– 1999 جىلى قاڭتاردا ەلىمىزدە پرەزيدەنت, ال, سول جىلدىڭ كۇزىندە ءماجىلىس سايلاۋى ءوتتى. ءبىر مانداتتى وكرۋگ بويىنشا بەلگىلى اقىن ءجۇرسىن ەرمان دا دەپۋتاتتىققا ۇمىتكەر بولدى. ءجۇرسىننىڭ شاشباۋىن كوتەرىپ ەلگە تانىمال تۇلعانى باستاپ جەزقازعان- ۇلىتاۋ جاعىنا قاسىم اعامىز دا كەلدى. سول توپقا ەل جاقتان ءبىز دە قوسىلدىق. قاسەكەڭنىڭ قاسىندا 20 كۇننەن اسا بىرگە جۇردىك. باتىر اعامىزدىڭ «ساپارلاس كۇندەردەن» دەپ جازۋىندا وسىنداي ءمان بار, – دەيدى مۇقاڭ.
سول كۇندەردى اقىن بۇگىندە اسا ءبىر جىلىلىقپەن ەسكە الادى. داڭقتى باتىرمەن بىرگە جۇرگەن كۇندەرىن ءومىرىنىڭ ساۋلەلى شاقتارىنا بالايدى.
«قاسىم اعامىزدىڭ قاسىندا بولىپ اڭگىمەسىن كوپ تىڭدادىق. بۇرىن كىتاپتان وقىپ, ەرتەگىلەردەن ەستيتىن «باتىردىڭ ۇيقىسى» دەگەننىڭ قانداي بولاتىنىن سول جولى كوردىم. جول ءجۇرىپ, ءبىر اۋىلدان ەكىنشىسىنە جەتكەندە, قاسەكەڭ قانشا دەگەنمەن جاسى كەلگەن كىسى عوي, شارشاڭقىراپ قالادى. شاي ءىشىپ بولعان سوڭ, جاستىعىن الىپ, قيسايا كەتەدى. مىنا جاقتاعى ءبىزدىڭ ابىر-دابىرعا سەلت ەتپەي, ۇيقىسىن قاندىرىپ تۇرادى. سونىسىن كورىپ تاڭقالعانىم بار» دەيدى ول. سونداي-اق اقىندى باتىردىڭ وزىنەن بۇرىن وزگەنىڭ جايىن ويلاپ تۇراتىن مىنەزى ءتانتى ەتكەن كورىنەدى. ولار ەل ارالاعاندا بىرنەشە كولىككە ءبولىنىپ مىنەدى عوي. قاسىم قايسەنوۆ, كامال سمايىلوۆ, ءجۇرسىن ەرمان مىنگەن كولىك اڭداۋسىزدا ءبىر شۇڭقىرعا ءتۇسىپ كەتىپ, ىشىندەگىلەر قاتتى سوققى الىپ قالادى. سالدەن كەيىن جاعداي دۇرىستالىپ, جولعا تۇسكەندە قاسەكەڭ قاسىنداعى ەكى ىنىسىنە قاراپ: – ءاي, كامال, ءجۇرسىن! جاڭا سەن ەكەۋىڭ ءولىپ قالا جازدادىڭدار عوي, دەيتىن كورىنەدى. سول كولىكتىڭ ىشىندە ءوزى دە بولعانىنا قاراماستان, قاسىنداعىلارىن ويلاپ وتىرعان اعا جۇرەگى-اي!
مۇقاش اعا قاسەكەڭنىڭ ادىلدىگىن دە ەرەكشە سۇيىسپەنشىلىكپەن اڭگىمەلەيدى.
– بارعان جەرىمىزدە ەلدىڭ كوڭىلىن كوتەرۋ ءۇشىن اباش كاكەنوۆ ەكەۋمىز ايتىسامىز. سويتسەم, قاسەكەڭ ءبىزدىڭ ايتىسىمىزعا ءمان بەرە قارايدى ەكەن. بىردە «سەنىڭ ءسوزىڭ اباشقا قاراعاندا سالماقتىراق, كۇشتىرەك شىقتى» دەپ قولىمدى الدى. ريزا بولىپ قالدىم. حالقىمىزدىڭ داڭقتى پەرزەنتىنەن مۇنداي لەبىز ەستۋ دەگەن بارلىق اتاق-دارەجەدەن قىمبات قوي, – دەيدى ول.
مۇقاش سەيتقازينوۆتىڭ ايتۋىنشا, ء«بىزدى سوعىس باتىر ەتتى. ال باۋكەڭ, باۋىرجان مومىش ۇلى سوعىس بولماسا دا حالىققا باتىر بولىپ تانىلاتىن ەدى. ويتكەنى ول تابيعاتىنان سولاي جاراتىلعان», دەپ باعالاعان ەكەن قاسەكەڭ.
اتى اڭىزعا اينالعان باتىر اعاسىنىڭ قولتاڭباسىن مۇقاڭ ەڭ ءبىر قۇندى جادىگەرلەردىڭ بىرىنە بالايدى.
جەزقازعان قالاسى
