فوتو: senate.parlam.kz
سەناتوردىڭ جازۋىنشا, اتالعان ماڭىزدى زاڭنىڭ نەگىزگى تۇستارى مىنالار:
- كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستار ءۇشىن سوتتالعان شەتەلدىكتەرگە قازاقستان رەسپۋبليكاسىنا كىرۋدى جانە ەلدىڭ ازاماتتىعىن الۋدى شەكتەۋ;
- ەكسترەميستىك نەمەسە تەرروريستىك ارەكەتتەرگە قاتىستىلىعى بار شەتەلدىكتەردىڭ ەلگە كىرۋىنە تىيىم سالۋ;
- كوشى-قون سالاسىنداعى زاڭنامانىڭ ساقتالۋىنا مەملەكەتتىك باقىلاۋدى جۇزەگە اسىرۋ ءتارتىبىن ايقىنداۋ;
- ەگەر جەكە باسىن كۋالاندىراتىن قۇجاتتاردى جانە قولدانىلۋ مەرزىمى وتكەن باسقا قۇجاتتاردى ۇزارتۋ نەمەسە اۋىستىرۋ مۇمكىندىگى بولماسا, ولاردى توتەنشە جاعدايلاردا پايدالانۋ ماسەلەسىن رەتتەۋ. مۇنداي قۇجاتتار قولدانىلۋ مەرزىمىنە قاراماستان جارامدى دەپ تانىلادى;
- قوس ازاماتتىقتى بولعىزباۋ ماقساتىندا قازاقستان ازاماتتىعىن العاننان كەيىن باسقا مەملەكەتتىڭ ازاماتتىعىن راستايتىن قۇجاتتاردى پايدالانعان جاعدايدا قر-نىڭ ازاماتتىعىن جوعالتۋدىڭ جاڭا نەگىزى ەنگىزىلدى.
«سونىمەن بىرگە زاڭدا قر-نىڭ ۇكىمەتى ايقىنداعان وڭىرلەرگە قونىس اۋدارۋشىلار ءۇشىن اۋىل شارۋاشىلىعى ماقساتىنداعى جەر ۋچاسكەلەرىن الۋعا جاعداي جاساۋعا باعىتتالعان تۇزەتۋلەر ۇسىنىلدى. وسى زاڭعا سايكەس, قونىس اۋدارۋشىلارعا ۇكىمەت ايقىنداعان وڭىرلەردە شارۋا نەمەسە فەرمەر قوجالىعىن جۇرگىزۋ ءۇشىن جەر ۋچاسكەلەرى كونكۋرستان تىس تارتىپپەن 5 جىلعا دەيىنگى مەرزىمگە ۋاقىتشا قىسقا مەرزىمدى اقىلى جەر پايدالانۋ (جالعا الۋ) قۇقىعىمەن بەرىلەتىن بولادى», دەپ جازدى سەنات دەپۋتاتى.
امانگەلدى تولاميسوۆتىڭ سوزىنشە, ەرىكتى قونىس اۋدارعان ادامدارعا جانە ولاردىڭ وتباسى مۇشەلەرىنە بيۋدجەت قاراجاتى ەسەبىنەن كوشۋگە, تۇرعىن ءۇيدى جالداۋعا جانە كوممۋنالدىق قىزمەتتەردى تولەۋگە, تۇرعىن ءۇيدى ساتىپ الۋعا تولەنەتىن سۋبسيديالاردى بانكتەر مەن باسقا دا قارجى ۇيىمدارى الدىنداعى كرەديتتىك مىندەتتەمەلەرى بويىنشا ءوندىرىپ الۋدان قورعاۋعا باعىتتالعان نورمالار بەكىتىلەدى. اتاپ ايتقاندا, اتالعان ماتەريالدىق كومەكتى پايدالانۋدا تىيىم سالىنبايدى جانە وزگە دە شەكتەۋلەر قويىلمايدى.
«زاڭمەن قانداس مارتەبەسىن جانە قازاقستان ازاماتتىعىن جەڭىلدەتىلگەن تارتىپپەن الۋعا ۇمىتكەرلەردىڭ جەكە باسىن كۋالاندىراتىن نەمەسە ۇلتىن راستايتىن باسقا دا قۇجاتتاردا ءتيىستى جازبا بولماعان جاعدايلاردا, ونى ايقىنداۋ ءراسىمىن جەتىلدىرۋگە باعىتتالعان تۇزەتۋلەر ۇسىنىلادى. اتاپ ايتقاندا, ەڭبەك جانە حالىقتى الەۋمەتتىك قورعاۋ مينيسترلىگىنە ۇلتى قازاق ەكەنىن ايقىنداۋ ەرەجەسىن ازىرلەۋ جانە بەكىتۋ جونىندەگى وكىلەتتىگى بەكىتىلەدى. وسى ماسەلە بويىنشا شەشىمدى جەرگىلىكتى اتقارۋشى ورگان ۇلتى قازاق ەكەنى تۋرالى ماسەلەلەردى قاراۋ جونىندەگى كوميسسيا قۇرۋ ارقىلى قابىلدايدى», دەپ جازدى ا.تولاميسوۆ.
سونداي-اق سەنات دەپۋتاتى اتالعان ماڭىزدى زاڭدا قىلمىستىق-اتقارۋ جۇيەسى مەكەمەلەرىندە بەينەباقىلاۋ جۇيەسىنىڭ كومپونەنتىن قاساقانا جويعانى نەمەسە بۇلدىرگەنى ءۇشىن قىلمىستىق جاۋاپتىلىق ەنگىزىلەتىنىن اتاپ وتكەن.
«قورىتىندىلاي كەلە, بۇل زاڭ ۇلتتىق جانە قوعامدىق قاۋىپسىزدىك ماسەلەلەرىن قامتاماسىز ەتۋگە, كوشى-قون سالاسىنداعى مەملەكەتتىك رەتتەۋدىڭ تيىمدىلىگىن ارتتىرۋعا, ءتيىمدى كوشى-قون باقىلاۋىن قامتاماسىز ەتۋگە, قونىس اۋدارۋشىلارعا مەملەكەتتىك قولداۋ كورسەتۋگە باعىتتالعان», دەپ تۇيىندەدى سەناتور.
