كەزدەسۋگە بانك, ينۆەستيتسيالىق, وندىرىستىك, ونەركاسىپتىك جانە قۇرىلىس كومپانيالارى مەن جەتەكشى ساۋدا جەلىلەرىنىڭ وكىلدەرى قاتىستى. وتاندىق ينۆەستورلار ۋنيۆەرسيتەت عالىمدارىنىڭ قۇرىلىس جانە قۇرىلىس ماتەريالدارىن ءوندىرۋ سالاسىنداعى عىلىمي جەتىستىكتەرىمەن, يننوۆاتسيالىق جوبالارىمەن تانىستى.
ەۋرازيا ۋنيۆەرسيتەتىنىڭ باسقارما توراعاسى – رەكتورى ەرلان سىدىقوۆتىڭ ايتۋىنشا, ENU INVEST MEETUP جوباسى عالىمداردىڭ ونەرتابىسىن تانىستىرۋمەن قاتار ينۆەستورلارمەن ۇزاقمەرزىمدى بايلانىس ورناتۋعا, جاڭا جوبالاردى ۇيلەستىرۋگە جول اشادى.
ء«بىز بۇگىن ينۆەستورلارعا عالىمدارىمىزدىڭ بىرەگەي ازىرلەمەلەرىن پايدالانۋعا مۇمكىندىك بەردىك. بۇگىندە بيزنەستىڭ جاڭا تەحنولوگيالىق شەشىمدەردى ازىرلەۋگە جانە ەنگىزۋگە قىزىعۋشىلىعى ارتىپ كەلەدى. بۇل باعىتتا ۋنيۆەرسيتەت كومپانيالارمەن سەرىكتەستىكتى كەڭەيتتى. ءبىزدىڭ عالىمدار ولاردىڭ سۇرانىسى بويىنشا زەرتتەۋلەر جۇرگىزەدى. پرەزيدەنت تاپسىرماسى بويىنشا مەملەكەتتىك-جەكەمەنشىك ارىپتەستىك تەتىكتەرى قۇرىلدى. ينۆەستورلار ستۋدەنتتەر ءۇيىنىڭ قۇرىلىسىنا دا قىزىعۋشىلىق تانىتىپ وتىر. وسىنىڭ ەسەسىنە ۋنيۆەرسيتەت كەلەر جىلى ستۋدەنتتەردىڭ جاتاقحاناعا قاجەتتىلىگىن تولىق جابادى دەپ وتىرمىز», دەدى ە. سىدىقوۆ كەزدەسۋ بارىسىندا.
وسى كۇنى ۋنيۆەرسيتەت باسشىلىعى ينۆەستورلارمەن قۇنى 20 ملرد تەڭگە بولاتىن 4 كەلىسىمشارتقا قول قويعان. مىسالى, كەلىسىم بويىنشا ەلدەگى ەكى كومپانيا 3 مىڭ ورىندىق ستۋدەنتتەر ءۇيىن سالۋعا قارجى اۋداراتىن بولدى. بۇدان بولەك تاعى ەكى كومپانيا ۋنيۆەرسيتەت ستۋدەنتتەرىنە جاتاقحانا سالۋعا قىزىعۋشىلىق تانىتقان.
باسشىلىق ستۋدەنتتەرگە ارنالعان مەديتسينالىق ورتالىعى بار الەۋمەتتىك-مادەني كەشەن سالۋ بويىنشا «Astana clinic» كومپانياسىمەن كەلىسىم جاسادى. كوپ ۇزاماي سالىنىپ, پايدالانۋعا بەرىلەتىن ەمحانادا ستۋدەنتتەر مەديتسينالىق قىزمەتتەردى تەگىن الادى ەكەن. باسقوسۋدا ENU LAB عىلىمي-وندىرىستىك ورتالىعىنىڭ عالىمدارى كوپقاباتتى ۇيلەردەگى دىبىستى وقشاۋلاۋ ماسەلەسىن شەشۋگە مۇمكىندىك بەرەتىن يننوۆاتسيالىق تەحنولوگيالارىن تانىستىردى. ۋنيۆەرسيتەتتىڭ يننوۆاتسيالاردى دامىتۋ دەپارتامەنتىنىڭ ديرەكتورى اسەل جەكسەمباەۆا اسفالتبەتوننىڭ ساپاسىن ارتتىرۋعا سەپتەسەتىن تەحنولوگيا تۋراسىندا بايانداسا, اقپاراتتىق تەحنولوگيالار فاكۋلتەتىنىڭ دوتسەنتى ماقپال جارتىباەۆا سۋ قويمالارىنىڭ تاسقىنعا دەيىنگى جانە تاسقىنىنان كەيىنگى كەزەڭدەرىن باقىلاۋعا ارنالعان بىرەگەي روبوتوتەحنيكالىق كەشەنىن تانىستىردى.
ۋنيۆەرسيتەتتىڭ اقپاراتتىق تەحنولوگيالار فاكۋلتەتى كافەدراسىنىڭ اعا وقىتۋشىسى نۇرزادا امانگەلدى بيزنەس وكىلدەرىنە جاڭا زياتكەرلىك جۇيەنى ۇسىندى. بۇل تەحنولوگيانىڭ ارتىقشىلىعى – وندىرىستىك كاسىپورىنداردا ناقتى ۋاقىت رەجىمىندە مونيتورينگ جۇرگىزۋگە, قىزمەتكەرلەردىڭ قاۋىپسىزدىك نورمالارىن باعالاۋعا سونداي-اق كەز كەلگەن بۇزۋشىلىقتار تۋرالى دەر-كەزىندە ەسكەرتۋگە مۇمكىندىك بەرەدى.
