اۋىل شارۋاشىلىعى مينيسترلىگى شەگىرتكەمەن كۇرەسكە درونداردى قولدانۋ جولىن قاراستىرىپ جاتىر. وڭىرگە جۇمىس ساپارىمەن كەلگەن اۋىل شارۋاشىلىعى ءمينيسترى ايداربەك ساپاروۆ وبلىس اكىمى دارحان ساتىبالدىمەن بىرگە ءۇيىرلى شەگىرتكەگە قارسى كۇرەس جۇمىستارىن جۇرگىزىپ جاتقان مەردىگەرلەرمەن, كەلەس جانە سارىاعاش اۋدانىنىڭ تۇرعىندارىمەن كەزدەستى. فيتوسانيتارلىق ءىس-شارالاردىڭ جۇرگىزىلۋىنە 100-گە جۋىق تەحنيكا جۇمىلدىرىلادى. مينيستر مەردىگەرلەرگە كۇرەستى كۇشەيتۋدى, وڭدەۋدى دەر كەزىندە اياقتاۋدى جانە تەحنيكا سانىن ارتتىرۋدى تاپسىردى.
ال «EAVISION Robotics Technologies» كومپانياسىنىڭ ۆيتسە-پرەزيدەنتىمەن بىرگە زيانكەستەرمەن زاماناۋي كۇرەس, اتاپ ايتقاندا, درونداردى پايدالانا وتىرىپ, جاندىكتەردى انىقتاۋ اۋماقتارىنىڭ مونيتورينگىن ەنگىزۋ جولى تالقىلاندى. بۇل بولاشاقتا جەردى فيتوسانيتارلىق وڭدەۋدى دالىرەك جۇرگىزۋگە مۇمكىندىك بەرەتىنى ايتىلدى. ماروككو شەگىرتكەلەرىمەن كۇرەسۋدىڭ وزىق تاجىريبەسى شەتەلدە قولدانىلىپ ءجۇر. اتالعان كومپانيا الماتى قالاسىندا قىتاي ينۆەستورلارىنىڭ قولداۋىمەن بىرلەسكەن زەرتحانا اشقان.
وسى ورايدا مينيستر بيىل تۋىنداۋى مۇمكىن قيىندىقتاردى دا اتاپ ءوتتى. اتاپ ايتقاندا, 2024 جىل شەگىرتكەنىڭ تابيعي تسيكلىنىڭ شىڭى بولماق جانە قۇرعاقشىلىققا اكەلۋى مۇمكىن قالىپتان تىس جوعارى تەمپەراتۋرا بولجانادى.
ء«بىز قۇرعاقشىلىق بولجامدارىنا نازار اۋدارۋىمىز كەرەك. كليماتتىڭ وزگەرۋىنە بەيىمدەلۋ ءۇشىن شۇعىل شارالار دا, ۇزاقمەرزىمدى ستراتەگيالار دا كەرەك. قاجەت بولسا, قۇرعاقشىلىققا ءتوزىمدى سورتتارعا كوشۋدى, اۋىسپالى ەگىستەردى وزگەرتۋدى جانە باسقا دا شارالاردى قامتاماسىز ەتكەن ءجون», دەدى ا.ساپاروۆ.
قازىرگى ۋاقىتتا تۇركىستان وبلىسىنىڭ اۋماعىندا ماروككو شەگىرتكەسىنە قارسى كۇرەس بويىنشا ءىس-شارالار جۇرگىزىلىپ جاتىر. بيىلعى 25 ساۋىردەگى مالىمەتكە قاراعاندا, ماروككولىق شەگىرتكە دەرناسىلدەرى بويىنشا 252 مىڭ گەكتار تەكسەرىلگەن, 85 مىڭ گەكتار القاپ وڭدەلۋگە جاتادى. ال وڭدەلگەنى – 55 مىڭ گەكتار. سونداي-اق شەكارالىق اۋماقتاردا شەگىرتكە تۇقىمداستارعا قاتىستى جاعداي ۇنەمى قاداعالانىپ وتىر. شەگىرتكەلەردىڭ ىرگەلەس اۋماقتارعا كوشۋىنە جول بەرمەۋ جانە شەكارا ماڭىنداعى وبلىستاردا قيىندىقتاردى بولدىرماۋ ماقساتىندا شەكارا ماڭىنداعى اۋماقتا بىرلەسكەن مونيتورينگتىك جۇمىستاردىڭ جوسپارلارى جاسالادى. قازىرگى ۋاقىتتا وزبەكستان ماماندارىمەن بىرلەسكەن تەكسەرۋلەر جۇرگىزىلىپ جاتىر. ا.ساپاروۆ اۋماقتىق ينسپەكتسيالاردى زيانكەستەرگە قارسى ساپالى وڭدەۋ قۇرالدارىمەن قامتاماسىز ەتۋدى جانە ونى وڭتايلى مەرزىمدە جاساۋدى تاپسىردى.
