اقتوبە وبلىسىندا جول-كولىك اپاتىنان ءتورت ادام قازا بولدى

اقتوبە. 6 قاڭتار. «اقتوبە-استراحان» تاس جولى بويىندا ورىن العان جول-كولىك وقيعاسىنان 4 ادام قازا تاپتى. بۇل تۋرالى egemen.kz ءتىلشىسى حابارلادى. اقتوبە قالاسىنان العا قالاسىنا قاراي باعىت العان «تويوتا Corolla» اۆتوكولىگىنىڭ 24 جاستاعى جۇرگىزۋشىسى كولىك تىزگىنىنە يە بولا الماي جولدىڭ قارسى باعىتىنا شىعىپ كەتىپ, تەمىر اۋدانىنىڭ 42-جاستاعى تۇرعىنى باسقارعان «وپەل-ۆەكترا» كولىگىنە سوقتىعىستى. وبلىستىق ىشكى ىستەر دەپارتامەنتى ءباسپاسوز قىزمەتىنىڭ اقپارى بويىنشا, جول-كولىك اپاتى سالدارىنان «وپەل-ۆەكترا» كولىگىنىڭ جۇرگىزۋشىسى مەن 52-جاستاعى جولاۋشىسى جانە «تويوتا Corolla» كولىگىنىڭ 50 جانە 52 جاستاعى جولاۋشىلارى العان جاراقاتتارىنان وقيعا ورنىندا كوز جۇمعان. «وپەل-ۆەكترا» كولىگىنىڭ 4 جولاۋشىسى (بىرەۋى ءبىر جارىم جاسار ءبۇلدىرشىن) جانە «تويوتانىڭ» 2 جولاۋشىسى ءتۇرلى جاراقاتتارمەن اقتوبە قالاسىنىڭ اۋرۋحانالارىنا جەتكىزىلدى. قازىرگى تاڭدا جول-كولىك اپاتىنىڭ ورىن الۋ سەبەبى مەن سالدارىن انىقتاۋ ماقساتىندا قىلمىستىق كودەكستىڭ 345 بابى 4 تارماعىنا سايكەس, ياعني ەكى نەمەسە ودان كوپ ادامنىڭ ولىمىنە اكەلگەن جول ءجۇرۋ ەرەجەلەرىن بۇزۋ دەرەگىمەن قىلمىستىق ءىس قوزعالىپ, بىرقاتار ساراپتامالار تاعايىندالدى. ساتىبالدى ءساۋىرباي. دەرەك: egemen.kz. سۋرەت: total.kz.