فوتو: kolesa.kz_الەكسەي ستاركوۆ
قولدانۋشىلار kaztoll.kz اقپاراتتىق سەرۆيسى ارقىلى ناقتى ۋاقىت بويىنشا رەسپۋبليكالىق ماڭىزى بار جولداردىڭ جاعدايىن باقىلاي الادى.
وسى ماقساتتا بۇگىندە 17 اقىلى جولدا 74 بەينەكامەرا ورناتىلعان. ولار كولىك قوزعالىسىنىڭ ترافيگى, اۋا رايى جانە جولدىڭ جالپى جاعدايى تۋرالى اقپارات بەرەدى.
«جاڭا سەرۆيس جۇرگىزۋشىلەر ءۇشىن الدىن الا ساپاردى جوسپارلاۋعا, وڭتايلى باعىتتاردى انىقتاۋعا جانە جولداعى قولايسىزدىقتاردىڭ الدىن الۋعا مۇمكىندىك بەرەدى. كaztoll.kz - ساپار كەزىندە ۋاقىتتى ۇنەمدەۋگە جانە قولايلى جاعدايدى قامتاماسىز ەتۋگە ارنالعان تاپتىرماس قۇرال. اقىلى جولداردىڭ ونلاين كورسەتىلىمىنىڭ ارقاسىندا جۇرگىزۋشىلەر كەپتەلىستەردىڭ الدىن الىپ, ۋاقىتىن ۇنەمدەپ, ساپارىن ىڭعايلى ءارى قاۋىپسىز ەتىپ جوسپارلاي الادى», دەلىنگەن كومپانيا حابارلاماسىندا.
سونداي-اق اقپاراتتىق سەرۆيس جول-كولىك وقيعالارىنىڭ سانىن ازايتۋعا اسەر ەتىپ, بارلىق جول قوزعالىسىنا قاتىسۋشىلار ءۇشىن قاۋىپسىز ساپار ۇيىمداستىرۋعا سەپ بولادى دەپ بولجانىپ وتىر.
