زەرتحانانىڭ اشىلۋ سالتاناتىنا پرەزيدەنت كەڭەسشىسى مالىك وتارباەۆ ارنايى قاتىستى. ءىس-شارا بارىسىندا مالىك وتارباەۆ پەن م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ باسقارما توراعاسى – رەكتور مۇحتار بايجۇمانوۆ القىزىل لەنتانى قيىپ, ىزدەنىس ىزىنە تۇسكەن ماماندارعا تابىس تىلەدى.
عىلىمي زەرتحانانىڭ اشىلۋ سالتاناتىندا ءسوز العان «امانگەلدى گاز» وڭدەۋ زاۋىتى ديرەكتورىنىڭ ورىنباسارى بولات بۋحبانوۆ, «QazaqGaz – بارلاۋ جانە ءوندىرۋ» جشس ءوندىرۋ بويىنشا ينجەنەرى قۇلماعانبەت ۋاليەۆ جانە تەحنيكا قاۋىپسىزدىگى بويىنشا ينجەنەر عالىم ءداندىباي ءوز پىكىرىن ورتاعا سالىپ, ۇتىمدى يدەيالارىمەن ءبولىستى. ولاردىڭ ايتۋىنشا, مامانداردىڭ بىلىكتىلىگىن ارتتىرۋ ىسىندە زەرتحانانىڭ اتقارار جۇمىسى از ەمەس.
زەرتحانانىڭ ىرگەسى عىلىم جانە جوعارى ءبىلىم مينيسترلىگى عىلىم كوميتەتىنىڭ گرانتتىق قارجىلاندىرۋ اياسىندا قالانعان. جوبا جەتەكشىسى – PhD ارمان قابدىشەۆ ەكەن. زەرتحانا وتكەن جىلدىڭ سوڭىندا تالاپقا ساي تولىق جابدىقتالىپتى.
جوعارى وقۋ ورنى باسشىلارىنىڭ ايتۋىنشا, عىلىمي قىزمەتكەرلەر, ماگيسترانتتار مەن ستۋدەنتتەر زەرتحانادا عىلىمي-زەرتتەۋ جۇمىستارىن تۇراقتى تۇردە جۇرگىزەدى. زەرتحانانىڭ ماقساتى – مۇناي-گاز, كەن ورىندارىنداعى ۇڭعىلاردىڭ تسەمەنتتەلۋ ساپاسىن ارتتىرۋعا باعىتتالعان. ماماندار قازىرگى كەزدە ءوز جۇمىسىن جۇيەلەپ, ناقتى عىلىمي باعىتتار بويىنشا ىسكە كىرىسۋگە بەل بۋىپ وتىر.
ءىس-شارا بارىسىندا ءسوز العان پرەزيدەنت كەڭەسشىسى م.وتارباەۆ عىلىمعا بەت بۇرعان جاستار ءۇشىن بۇل زەرتحانانىڭ ماڭىزى زور ەكەنىن ايتتى.
– قازىرگى كەزدە عىلىمدى وركەندەتۋگە ايرىقشا نازار اۋدارىلىپ وتىر. پرەزيدەنت عىلىمدى دامىتۋ ماقساتىندا ءبىرشاما ناقتى تاپسىرما بەردى. بۇگىن سول باعىتتا جۇمىس اتقارىلىپ جاتىر. تاراز تورىندە اشىلعان زەرتحانا عالىمداردىڭ جۇمىسىنا سەرپىن بەرىپ, مۇناي-گاز سالاسىنداعى قۇرىلىستا ساپانى جاقسارتۋعا سەپتىگىن تيگىزەدى دەپ سەنەمىن, – دەدى م.وتارباەۆ.
ۋنيۆەرسيتەت رەكتورى مۇحتار بايجۇمانوۆ مەملەكەت باسشىسىنىڭ تاپسىرماسى بويىنشا عىلىم جانە جوعارى ءبىلىم مينيسترلىگى تاراپىنان جاس عالىمداردى قولداۋ جىل سايىن كۇشەيتىلىپ كەلە جاتقانىن تىلگە تيەك ەتتى.
– جاس عالىمداردىڭ زەرتتەۋلەرىن گرانتتىق قارجىلاندىرۋعا ارنالعان كونكۋرستاردىڭ ناتيجەسىندە سۇرانىسقا يە جوبالار ەلىمىزدىڭ ءار وڭىرىندە ىسكە اسىرىلىپ جاتىر. وتاندىق عالىمداردىڭ عىلىمي جاريالانىمدارىنىڭ سانى مەن ساپاسى ارتتى.
ناقتى دەرەككە جۇگىنسەك, 2024-2026 جىلدارعا ارنالعان بيۋدجەتتە جاس عالىمداردىڭ زەرتتەۋلەرىن گرانتتىق قارجىلاندىرۋعا 18 ميلليارد تەڭگە قاراستىرىلعان ەكەن. «تامپوناجدىق ماتەريالدار مەن بۇرعىلاۋ ەرىتىندىلەرىنىڭ قاسيەتتەرىن زەرتتەۋ» زەرتحاناسى عىلىم جانە جوعارى ءبىلىم مينيسترلىگى عىلىم كوميتەتىنىڭ گرانتتىق قارجىلاندىرۋ اياسىندا اشىلىپ وتىر.
زەرتحانا 2023 جىلى جەلتوقسان ايىندا تولىق جابدىقتالىپ بىتكەن بولاتىن. قازىرگى تاڭدا زەرتحانادا PhD ارمان قابدىشەۆتىڭ جەتەكشىلىگىمەن دوكتورانتتار مەن ماگيسترانتتار, باكالاۆرلار ءبىلىم الىپ, زەرتتەۋ جۇمىسىن جۇرگىزىپ جاتىر. كافەدرانىڭ عالىمدارى عىلىمي جۇمىستارىن جۇيەلەپ, ماقالالارىن جاريالاپ ءجۇر. تەك 2023 جىلدىڭ وزىندە زەرتحانا قىزمەتكەرلەرىنىڭ ارقاسىندا 6 ماقالا Scopus بازاسىنا شىققان, ونەرتابىسقا حالىقارالىق پاتەنت الىنعان, – دەدى م. بايجۇمانوۆ.
جامبىل وبلىسى
