تۇرعىنداردى ەڭبەك كۇشى مول وڭىرلەردەن شىعىس قازاقستان وبلىسىنا قونىستاندىرۋدى كوزدەيتىن ەلەكتروندى كارتا جونىندە ءمينيستردىڭ ورىنباسارى ەگجەي-تەگجەيلى ءتۇسىندىردى. ەلەكتروندى كارتادا ماماندار تاپشىلىعى بايقالعان ەلدى مەكەندەر تۋرالى جان-جاقتى مالىمەتتەر بەرىلگەن. – ەلەكتروندى كارتادا بەلگىلى ەلدى مەكەندە «جۇمىسپەن قامتۋدىڭ جول كارتاسى-2020» باعدارلاماسى, اۋداندىق بيۋدجەت, جۇمىس بەرۋشى جانە جەكە قارجىسى ەسەبىنەن قول جەتكىزۋگە بولاتىن باسپانا جايى مەن بوس جۇمىس ورىندارى تۋرالى مالىمەتپەن قانىعۋعا مۇمكىندىك جاسالعان.
سونداي-اق, وندا جارامدى جەر, بالاباقشالار مەن مەكتەپتەردەگى بوس ورىندار, تەحنيكالىق جانە كاسىپتىك وقۋ مۇمكىندىگى دە كورسەتىلەدى. ودان وزگە سايتتى جاساۋشىلار ەلدى مەكەننىڭ فوتوسۋرەتتەرىن دە ورنالاستىرۋدى كوزدەپ وتىر, – دەدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ جەتەكشىسى ايجان سادىقوۆا.
ۆيتسە-مينيستر اتالعان كارتانىڭ وتە جۇيەلى تۇردە جاسالعانىن ايتادى. – ەلەكتروندى كارتا كورنەكىلىگىمەن جانە پايدالانۋعا قولايلىلىعىمەن ەرەكشەلەنەدى. بۇل تاراپتا جاقسى جۇمىس جۇرگىزىلدى. ەندىگى باستى شارۋا – جوبانى ناقتى جۇزەگە اسىرۋدى جەدەلدەتۋ. سونىمەن قاتار سايتتان باسقا دا كوممۋنيكاتسيالىق قۇرالدار ارقىلى حالىقتى اقپاراتتاندىرۋ قاجەت. «جۇمىسپەن قامتۋدىڭ جول كارتاسى-2020» باعدارلاماسى شەڭبەرىندە قونىس اۋدارۋشىلارعا سۋبسيديا تولەنەدى.
بۇل ءۇردىس 2011 جىلدىڭ ەكىنشى جارتىجىلدىعىنان باستاپ ەنگىزىلگەن. «جۇمىسپەن قامتۋدىڭ جول كارتاسى-2020» باعدارلاماسى جۇزەگە اسىرىلا باستاعان ۋاقىتتان بەرى 15 مىڭ ادام كوشتى. مۇنىڭ ءبارى ادامداردى جۇمىسپەن قامتاماسىز ەتۋ ماقساتىندا جاسالىپ جاتىر, – دەدى دەنساۋلىق ساقتاۋ جانە الەۋمەتتىك دامۋ ءمينيسترىنىڭ ورىنباسارى.
ياعني, شىعىس قازاقستان وڭىرىنە قونىس اۋدارۋعا نيەتتى ازاماتتار وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ سايتىنا كىرىپ, باعدارلاماعا قاتىسۋشى كەز كەلگەن ەلدى مەكەن جونىندە اقپارات الا الادى. نەمەسە جەرگىلىكتى جۇمىسپەن قامتۋ ورتالىعىنان دا بارلىق اقپاراتقا قول جەتكىزۋگە بولادى. ءتىپتى, ەلەكتروندى كارتا جوباسىندا كەلەشەكتەگى جۇمىس بەرۋشىمەن ونلاين جۇيەدە تىكەلەي سويلەسۋ مۇمكىندىگى دە قاراستىرىلىپ جاتىر.
دۋمان اناش,
«ەگەمەن قازاقستان»
وسكەمەن.
