مۋزەي ىشىندەگى جادىگەرلەر قاتارىندا ايگىلى قولباسشى ي.پانفيلوۆتىڭ قىزى ۆ.پانفيلوۆا ارنايى تابىستاعان زاتتار دا بارشىلىق. كەڭەس وداعىنىڭ باتىرىنا تيەسىلى قۇجاتتار دا وسىندا تۇر. ودان وزگە دە تاريحي مۇرالار جەتىپ ارتىلادى.
مۇنداعى جادىگەرلەردىڭ ىشىندە نەمىس تانكىسىنەن ج ۇلىپ الىنعان اينا تۇر. دەرەككە سەنسەك, تچە-31 جامبىل دەپوسىنىڭ ءماشينيسى ۆ.زاحاروۆ سۇراپىل سوعىس كەزىندەگى شابۋىلداردىڭ بىرىندە ەپتىلىك تانىتىپ, اينانى نەمىس تانكىسىنەن ج ۇلىپ العان. مۋزەي قىزمەتكەرلەرىنىڭ ايتۋىنشا, ايناعا «ۆەرماحت» بەلگىسى سىزىلعان.
جاۋ تانكىسىنىڭ ايناسىن قولعا تۇسىرگەن ۆالەنتين زاحاروۆ سوعىس جىلدارىندا برونوترانسپورتەر, ياعني تانككە قارسى قولدانىلاتىن قارۋلار روتاسىنا كوماندير بولعان ەكەن. سوعىس كەزىندە كوپتەگەن وپەراتسياعا قاتىسقان. مايدان دالاسىنان ورالعاننان كەيىن ول نەمىس تانكىسىنەن العان اينانى جۇك قورجىنىنا سالىپ جۇرگەن كورىنەدى. كەيىننەن لوكوموتيۆ دەپوسىندا مۋزەي اشىلعان كەزدە ارنايى تاپسىرىپتى.
قۇندى جادىگەرلەر ورداسىنا اينالعان مۋزەي مەڭگەرۋشىسى ۆەنەرا بوكەنوۆانىڭ ايتۋىنشا, عاسىرلىق تاريحى بار دەپونىڭ مۋزەيىنە 51 جىل تولعان ەكەن. ال بولىمشەدەگى مۋزەي جۇمىسى بىرنەشە جىل بۇرىن جاندانا تۇسكەن كورىنەدى.
«لوكوموتيۆ دەپوسىنداعى مۋزەي – ەلىمىزدەگى ەڭ كونە مۇراجايلاردىڭ ءبىرى. مۇندا كوپتەگەن تاريحي جادىگەر ساقتالعان», دەيدى ول.
تاراز
