرانىس جوعارى, ونىڭ ۇستىنە ءبىز تۇتىنۋشىنىڭ تاپسىرىسى بويىنشا وزدەرىنىڭ تالعامىنا ساي ەتىپ دايىندايمىز. جيھازداردى سول ءۇيدىڭ الاڭىنا ساي كەلەتىندەي ەتىپ, تۇتىنۋشىمەن كەلىسە وتىرىپ جاسايمىز. بۇل دا تۇتىنۋشىلار كوڭىلىنەن شىعىپ تۇر. قازىر بانكتەن العان نەسيەلەرىمدى بىرتىندەپ قايتارا باستادىم. بولاشاقتا ديۆان, كرەسلو سياقتى جۇمساق جيھاز شىعارۋدى دا ويلاستىرۋدامىن. عالىم ايتىمبەتوۆ, كاسىپكەر. اقتوبە وبلىسى, مۇعالجار اۋدانى.