وبلىستىق مادەنيەت, ارحيۆتەر جانە قۇجاتتاما باسقارماسىنا قاراستى شوقان ءۋاليحانوۆ اتىنداعى وبلىستىق عىلىمي-امبەباپ كىتاپحاناسى ۇيىمداستىرعان ءىس-شارا بارىسىندا جاڭادان جارىق كورگەن بىرقاتار كىتاپتىڭ اۆتورى مەن باسپاگەرلەر كىتاپقۇمار وقىرمانمەن كەزدەسۋلەر وتكىزىپ, پىكىر الماستى.
«فەستيۆال اياسىندا وتكىزىلگەن جارمەڭكەنىڭ وقىرمان ءۇشىن پايداسى مول. ءبىز بىرىنشە كەزەكتە كوركەم ادەبيەت پەن عىلىمي تانىمدىق ادەبيەتتى دارىپتەۋگە دەن قويدىق. قالامگەرلەردىڭ جازعان دۇنيەسىن جۇرت ىشىندە ناسيحاتتاۋعا باسىمدىق بەردىك.
نەگىزگى اۋديتوريانىڭ جاستار بولعانى بەلگىلى. سوندىقتان ولاردىڭ بويىندا كىتاپ وقۋعا قىزىعۋشىلىقتى ارتتىرساق دەگەن نيەت بولدى. اسىرەسە جاستاردىڭ عىلىم مەن عىلىمي كىتاپتارعا دەگەن ۇستانىمىمەن تانىسساق دەگەن نيەتتىڭ ۇدەسىنەن شىققان سەكىلدىمىز», دەيدى ش.ءۋاليحانوۆ اتىنداعى كىتاپحانا ديرەكتورى ەلميرا ابدينوۆا.
جانازىق جارمەڭكەسى اياسىندا بىرنەشە ءىس-شارا ۇيىمداستىرىلدى. جىل ىشىندە ەڭ كوپ كىتاپ وقىعان ازاماتتار ارنايى سىيلىقتارمەن ماراپاتتالسا, «كىتاپحانالار جانە ريتەيل»: تاجىريبە الماسۋ» الاڭىنا قاتىسقان ماماندار باسپا مەن كىتاپ دۇكەندەرىنىڭ جۇمىسى, ماركەتينگتىك كونتەنتتىڭ ساپاسىن كوتەرۋ تۋرالى ويلارىمەن ءبولىستى.
فەستيۆال-جارمەڭكەنىڭ ەكىنشى كەزەڭىندە وزگە ەلدەن كەلگەن مارتەبەلى مەيماندار مەن بەلگىلى اقىن-جازۋشىلارمەن كەزدەسۋلەر وتكىزىلدى. ءىس-شاراعا بەلگىلى جازۋشى جۇسىپبەك قورعاسبەك, جازۋشىلار وداعى باسقارما توراعاسىنىڭ ورىنباسارى بەيبىت سارىباي, اقىن مارجان ەرشۋ باستاعان وزگە دە قالامگەرلەر قاتىستى.
جارمەڭكە اياسىندا قانات تىلەۋحاننىڭ از ۋاقىت بۇرىن جارىق كورگەن, قازىرگى كەزدە وقىرمان تاراپىنان قىزۋ تالقىلانىپ جاتقان «شاتىرداعى ايەل» كىتابىنىڭ تانىستىرىلىم ءراسىمى ءوتتى. سونداي-اق وزگە دە بىرقاتار قالامگەردىڭ, جەرگىلىكتى اۆتورلاردىڭ كىتاپتارىنىڭ تۇساۋكەسەر ءراسىمى ۇيىمداستىرىلدى.
«جارمەڭكەدە جۇرتشىلىقتىڭ زور ىنتامەن كىتاپ الىپ جاتقانى قۋانتتى. كەلۋشىلەردىڭ اراسىندا كىتاپقۇمارلار دا, كىتاپقا اسا قىزىقپايتىندار دا بار شىعار. باستىسى, كەز كەلگەن ۇيگە كىتاپ بارسا, وقىرمان تابىلادى. مۇنداي ءىس-شارالار رۋحاني قۇندىلىقتارىمىزعا سونى سەرپىن بەرەتىنى انىق. دۇكەن ءبىر جەردەن ساۋدا جاساسا, جارمەڭكە دەگەن كوشپەلى عوي. وسى كوشتىڭ باسى اۋىلدارعا دا بۇرىلسا ءجون بولار ەدى», دەيدى جازۋشى جۇسىپبەك قورعاسبەك.
تاراز
