فوتو: basnews.kz
بۇگىندە قاتارى سيرەگەن, سوعىسقا قاتىسقان قاريالاردىڭ ەڭ ۇلكەنى 102 جاستا. ولاردىڭ ءبىرى يساباي جۇزەەۆ قازىعۇرت اۋدانىنىڭ قاراباۋ اۋلىندا, ەكىنشىسى نەمات ابدۋراسيلوۆ تۇركىستان قالاسىندا تۇرادى. ورداباسىلىق سوعىس ارداگەرى قالمەن مۇراتوۆ 100 جاسقا تولىپ وتىر. ال سايرام اۋدانىندا تۇراتىن احمەدجان انارتاەۆ پەن كەنتاۋ قالاسىندا تۇراتىن بادان تۇرەباەۆ بيىل 97-گە تولادى. جالپى, وڭىردە جەڭىسكە ۇلەس قوسقان 3 654 ارداگەر بار. ونىڭ 11-ءى مايدانگەر بولسا, 121-ءى سوعىسقا قاتىسۋشىلار مەن مۇگەدەكتەرىنە تەڭەستىرىلگەن. سوعىسقا قاتىسۋشىل مەن مۇگەدەكتەرىنە تەڭەستىرىلگەندەردىڭ ەكەۋى قورشاۋدا, ەكەۋى كامەلەت جاسقا تولماعان كەزىندە كونتسلاگەردە, باسقا دا ءماجبۇرلى تۇردە قاماپ ۇستايتىن جەرلەردە تۇتقىندا بولعان. 117-ءسى قايتىس بولعان سوعىس مۇگەدەكتەرىنىڭ ايەلدەرى, ال 3 522-ءسى – تىل ەڭبەككەرى.
بيىل جەڭىس كۇنى مەرەكەسىنە وراي وڭىردەگى 3 654 ارداگەرگە بىررەتتىك ماتەريالدىق كومەك بەرۋ ءۇشىن اۋداندىق جانە قالالىق بيۋدجەت ەسەبىنەن 176 ملن 500 مىڭ تەڭگە ءبولىندى. ونىڭ ىشىندە ەكىنشى دۇنيەجۇزىلىك سوعىستىڭ 11 قاتىسۋشىسى مەن مۇگەدەگىنە 1 ملن 500 مىڭ تەڭگەدەن, كامەلەتتىك جاسقا تولماي تۇتقىندا بولعاندارعا, سوعىسقا قاتىسۋشى مەن مۇگەدەگىنە تەڭەستىرىلگەن باسقا دا ساناتتاعىلارعا 100 مىڭ تەڭگەدەن بەرىلەدى. لەنينگراد قورشاۋىندا بولعاندارعا – 60, تىل ەڭبەككەرلەرىنە 30 مىڭ تەڭگە كولەمىندە بىررەتتىك ماتەريالدىق كومەك تاعايىندالعان.
تۇركىستان وبلىسى
