سۋرەتتى تۇسىرگەن – ەرلان ومار, «ەQ»
اتى ايتىپ تۇرعانداي, ءيىسسۋدىڭ ءتۇر-ءتۇرىن شىعارادى. ەرلەر مەن قىز-كەلىنشەكتەرگە, ءتىپتى بالالارعا ارنالعانى, كولىك پەن ءۇيىڭىزدى حوش يىستەندىرەتىن ءتۇرى دە بار. مۇندا دايىندالاتىن ءونىمنىڭ كوپ بولىگى شەتەلگە شىعارىلادى ەكەن.
شيكىزاتىن يتاليا مەن فرانتسيا مەملەكەتىنەن الدىراتىن تسەحتا كوبىنە جاستار جۇمىس ىستەيدى. بارلىعى – 80 قىزمەتكەر. ءبىر قىزىعى, مۇندا ارنايى ماماندىق قاجەت ەتىلمەيدى. جاڭادان كەلگەن ادامعا تسەح باسشىلىعى جۇمىس بارىسىن وزدەرى ۇيرەتىپ, ارنايى وقىتۋ كۋرسىنان وتكىزەدى ەكەن. سونداي-اق قاۋىپسىزدىك شارالارى دا قاتاڭ ساقتالىپ, ارنايى جۇمىس كيىمى بەرىلەدى.
ء«ونىمنىڭ باسىم كوپشىلىگى, ياعني 85 پايىزى سىرت ەلدەرگە جىبەرىلەدى. ال ءاتىردىڭ سىرتقى قوراپشاسىن قىتايدان الدىرامىز. سونداي-اق قۇيىلمالى اتىرلەر ارنايى تسيستەرنالارمەن كەلگەن سوڭ وندىرىستەگى زەرتحانامىزدا ءتۇرلى حوش يىستەر بويىنشا زەرتتەۋ جۇرگىزەمىز. تاۋارلىق ماركاسى قويىلىپ, ءار ءاتىردىڭ ءوز كودى بويىنشا ەكسپورتقا شىعارىلىپ ءجۇر. جالپى, ونىمدەردى شىعارۋ كەزىندە ءبىز ەڭ جوعارى ساپالى شيكىزاتتى پايدالانامىز», دەيدى كومپانيانىڭ باس ديرەكتورى زاكير بينناتلي.
ال وندىرىستىك تسەحتىڭ باسقارۋشىسى ايدىن قايىرجانوۆتىڭ سوزىنشە, ءوندىرىس ءۇش بولىمنەن تۇرادى. قۇيىلۋ تسەحى, جەكە زەرتحانالىق جانە عىلىمي ورتالىق ءبولىمى, سونداي-اق تاۋارلار قويماسى. سونىمەن قاتار ءوندىرىس ورنىنىڭ كورشى ەلدەردە 650 ساۋدا نۇكتەسى بار ەكەن. ولار – رەسەي, مولدوۆا, قىرعىز رەسپۋبليكاسى, وزبەكستان, تۇرىكمەنستان جانە تاجىكستاندا ورنالاسقان. سونداي-اق ءوز ەلىمىزدەگى 80 دۇكەنگە تاراتىلادى. ءتىپتى كومپانيا 2022 جىلى ءوز ونىمدەرىن كۋۆەيت ەلىنە دە جىبەرىپتى.
ء«بىر كۇندە 15 مىڭ ءاتىر دايىندالادى. ال جىل بويى 2 جارىم ميلليون ءاتىر قۇتىسىن قۇيۋعا تسەحتىڭ قۋاتى جەتەدى. كولەمىنە كەلسەك, ءيىسسۋ قۇتىسىنىڭ 2 ميلليگرامم ولشەمنەن باستاپ, 100 ميلليگراممعا دەيىن بولادى. بالالارعا, ەر ادام مەن ايەلدەر پايدالاناتىن ءيىسسۋدىڭ سان تۇرىنەن بولەك, ءاۆتوموبيلدىڭ ىشكى سالونىنا, بولمەلەرگە ارنايى قويۋعا ارنالعان اتىرلەر دايىندالادى. مۇندا ءار قىزمەتكەردىڭ اتقاراتىن مىندەتى ناقتى بەلگىلەنگەن. مىسالى, ءبىر مامان قۇيۋ جۇمىستارىمەن اينالىسسا, كەلەسىسى قاپتاۋ نەمەسە ارنايى تاۋارلىق كود قويۋمەن اينالىسادى. ال ەندى ءبىرى ءاتىردىڭ ساپاسىن قاداعالايدى», دەيدى ايدىن قايىرجانوۆ.
ايتپاقشى, ءوندىرىس قالا سىرتىندا ورنالاسقاندىقتان قىزمەتكەرلەرگە ارنايى اۆتوبۋس قاراستىرىلعان. سونداي-اق كومپانيا تاراپىنان تۇسكى اس تەگىن بەرىلەدى. ال ورتاشا جالاقى – 350-400 مىڭ تەڭگە كولەمىندە ەكەن.
«قىزمەتكەرلەرگە الەۋمەتتىك قولداۋلار ۇيىمداستىرىلىپ تۇرادى. مەرەكەلەردە سىياقى بەرىلىپ, جاڭا وقۋ جىلى نەمەسە بالالار مەرەكەسىندە بالاباقشا مەن مەكتەپكە باراتىن بالالارى بار قىزمەتكەرلەرگە كومپانيا تاراپىنان ارنايى سىيلىقتار دا ۇيىمداستىرىلادى», دەيدى كومپانيا باسشىسى ز.بينناتلي.
ءوندىرىستى ارالاي ءجۇرىپ بايقاعانىمىزداي, «ارومات» جشس ءوز مۇمكىندىگىن جىل سايىن ۇلعايتىپ كەلەدى. قازىر سەرىكتەستىك قوسىمشا پارفيۋم ونىمدەرىن ساقتايتىن قويما دا سالىپ جاتىر.
جەكە پارفيۋمدىك برەند قالىپتاستىرىپ ۇلگەرگەن كومپانيا كوبىنە-كوپ ۇلكەن كولەمدەگى تاپسىرىستاردى قابىلداپ ءجۇر. سونداي-اق تۇتىنۋشىلار تاراپىنان ارنايى بارىپ, ۇناعان ءاتىرىن جەكەلەي ساتىپ الاتىندار جەتەرلىك. وتاندىق تاۋاردى دامىتۋعا قۇلشىنىس تانىتقان سەرىكتەستىكتىڭ بارلىق ءونىمىنىڭ باعاسى دا قولجەتىمدى.