دروندار مەن وزدىگىنەن باسقارىلاتىن قۇرىلعىلاردى قولدانۋمەن قازاق-قىتاي بىرلەسكەن كاسىپورنى اينالىسىپ كەلەدى. روبوتتەحنيكانىڭ كومەگىن كورشى وڭىرلەردە دالا جۇمىستارىندا دا پايدالانا باستاعان. وسىلايشا, وزىق تەحنولوگيالار كومەگىمەن شارۋالاردىڭ جۇمىسىن جەڭىلدەتۋگە مۇمكىندىك مول. قىتاي ينۆەستورلارى وكىلدەرىنىڭ قاتىسۋىمەن اۋىل شارۋاشىلىعى سالاسىنا روبوتتەحنيكانى ەنگىزۋ ۇلكەن سۇرانىسقا يە. دروندار تەحنيكا بارا المايتىن, ادام اياعى جەتە بەرمەيتىن قۇم, وزەن القابى سەكىلدى جەرلەردى زيانكەستەردەن وڭاي ارىلتادى. بۇل قۇرىلعىلار الدىن الا بارلاۋ ناتيجەسىمەن, GPS كارتاعا تەك زيانكەستەرمەن كۇرەسۋ ءۇشىن ەنگىزىلگەن جەرلەردى تۋرا تاۋىپ, جويادى. فلورا مەن فاۋناعا زياندى اسەرى جوق. ماماندار ادام قولى جەتە بەرمەيتىن اۋماقتارعا وزدىگىنەن باسقارىلاتىن قۇرىلعىلاردى پايدالانعان ءتيىمدى ەكەنىن ايتادى. ءبىر درون ءبىر ساعاتتا 180 گەكتار جەرگە ءدارى سەبەدى. وسى ورايدا ماماندار زيانكەستەردىڭ تولىق جويىلاتىنىنا كەپىلدىك بەرىپ وتىر. جاڭا تەحنولوگيانى جەرگىلىكتى ماماندارعا ۇيرەتىپ, كادر دايارلاۋعا دايىن.
سارىاعاش اۋدانى بويىنشا ءۇيىرلى ماروككو شەگىرتكەسىنە قارسى حيميالىق وڭدەۋ بولجامى 75,4 مىڭ گەكتار, ونىڭ ىشىندە 36,6 مىڭ گەكتار جەرۇستى بۇرىككىش تەحنيكالارىمەن, 40,8 مىڭ گەكتاردى اۋەدەن وڭدەۋ جوسپارلانعان. اۋەدەن وڭدەۋ جۇمىستارىن «اۆياكومپانيا دەلتا-يۋگ» جشس جۇرگىزەدى. ال كەلەس اۋدانى بويىنشا ءۇيىرلى ماروككو شەگىرتكەسىنە قارسى حيميالىق وڭدەۋ بولجامى 62,8 مىڭ گەكتار, ونىڭ ىشىندە 34,3 مىڭ گەكتار جەرۇستى بۇرىككىش تەحنيكالارىمەن, 29,5 مىڭ گەكتاردى اۋەدەن وڭدەۋ جوسپارلانعان. بيىل وبلىستا زيانكەستەردىڭ تارالۋ ايماعى بىلتىرمەن سالىستىرعاندا بىرنەشە ەسە ۇلعايىپ, 270 مىڭ گەكتاردان اسقان. بۇگىنگە دەيىن وبلىس بويىنشا 30 مىڭ گەكتاردان اسا القاپتا شەگىرتكەنىڭ وشاقتارى حيميالىق جولمەن وڭدەلدى.
تۇركىستان وبلىسى
