ەلگە ەل قوسىلسا – قۇت

تاعدىردىڭ تالايىمەن وزگە مەملەكەتتەردە ءومىر ءسۇرىپ جاتقان قانداستارىمىزدىڭ ەلگە ورالۋىن قامتاماسىز ەتۋگە بايلانىستى اتقارىلىپ جاتقان جۇمىستار ناتيجەسىز ەمەس. ماسەلەن, 2014 جىلدىڭ قاڭتار-قىركۇيەك ايلارى ارالىعىندا شەت ەلدەردە تۇراتىن ەتنوستىق قازاقتاردىڭ اراسىنان 3,5 مىڭعا جۋىق وتباسى قازاقستانعا كوشىپ كەلىپ قونىستانعان. مەملەكەت باسشىسى نۇر­سۇل­تان نازارباەۆتىڭ باستاماسىمەن قولعا الىنىپ, قوعامىمىزدىڭ كۇن تارتىبىنە شىعارىلعان ءمان-ماڭىزى جوعارى, ەلدىككە ۇندەر جاسامپاز ىستەردىڭ  ءبىرى ءارى بىرەگەيى رەتىندە شەتەلدەردەگى قازاقتاردى ەلگە شاقىرىپ, ولارعا مۇمكىندىگىنشە جاعداي جاسالىنىپ وتىرعانىن ايتۋعا بولادى. وسىناۋ كوڭىل تەبىرەنتەر جۇمىستاردىڭ مىنا وزگەرمەلى, الماعايىپ زاماندا ەشتەڭەگە جالتاقتاماي, باۋىرىن ىزدەپ, قانداسىن تۇگەلدەۋگە تۇبەگەيلى بەت بۇرعان قازاق جۇرتىنىڭ ارمان-تىلەگىمەن ۇشتاسىپ جاتقانىن سەزىنە بىلگەنىمىز ءجون. شەتتەگى قانداستارىمىزدىڭ قارا شاڭىراق – قازاقستانعا كەلۋى 2014 جىلى دا جالعاسىن تاپتى. ەلىمىز الەمدى ويلاندىرىپ, تالايدى تىعىرىققا تىرەگەن قارجىلىق داعدارىستاردان تۋىنداۋى ىقتيمال جاعدايلارعا الاڭداماي, ورالمان قاۋىمىن بار مۇمكىندىگىنشە قارسى الدى. دەنساۋلىق ساقتاۋ جانە الەۋمەتتىك دامۋ مينيسترلىگى تاراتقان سوڭعى مالىمەتكە قا­راعاندا, بىلتىر شەكارا اسىپ 3 347 (8 359 ادام) ورالمان وتباسى كەلىپتى. بۇلاردى گەندەر­­­لىك قۇرامى بويىنشا كورسە­تەر بولساق, ەر-ازاماتتار – 3 438, ايەلدەر – 3 323, بالالار – 1 598. بۇدان بولەك, اتالعان مي­نيستر­لىكتىڭ دەرەگىنشە, ەڭبەك­كە جارامدى ادامدار – 4 768, زەي­نەتكەرلىك جاستاعىلار – 395 بولىپ وتىر. وسى ارادا نازار اۋدارا كەتەر جايت, ەلگە كەلگەن ورالمانداردىڭ اراسىندا 368 ادام جوعارى ءبىلىمدى بولسا, 869-ى ورتا كاسىبي ءبىلىمى بار جاندار, ال جالپى ورتا بىلىمدىلەرى – 2 592. قازاق ەلگە ەلدىڭ قوسىلۋىن قۇتقا بالاعان. ەندەشە, الىستاعى اعايىننىڭ ورالۋىن جاقسىلىققا جورىپ, مەملەكەتىمىزدىڭ ابىرويىن اسىرار وسىناۋ جاسامپاز ىستەر قۇت-بەرەكەمىزدىڭ نەگىزى بولا بەرسىن دەيىك. جولدىباي بازار, «ەگەمەن قازاقستان».