اسكەري قىزمەتشىلەر وتباسى: 46 جىل تۋعان ەلگە قىزمەت

سەرىكباەۆتار وتباسى – اكەسى (اسىلعازى), اناسى (روزا), قىزى (اقمارال) جانە ۇلى (اسەت) جالپى جيىنى 46 جىل بويى قازاقستان قارۋلى كۇشتەرىنىڭ قاتارىندا قىزمەت ەتىپ كەلەدى. «ءبىز باۋىرىم ەكەۋمىز اكەسى مەن اناسى اسكەري قىزمەتشى بولىپ تابىلاتىن وتباسىندا تاربيەلەندىك. ولاردى ۇنەمى اسكەري فورمادا كورىپ, ولاردىڭ قىزمەت تۋرالى اڭگىمەلەرىن تىڭداپ وستىك. بۇل بىزگە قاتتى اسەر ەتتى دەپ ويلايمىن. ناتيجەسىندە ءبىز ولاردىڭ ءىزىن قۋدىق, ولار بۇعان شەكسىز كۋانادى», – دەيدى اقمارال سەرىكباەۆا. اقمارال سەرىكباەۆانىڭ اسكەري قىزمەتى 27943 اسكەري بولىمىندە باستالدى. مۇندا ول تانك باتالونىنىڭ پسيحولوگى, سونداي-اق, زەنيتتىك ديۆيزيوندا قىزمەت ەتتى. قازىر ول قۇرلىق اسكەرلەرىندەگى جاۋىنگەرلىك دايار­لىق باس باسقارماسىنىڭ جاۋ­اپتى ورىنداۋشىسى. سەرجانت اسكەري شەنى بار. ونىڭ باۋىرى كاپيتان اسەت سەرىكباەۆ اەروۇتقىر اسكەرلەرى قولباسشىسى باس­قارماسىندا جاۋىنگەرلىك دايار­لىق اعا وفيتسەرى لاۋازىمىندا قىزمەت اتقارۋدا. اتا-اناسى قىزمەتتەرىن 1992 جىلى باستاعان. 2005 جىلى اكەسى پودپولكوۆنيك اسىلعازى سەرىكباەۆ 40398 اسكەري ءبولىمى كومانديرىنىڭ تىل جونىندەگى ورىنباسارى, اناسى ستارشينا روزا سەرىكباەۆا 40398 اسكەري ءبولىمىنىڭ سانيتارلىق نۇسقاۋشىسى لاۋازىمدارىندا اسكەري قىزمەتتەرىن اياقتادى. «مەنىڭ بۇكىل ءومىرىم ارميادان اجىراعان ەمەس. اتا-انامنىڭ ءىسىن جالعاستىرۋ دۇرىس شەشىم بولدى دەپ ويلايمىن. ءوز بالالارىمدى تاربيەلەي ءجۇرىپ, ولاردىڭ دا ءوز ومىرلەرىن قازاقستان ارمياسىنداعى قىزمەتپەن بايلانىستىرعانىن قالايمىن. قازىر جۇبايىم ەكەۋمىز ۇلىمىزدى «جاس ۇلانعا» بەرۋدى جوسپارلاپ وتىرمىز. ايتپاقشى, جۇبايىم دا اسكەري قىزمەتشى. ال ۇلىمىز 9 جاستا, بىراق اسكەري تاقىرىپقا قىزىعۋشىلىق تانىتىپ, اكەسىمەن بىرگە اسكەري مەكتەپكە تۇسۋگە دايىندالىپ ءجۇر», – دەيدى اقمارال سەرىكباەۆا. سەرىكباەۆتار ءوز وتباسى­لا­رىنىڭ وسىدان 22 جىل بۇرىن باستالعان ءداستۇرىن قاستەرلەپ ساقتاپ كەلەدى. قازاقستاندىق اسكەري قىزمەتشىلەر اراسىنداعى ۇرپاقتار ساباقتاستىعىنىڭ وسىنداي ۇلگىلەرى از ەمەس. ولار كەز كەلگەن ۋاقىتتا قادىرلى ءارى قاجەتتى سانالاتىن اسكەري ماماندىقتىڭ ماڭىزدىلىعىن كورسەتەدى.   ساۋلەبەك ءبىرجان.