ۇلتتىق ستاتيستيكا بيۋروسىنىڭ مالىمەتىنە قاراعاندا, وتكەن جىلدىڭ سوڭىندا ەلىمىزدەگى جاستاردىڭ 7,1 پايىزى, نەمەسە 379,3 مىڭ قىز بەن جىگىت NEET ساناتىنا جاتقىزىلعان. مەملەكەت باسشىسىنىڭ تاپسىرماسىنا سايكەس 2029 جىلعا قاراي NEET ساناتىنداعى جاستار ۇلەسىن 3,5 پايىزعا دەيىن, ياعني ەكى ەسە ازايتۋ كوزدەلىپ وتىر.
وسى مىندەتتى ورىنداۋ ماقساتىندا استانا قالاسىنىڭ اكىمدىگى بىلتىر 2023-2026 جىلدارعا ارنالعان «Joltap» الەۋمەتتىك جوباسىن ازىرلەپ, قاناتقاقتى رەجىمدە ىسكە اسىرا باستادى. سول ءۇشىن وتكەن جىلعى 26 مامىردا «جاڭا مۇمكىندىك» قوعامدىق قورى قۇرىلىپ, وعان ەلوردانىڭ ساۋدا, قۇرىلىس, قوعامدىق تاماقتاندىرۋ, كولىك جانە باسقا قىزمەت كورسەتۋ سالالارىنداعى كوشباسشى كاسىپورىندار قارجى اۋدارىپ, دەمەۋشىلىك جاسادى.
اتالعان قور قىزمەتكەرلەرى مەگاپوليستە جۇمىسسىز جۇرگەن جانە اۋىلدى جەرلەردەن كوشىپ كەلگەن جاستاردى انىقتاپ, ولاردى پراكتيكالىق داعدىلارعا وقىتىپ, جۇمىسقا ورنالاستىرۋعا جانە شاعىن بيزنەس اشۋلارىنا كومەكتەسەدى. بۇل رەتتە دەمەۋشىلىك كورسەتكەن سەرىكتەس كاسىپورىندار جۇمىسشى ماماندىقتارى بويىنشا ءوز تالاپتارى مەن ستاندارتتارى ەسكەرىلگەن قىسقا مەرزىمدى وقىتۋ باعدارلامالارىن ازىرلەۋگە مۇددەلىلىكپەن اتسالىسقان.
سۋرەتتى تۇسىرگەن – ەرلان ومار, «EQ»
بۇگىندە ەلوردانىڭ ادامدار كوپ جينالاتىن ورىندارى – «ازيا پارك» ساۋدا-ويىن ساۋىق ورتالىعىندا, «ايلاند» وتباسىلىق دەمالىس ورتالىعىندا, «تۇلپار», «ۆسترەچا», «مەچتا», «Euromall», «راحمەت 1», «راحمەت 2» ساۋدا ۇيلەرىندە, «جانۇيا» وتباسىلاردى قولداۋ ورتالىعىندا, «جاستار» سارايىندا جانە ەڭبەك موبيلدىلىگى ورتالىعىندا ورناتىلعان 11 «بارشاعا مۇمكىندىك» ءمودۋلدى بەكەتى كۇن سايىن ساعات 10.00-دەن 19.00-گە دەيىن تەگىن قىزمەت كورسەتەدى. ولاردا 20 كونسۋلتانت كەستەگە سايكەس جۇمىس ىستەپ ءجۇر.
جۇمىسقا ورنالاسۋعا جانە كاسىپ ۇيرەنۋگە ءوتىنىش بىلدىرگەن جاستار مەن وزگە دە ازاماتتارعا نەگىزگى ءۇش باعىت بويىنشا كومەك كورسەتىلەدى. بىرىنشىدەن, ولار ەلورداداعى 30-دان استام ساۋدا, قوعامدىق تاماقتانۋ, قىزمەت كورسەتۋ سالالارىنداعى سەرىكتەس كومپانيالارعا تىكەلەي جۇمىسقا ورنالاستىرىلادى. سونىمەن بىرگە جۇمىس بەرۋشىلەرگە جۇمىسقا قابىلدانۋشى جاستارعا تولەنەتىن جالاقىنى ارتتىرۋ دا ۇسىنىلادى. ماسەلەن, Magnum جەلىسى وسىنداي ۇسىنىستى قابىل الىپ, جۇمىسكەرلەر جالاقىسىن 115 مىڭ تەڭگەدەن 215 مىڭ تەڭگەگە دەيىن كوبەيتكەن.
ەكىنشىدەن, جاڭادان اشىلعان بىرىڭعاي «Jumys tap» تelegram-بوتى ارقىلى جۇمىسشى ماماندىقتار بويىنشا بوس ورىندارعا جۇمىسقا ورنالاستىرۋ جۇرگىزىلەدى. وندا قالانىڭ جۇمىس بەرۋشىلەرىنىڭ نەگىزگى سەرۆيستىك قىزمەتتەرى – ساۋدا, قوعامدىق تاماقتانۋ, قۇرىلىس, قىزمەت كورسەتۋ جانە باسقا سالالار بويىنشا بارلىق بوس ورىندار كورسەتىلگەن. بۇل جۇمىس بەرۋشىنىڭ جۇمىس ىزدەۋشىمەن دەلدالسىز تىكەلەي بايلانىس ورناتۋىنا مۇمكىندىك بەرىپ وتىر. بيىلعى ءساۋىر ايىنا دەيىن اتالعان تelegram-بوتتا 7629 جۇمىس ىزدەۋشى مەن 601 جۇمىس بەرۋشى تىركەلىپ, 1040 ادام بوس جۇمىس ورىندارىنا ورنالاستىرىلعان.
