مۇنىسى نەسى؟!

جاڭا جىلدى قارسى العان كۇننىڭ ەرتەسىندە قىسقى دەما­لىسقا شىققان اسەت نەمەرەمدى قاسىما ەرتىپ, ساعىندىرعان سۇيىكتى سەمەيىمە جونەپ بەر­گەن­مىن. الماتىدا شاڭعى تەبۋگە شىمبۇلاقتاي اسا قولايلى جەر بولا تۇرا, بۇل جولى سەمەيدىڭ قاراعايلى ورمانىن ءجون كورگەن ەدىك. ايتقانداي-اق, مۇنداعى تازا اۋا, ەلدەگى ازدى-كوپتى وزگەرىس-جاڭالىقتار كوڭىلدى كوتەرىپ, قيالىمىزدى شارىقتاتىپ جىبەرگەن. سونداي اسەرمەن جۇرگەندە «سەمەي» قوناقۇيىنىڭ قاق توبەسىنە سويداقتاتىپ جازىلعان جازۋعا كوزىم تۇسكەندە الگىندەگى كوڭىل-كۇيىم ساپ باسىلىپ قالعانىن قايتەرسىز! ويتكەنى, سوناۋ كەڭەس كەزىنەن سان ونداعان جىلدار بويى «سەمەي» دەپ اتالاتىن قوناق ءۇيىنىڭ توبەسىنە «سەميپالاتينسك» دەگەن جازۋ ورنىعىپ الىپتى. ال سول قوناقۇي قابىرعاسىنىڭ ەكىنشى ءبىر جاق شەتىندەگى قازاقشا جانە اعىلشىنشا «سەمەي» دەپ جازىلعان جازۋ كوزگە تىپتەن دە قوراش. وسى ورايدا وسىدان بەس-التى جىل بۇرىن ەلباسى جارلىعىمەن ەركە ەرتىس جاعاسىنداعى ەجەلگى قالا اتى بۇعان دەيىن قوس­ارلانىپ كەلگەن اتاۋدان ءبىر­جولا قۇتىلىپ, سەمەي اتانعانى, سوعان بايلانىس­تى ەل گازەتى «ەگەمەننىڭ» بەتكە جۋىق ماتەريالدار توپتاماسىن بەرىپ, التى الاشقا جار سالىپ, ءسۇيىنشى سۇ­راعانى ەسكە ورالعان. سوندا ەتەگىمىزدەن كەرى تارتقانداردى ءوز باسىم كورگەن دە, ەستىگەن دە ەمەسپىن. ال ەندەشە, مىنا تىرشىلىگىمىزگە جول بولسىن! بۇل مەنىڭشە سىرتقى كۇشتەردىڭ اسە­رى ەمەس, ءوزىمىزدىڭ بويكۇيەز مە­كەمە باسشىلارىنىڭ كۇيكى تىرلىگى, ەسسىز ارەكەتى! اتاپ ايتقاندا, قالا­داعى كەز كەلگەن نىساندى زاڭ­دىق تۇرعىدان تىركەپ, سوعان رۇقسات بەرەتىن مەملەكەتتىك ءادى­لەت باسقارماسىنىڭ نەمقۇ­راي­دىلىعى. سوعان ءاي دەيتىن اجە, قوي دەيتىن قوجانىڭ بولماي وتىرعانى قالاي! قازاق دەسەڭ وزىڭە تيەدى. قا­شان وسىنداي بويكۇيەزدىكتەن ارى­لامىز ءوزى! داۋلەت سەيسەن ۇلى, سەمەي قالاسىنىڭ قۇرمەتتى ازاماتى. الماتى.