كوللاجدى جاساعان – قونىسباي شەجىمباي, «EQ»
ورەلى ونەرىمەن وزگەلەردەن وق بويى وزعان ساحنا ساڭلاقتارى دا سول سايگ ۇلىكتەر سەكىلدى. جۇرت نازارىندا جۇرەدى. كوپشىلىكتىڭ قوشەمەتىن كورەدى. كەيدە سول بويىن بۋعان تالانتىنىڭ بۋىنا شىداماي شىم-شىتىرىق شىرعالاڭعا تۇسەتىنى بار.
تالانتتار تاعدىرى تاسادا قالماۋعا ءتيىس. ويتكەنى ولار وتانىمىزدىڭ مەرەيىن وسىرەدى. ۇلتىمىزدى ۇلىقتاپ, تورتكۇل دۇنيەگە تانىتادى.
نەمقۇرايلىقتان نەبىر دۇلدۇلدەرىمىزدىڭ ورعا جىعىلعانى – ورنى تولماس وكىنىش. اتاق-داڭق «اۋرۋىنان» ازاپ شەككەن ايبوزدارىمىزدان ايىرىلىپ قالعاندا ءبىر-اق ەس جياتىنىمىز قالاي؟ اداسقانعا اقىل ايتار ابىزدارىمىز قايدا؟
تاياۋدا Youtube ارناسىنان ايگىلى تەنور امانگەلدى سەمبين تۋرالى حاباردى كوردىم. سوڭعى سۇحباتتارىنىڭ بىرىندە مۇڭايا ايتقان جانايقايىن تىڭدادىم. ارينە, بۇل ءانشىنىڭ ونەربايانىن قالي سارسەنباي, جاناربەك ءاشىمجان سىندى جۋرناليستيكا سىرتتاندارىنىڭ جازعان دۇنيەلەرى ارقىلى بۇرىننان بىلەتىن ەدىم. الايدا وزەگىن ورتەگەن وكىنىشتەرىن ونىڭ ءوز اۋزىنان ەستىگەندە قالىڭ ويدا قالادى ەكەنسىڭ. وسىندايدا شەراعاڭنىڭ «سونداي ءبىر جۇلدىز بولعان. جابىلىپ ءجۇرىپ وشىرگەنبىز...» دەگەن شەرلى ءسوزى ەرىكسىز ەسكە تۇسەدى.
«جارايدى, جاستىقتىڭ اسەرىنەن جاڭىلىس باسقان شىعارمىن. ال تەاتردان قۋىلعاندا مىنا بالا قايدا كەتتى دەگەن جاناشىر تابىلماعانىن تۇسىنبەيمىن. دۇرىلدەگەن شاعىمدا ارقامنان قاققان ارداقتى اعالارىمنىڭ باستان سيپاپ, باۋىرعا تارتۋدىڭ ورنىنا, سوڭدارىنان ەرگەن ءبىز پاقىردى باسەكەلەس ساناپ, قىرىن قاراعاندارى قاتتى قىنجىلتتى. وسىنىڭ ءبارى جۇيكەمدى ابدەن جۇقارتتى. قازىر دە جۇرەگىم قان جىلايدى. نەگە وسىلاي بولدى؟...» ماسكەۋدى مويىنداتىپ, لا سكالانىڭ تالعامپاز كورەرمەندەرىن تامسانتقان تاۋ تۇلعا وسىلاي وپىنادى. اقىرى ساحنانى اڭساعان ساعىنىشىن باسا الماعان اعامىز الپىستىڭ اسقارىنا جەتەر-جەتپەستەن اھ ۇرۋمەن ومىردەن ءوتتى.
سىر-سىمباتىمەن, سىڭعىرلاعان داۋسىمەن ساحنامىزدىڭ ءسانى بولۋعا لايىق ەكىنشى ءبىر دارا دارىن جۇلدىز بايمولدينا دا قىزعانىشتىڭ قىزىل يتىنە تالانىپ, وپەراداعى ويىپ الار ورنىنان ەرتەرەك ايىرىلعانىنا قالاي قاپالانباسسىڭ؟
بۇدان ءۇش-ءتورت جىل بۇرىن بىرنەشە حالىقارالىق كونكۋرستا توپ جارعان بەلگىلى باريتون سۇندەت بايعوجين «استانا وپەرامەن» اياقاستىنان قوش ايتىستى. سەبەبىن ءىشىمىز سەزەدى. ايتەۋىر جاي كەتىس ەمەس. كەيىنىرەك قوستاناي وبلىستىق فيلارمونياسىن باسقاردى. ايتسە دە ايگىلى ءانشى شەنەۋنىكتىك شەكپەنىن تەز شەشتى. بۇگىندە بۇل جىگىتتىڭ قايدا ەكەنى ماعان بەيمالىم. ارينە, قاراپ جۇرمەگەن بولار. بىراق مۇنداي زور مۇمكىندىككە يە ايدىك ءارتىستىڭ ورنى ۇلكەن ساحنا ەكەنى تالاس تۋدىرماسا كەرەك.
راس, تالانتتار كەيدە تارپاڭ مىنەز تانىتادى. ەلىنە ەركەلەپ, ەركىندەۋ جۇرگىسى كەلەدى. سوعان ءسىرا, مادەنيەت مەكەمەلەرىنە جەتەكشىلىك ەتەتىن اتقامىنەر ازاماتتاردىڭ تۇسىنىستىكپەن قاراعانى ءجون-اۋ.
تۇلپاردى تۇساماس بولار. ويتكەنى ورەن جۇيرىكتەر قوراعا قاماپ باعار قوي تورىسى ەمەس...