ۇشىنشىدەن, جاڭا كاسىپ ۇيرەنگىسى كەلگەن جاستار قىسقامەرزىمدى وقۋ كۋرستارىنا جىبەرىلەدى. ولاردىڭ كاسىبي داعدىلاردى تەز مەڭگەرۋلەرى ءۇشىن وقۋ باعدارلاماسىنىڭ 80 پايىزى پراكتيكالىق ءىس-شارالارعا ارنالعان. مۇنداي وقىتۋ ەكى باعدارلاما بويىنشا ۇيىمداستىرىلعان. ءبىرىنشىسى – قوعامدىق تاماقتانۋدىڭ امبەباپ قىزمەتكەرى, تىگىنشى, مودەلەر-قۇراستىرۋشى, دانەكەرلەۋشى, ساتۋشى-كاسسير, بارشى سياقتى جۇمىسشى ماماندىقتار بويىنشا. ەكىنشىسى – تارگەتولوگ, موبيلوگراف, سايت جاساۋشى, الەۋمەتتىك مەديا ماركەتينگ مەنەدجەرى, گرافيكالىق ديزاينشى, ماركەتپلەيستەر, بەينەمونتاج جاساۋشى سياقتى زاماناۋي ماماندىقتاردى مەڭگەرۋگە ارنالعان «Freelance مۇمكىندىك» تسيفرلىق داعدىلار باعدارلاماسى. اتالعان وقىتۋ باعدارلامالارىمەن 1769 ادام قامتىلعان.
«Joltap» الەۋمەتتىك جوباسى ىسكە قوسىلعان بىلتىرعى قىركۇيەك ايىنان بەرى 8,5 مىڭنان استام ازاماتقا تەگىن قىزمەت كورسەتىلگەن, ولاردىڭ 56 پايىزى – جۇمىسسىزدار, 33 پايىزى – جالدامالى جۇمىسكەرلەر, 11 پايىزى – ءوزىن ءوزى جۇمىسپەن قامتىعاندار. جوباعا قاتىسقانداردىڭ كوپشىلىگى – تۇراقتى كىرىسى جوق جانە شامادان تىس نەسيە العان ادامدار. وسى باعدارلامانىڭ كومەگىمەن ەلوردانىڭ 1,2 مىڭ تۇرعىنى جۇمىسقا ورنالاسقان. ولاردىڭ 52 پايىزى – 35 جاسقا دەيىنگى جاستار. ارالارىندا اۋىلدى جەرلەردەن جۇمىس ىزدەپ كەلگەن قىز-جىگىتتەر دە از ەمەس. سەبەبى, جىل سايىن وڭىرلەردەن استاناعا قونىس اۋدارىپ جاتقان 30 مىڭنان استام ادامنىڭ كوپشىلىگى – ماماندىعى مەن جۇمىس تəجىريبەسى جوق جاستار. ولار, نەگىزىنەن, مەگاپوليستەگى قۇرىلىس الاڭدارى مەن بازارلاردا جالاقىسى تومەن قارا جۇمىستارمەن اينالىسىپ, نəپاقا تاۋىپ ءجۇر.
جۋىردا پارلامەنت ءماجىلىسىنىڭ «اۋىل» پارتياسىنان سايلانعان ءبىر توپ دەپۋتاتى اۋىلداردان قالالارعا ۇدەرە كوشىپ كەتىپ جاتقان اۋىل جاستارىن جۇمىسپەن قامتۋ ماسەلەسىنىڭ وزەكتىلىگى تۋرالى ۇكىمەتكە دەپۋتاتتىق ساۋال جولدادى. وندا بىلتىر ۇكىمەت وتىرىسىندا وبلىستاردىڭ əكىمدىكتەرىنە استانا قالاسىندا قولعا الىنعان «Joltap» قاناتقاقتى جوباسىن زەردەلەپ, قولدانۋعا تاپسىرما بەرىلگەنىمەن, ارادا جارتى جىل ۋاقىت وتسە دە, وڭىرلەردە وعان جەتە ءمان بەرىلمەي, جاستار اراسىنداعى جۇمىسسىزدىقتى ازايتۋدىڭ ءتيىمدى تاسىلدەرى ءالى قولعا الىنباي وتىرعاندىعى سىنعا الىنعان. وسىعان وراي, پرەمەر-مينيستر ولجاس بەكتەنوۆ حالىق قالاۋلىلارىنا بەرگەن رەسمي جاۋابىندا «Joltap» جوباسى بارلىق وڭىردە وسى جىلدىڭ 1 مامىرىنان باستاپ ىسكە اسىرىلا باستايتىندىعىن مالىمدەدى.
