كەرەمەت سوپرانو انشىلەر – قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق پەن «قۇرمەت» وردەنىنىڭ كاۆالەرى ايزادا قاپونوۆا, قۋاتتى ءارى جارقىن مەتستسو-سوپرانو داۋىسىنىڭ يەسى سالتانات مۇراتبەكوۆا, سونداي-اق دارىندى تەنور ەرۇلان كامەل مەن باريتون ازات مالىك تىڭدارماندارعا جان تەبىرەنتەرلىك ەموتسيالارعا تولى كەرەمەت كەشتى تارتۋ ەتتى.
ءتۇرلى مۋزىكالىق مادەني داستۇرلەرگە تيەسىلى وپەرالاردان اريالار مەن كورىنىستەردىڭ اۋەنى كونتسەرتمەيستەر جانار احمەتوۆانىڭ سۇيەمەلدەۋىندە كورەرمەندەردىڭ جۇرەگىنە جەتتى. قازاقستاندىق تۋىندىلاردان باستاپ باتىس ەۋروپالىق كومپوزيتسيالارعا دەيىن ءاربىر اريا شاعىن سپەكتاكل ءتارىزدى بولىپ, تىڭدارمانداردىڭ كوز الدىندا قۇشتارلىق, تراگەديا مەن ماحاببات الەمىن جانداندىردى.
ء«بىز كونتسەرت باعدارلاماسىنا تەاترىمىزدىڭ رەپەرتۋارىندا جوق قازاق وپەرالارىنان اريالاردى قوستىق. ولاردىڭ قاتارىندا نۇرعيسا تىلەنديەۆتىڭ «التىن تاۋلار», سىدىق مۇحامەدجانوۆتىڭ «ايسۇلۋ» شىعارمالارى بار. سونداي-اق باسقا دا وپەرا جاۋھارلارى شىرقالدى. ماسەلەن, ايزادا قاپونوۆا م.گلينكانىڭ الەمدىك مۋزىكالىق بەستسەللەرگە اينالعان «رۋسلان مەن ليۋدميلا» وپەراسىنان ليۋدميلانىڭ كاۆاتيناسىن ۇسىندى. ونى ورىنداۋ ءۇشىن ءان ايتۋدىڭ جوعارى تەحنيكاسى بولۋى قاجەت. مەنىڭشە, ايزادا قاپونوۆاعا ەرتەگى الەمى كەيىپكەرىنىڭ بەينەسى وتە جاراسادى. بيبىگۇل جانۇزاق دج.ءپۋچچينيدىڭ «دجانني سكيككي» وپەراسىنان لاۋرەتتانىڭ ارياسىن شەبەر جەتكىزە ءبىلدى. بۇل – وتە اسەرلى اريا, جاساۋى بولماعاندىقتان, ول قوسىلا الماعان سۇيىكتىسى رينۋچچوعا دەگەن ماحابباتى تۋرالى اكەسىنە اندەتىپ سىر اشادى, – دەدى جانار احمەتوۆا.
«ايگىلى وپەرا اريالارى» كەشى مۋزىكالىق ونەر كورسەتۋ عانا ەمەس, سونداي-اق رەكۆيزيتتەر مەن اكتەرلىك ويىن قولدانىلىپ, سوڭى تىڭدارماندارمەن سىرلاسۋعا ۇلاسقان ناعىز تەاترلىق قويىلىم بولدى دەسەك, ارتىق ايتقانىمىز ەمەس. ونەرسۇيەر قاۋىم وپەرالىق ساحنا اتموسفەراسىنا ەنىپ, كەيىپكەرلەردىڭ ەموتسيالارىن سەزىندى جانە ولاردىڭ تاعدىرىن باستان وتكەرگەندەي كۇي كەشتى.
مازمۇندى مۋزىكا كەشى اسقاق كلاسسيكا الەمىنە بويلاۋعا جانە كاسىبي ورىنداۋشىلاردىڭ قايتالانباس شەبەرلىكتەرىنەن ءلاززات الۋعا دايىن جاندار ءۇشىن تاماشا تارتۋ بولعانى ءسوزسىز.
