كوكشەتاۋ كىرپىشتەرى رەسەيگە ەكسپورتتالىپ جاتىر

كوكشەتاۋ. 7 قاڭتار. كوكشەتاۋداعى «ەنكي» كەراميكالىق كىرپىش زاۋىتى 300-دەن استام ادامدى جۇمىسپەن قامتىپ وتىر. ول جىلىنا 30 ءتۇرلى 58 ملن. كىرپىش شىعارۋدا. بۇل تۋرالى egemen.kz حابارلادى. ءوڭىردىڭ يندۋستريالاندىرۋ كارتاسىنا ەنگەن كاسىپورىن 2010 جىلى ىسكە قوسىلعان. جوبا قۇنى – 6 ملرد. 178 ملن. تەڭگە. وتاندىق قۇرىلىس ماتەريالى ەل اۋماعىن قازىر تۇگەل قامتىپ, ەندى رەسەي نارىعىنا جول تارتتى. «بۇرىن ۋكراينانىڭ كىرپىشى ۇلكەن باسەكەلەس بولاتىن. قازىر ءبىزدىڭ ءونىمنىڭ ساپاسى ودان ارتىق بولماسا كەم ەمەس. باعاسى دا تومەن. سوندىقتان شەتتەن كەلەتىن ءونىمدى نارىقتان ىعىستىرىپ شىعارىپ جاتىرمىز. كىرپىشتەردى رەسەيدىڭ ومبى جانە تۇمەن قالالارىنا جىبەرۋدەمىز. ءوندىرىس وشاعى يسپانيانىڭ وزىق تەحنولوگياسىمەن جابدىقتالعان. سوندىقتان زاۋىت ءونىمى ساپالى ءارى ايازعا ءتوزىمدى. وعان قوسا عيمارات ءىشىنىڭ تەمپەراتۋراسى قىسى-جازى ءبىر قالىپتا ۇستالادى. بۇگىندە زاۋىتتا 300-دەن استام ادام تۇراقتى ەڭبەك ەتۋدە. نەگىزى كاسىپورىن جىلىنا 60 ملن. دانا ءونىم وندىرۋگە قاۋقارلى. ەندىگى ماقسات – سول مەجەنى ەڭسەرۋ», – دەيدى زاۋىتتىڭ باس ينجەنەرى ۆاديم بۋرىكين. باقبەرگەن امالبەك. دەرەك: egemen.kz. سۋرەت: 24.kz.