پرەزيدەنت قاسىم-جومارت توقاەۆ پەن قحر توراعاسى سي تسزينپين ۇكىمەتتەر الدىنا تاۋار اينالىمىن 100 ملرد دوللارعا دەيىن جەتكىزۋ مىندەتىن قويعان بولاتىن. اۋىل شارۋاشىلىعى سالاسىنداعى ءوزارا ءىس-قيمىلدى ارتتىرۋ كەلەشەگى قارالدى. ءبىر جىل ىشىندە اگروونەركاسىپ (اوك) كەشەنى ءونىمىنىڭ تاۋار اينالىمى 1,7 ەسە ءوسىپ, وسى جىلدىڭ ءبىرىنشى توقسانىندا بۇل كورسەتكىش تاعى 6%-عا ارتتى. بۇل رەتتە وتاندىق اۋىل شارۋاشىلىعى تاۋارلارىنىڭ قىتايعا ەكسپورتى ءبىر جىل ىشىندە 84%-عا ءوستى.
ولجاس بەكتەنوۆ قازاقستاننىڭ قىتاي نارىعىنا ورگانيكالىق جانە ەكولوگيالىق تازا اۋىل شارۋاشىلىعى ونىمدەرىن جەتكىزۋ كولەمىن ارتتىرۋعا دايىن ەكەنىن اتاپ ءوتتى. بۇعان قىتاي تاراپىنان ەلىمىزدەن ەت جانە قۇس ونىمدەرىن اكەلۋگە قويىلعان شەكتەۋلەردىڭ بىرتىندەپ الىنىپ تاستالۋى وڭ سەرپىن بەرەدى. اوك سالاسىندا تەرەڭ وڭدەۋ بويىنشا بىرلەسكەن جوبالاردى قۇرۋ باسىم باعىت رەتىندە بەلگىلەندى.
ليۋ گوچجۋن قحر-دىڭ جاساندى ينتەللەكت, ەلەكتروندى كوممەرتسيا, سپۋتنيكتىك بايلانىس جانە «جاسىل» ەنەرگەتيكانى دامىتۋ سالاسىنداعى ىنتىماقتاستىقتى ارتتىرۋعا دەگەن نيەتىن جەتكىزدى.
تالقىلاۋ بارىسىندا ترانزيتتىك-كولىك سالاسىنداعى ىنتىماقتاستىققا, جاڭا سەرپىندى ينۆەستيتسيالىق جوبالار ارقىلى يندۋستريالىق-ينۆەستيتسيالىق ءوزارا ءىس-قيمىلدى كەڭەيتۋگە (بۇگىنگى تاڭدا جالپى سوماسى 14,5 ملرد دوللار بولاتىن 45 بىرلەسكەن جوبا ىسكە اسىرىلىپ جاتىر), سونداي-اق وڭىرارالىق ءارى مادەني-گۋمانيتارلىق قاتىناستارعا نازار اۋدارىلدى.
«قازاقستاننىڭ قىتايداعى تۋريزم جىلى» اياسىنداعى ءىس-شارالار ەكى ەلدىڭ تۋريستىك الەۋەتىنىڭ ارتا تۇسۋىنە ىقپال ەتپەك. قازاقستان-قىتاي ۇكىمەتارالىق كەلىسسوزدەرى ەكى مەملەكەت باسشىلارى اراسىندا قول جەتكىزىلگەن بارلىق ۋاعدالاستىقتاردى جۇزەگە اسىرۋ ءۇشىن سالالىق دەڭگەيدە جالعاسىپ جاتىر.
