«تازا اۋلا. تازا ولكە. تازا ەل!» اتاۋىمەن ىسكە اسىپ جاتقان اكتسيانىڭ ءۇشىنشى اپتاسى «جاسىل ايماق» دەگەن اتاۋعا يە بولعان. بۇل اپتادا وبلىس ورتالىعىندا تۇراتىن جۇرتشىلىق اعاش كوشەتتەرىن وتىرعىزۋعا بىلەك سىبانىپ كىرىستى. اسىرەسە جانارىندا وت ويناعان جاستاردىڭ جۇمىستى قۇشتارلىقپەن اتقارىپ جاتقانىن ايتپاي كەتۋگە بولماس.
تاراز قالاسىنىڭ شەتكەرى تۇسىنداعى «قىزىلاباد» الابىنداعى №11 اۋماقتىڭ تۇرعىندارى مەن جاستار تال ەگۋدەن سىنعا ءتۇستى. جارىستى ۇيىمداستىرۋشىلار جاستاردى جىگەرلەندىرۋ ماقساتىندا قارجىلاي سىياقى دا قاراستىرىپتى. دوداعا وبلىستىق جانە قالالىق جاستار رەسۋرستىق ورتالىقتارى, №11 اۋماقتىق وكرۋگىنىڭ تۇرعىندارىنان قۇرالعان كوماندالار قاتىسىپ, جالپى سانى 1 200 قارا اعاش ەكتى. قاتىسۋشىلاردىڭ كوشەتتى قانشالىقتى ساپالى ەككەنىن, جەردىڭ دۇرىس قازىلۋىن جەتى ادامنان قۇرالعان ارنايى كوميسسيا زەردەلەپ, جۇلدەگەرلەر قاتارىنان كورىنگەن ۇزدىكتەردى انىقتادى. جارىس قورىتىندىسىندا تاراز قالالىق جاستار رەسۋرستىق ورتالىعى 1-ورىن يەگەرى اتانسا, «قۇمشاعال جاستارى» كومانداسى 2-ورىنعا تۇراقتادى. ال ۇزدىك ۇشتىكتى «اۋليەاتا» جاستارى كومانداسى تۇيىندەدى. جۇلدەگە ىلىككەن ۇجىمدار قارجىلاي سىياقىمەن جانە ارنايى ديپلوممەن ماراپاتتالدى.
ۇيىمداستىرۋشىلاردىڭ ايتۋىنشا, «تازا قازاقستان» ەكولوگيالىق اكتسياسى اياسىندا اتقارىلاتىن جۇمىس مۇنىمەن توقتاپ قالمايدى. قالا ماڭىن اباتتاندىرۋ, كوگالداندىرۋ جۇمىستارى الداعى ۋاقىتتا دا ساتىمەن جالعاسىن تابا بەرمەك. ەڭ باستىسى, تۋعان جەردى كوركەيتۋگە دەگەن ەرىكتى جاستاردىڭ ەرىك-جىگەرى كوڭىل قۋانتادى. ولار «تازا قازاقستان» اكتسياسىن قولداۋعا دايىن.
تاراز
