«POSUK Titanium» – تيتان قۇيمالارىن وندىرەتىن جاڭا كاسىپورىن

ءوندىرىسى وسكەلەڭ وسكەمەندە تاياۋدا «POSUK Titanium» جشس-ءنىڭ زاۋىتى ىسكە قوسىلدى. ەلباسى نۇرسۇلتان نازارباەۆتىڭ قاتىسۋىمەن يندۋستريالاندىرۋ كۇنىنە وراي وتكەن جالپىۇلتتىق تەلەكوپىر بارىسىندا پايدالانۋعا بەرىلگەن جاڭا زاۋىت ەلەكتروندى-ساۋلە قۋاتىمەن بالقىتۋ ءادىسى بويىنشا تيتان قۇيمالارى مەن بالقىمالارىن وندىرەدى. ۇدەمەلى يندۋستريالىق-يننو­ۆا­تسيالىق دامۋ مەملەكەتتىك باعدار­لا­ماسىنىڭ العاشقى بەسجىلدىعىندا «وسكەمەن تيتان-ماگني كومبيناتى» اق الەمدىك قۇرىش قۇيۋ وندىرىسىندە جەتەكشى ورىنعا يە الىپ كاسىپورىنداردىڭ ءبىرى بولىپ تابىلاتىن وڭتۇستىككورەيالىق «POSCO» كومپانياسىنىڭ قاتىسۋىمەن ءىرى يننوۆاتسيالىق جوبانى جۇزەگە اسىردى. مەملەكەت باسشىسى نۇرسۇلتان نازارباەۆ اتالعان جوبانى جۇزەگە اسىرعانى ءۇشىن استانا قالاسىنداعى «التىن ساپا» اتتى قازاقستان رەسپۋبليكاسى پرەزيدەنتى سىيلىعىنىڭ لاۋرەاتتارىن ماراپاتتاۋ سالتاناتىندا «وتمك» اق پرەزيدەنتى اسەم مامىتوۆانى «يننوۆاتسيالىق سەرپىلىس» اتالىمى بويىنشا ماراپاتتادى. – قۇرمەتتى نۇرسۇلتان ءابىش ۇلى! ءسىز­دىڭ قولداۋىڭىزدىڭ ارقاسىندا وسكە­مەن تيتان-ماگني كومبيناتى الەمدەگى جەتەكشى مەتاللۋرگيالىق كاسىپ­ورىنداردىڭ ءبىرى سانالاتىن ءوڭتۇس­تىك­كورەيالىق «POSCO» كومپانياسىمەن بىرىگىپ, وسى ءوندىرىس ورنىن قۇردى. تيتان قۇيمالارى مەن بالقىمالارىن وندىرەتىن كاسىپورىندى ىسكە قوسۋعا رۇقسات ەتىڭىز, – دەپ مالىمدەدى اتالعان تەلەكوپىر بارىسىندا زاۋىت ديرەكتورى ۆالەري سىچەۆ. مەملەكەت باسشىسى جاڭا كاسىپ­ورىننىڭ قازاقستان ءۇشىن ماڭىزدى جوبا ەكەنىن اتاپ ءوتىپ: «بۇل – ەڭ وزىق ءونىم. زاۋىت ۇلكەن. بولاشاعى بار. ءسىز­دەردى كاسىپورىننىڭ ىسكە قوسىلۋىمەن قۇتتىقتايمىن جانە ەڭبەكتەرىڭىزگە جەمىس تىلەيمىن. تيتان ءوندىرۋ – قازاقستان ءۇشىن جاڭادان قولعا الىنىپ جاتقان جوبالاردىڭ ءبىرى», – دەدى جانە جاڭا زاۋىت­تىڭ سالتاناتتى تۇردە ىسكە قوسىلۋى­نا رۇقسات بەردى. بۇل مەرەيلى ءساتتى زاۋىت ۇجىمى زور قۋانىشپەن قابىلداپ, دۋ قول سوقتى. ايتا كەتكەن ابزال, 2010 جىلى «وتمك» اق وڭتۇستىككورەيالىق «POSCO» كوم­پانياسىمەن بىرگە «POSUK Titanium» جشس بىرىككەن كاسىپورنىن قۇرعان بولاتىن. 2011 جىلى شىعىس قازاقستان وبلىسىنىڭ ورتالىعىندا زاۋىتتىڭ قۇرىلىسى باستالدى. قۋاتى جىلىنا 6 مىڭ توننادان استام تيتان قۇيمالارى مەن بالقىمالارىن شىعارۋعا جەتەتىن زاۋىتتا ءارى قاراي مۇناي ءوندىرۋ, حيميا ونەركاسىبى, كەمە قۇرىلىسى, ەنەرگەتيكا, سۋمەن قامتۋ جانە تۇششىتۋ قوندىرعىلارىنا ارنالعان ىستىق ءھام سۋىق كۇيىندە يلەنگەن تيتان تاباقتارى مەن قۇبىرلارى وندىرىلەدى. جوبانىڭ قۇنى 70 ملن. اقش دوللارىن قۇرادى. 2014 جىلدىڭ 23 قىركۇيەگىندە زاۋىتتا ەلىمىزدىڭ تاريحىندا العاش رەت 10 توننالىق تيتان قۇيماسى الىندى. قازىرگى كەزەڭدە كاسىپورىندا 70 جۇمىس ورنى قۇرىلدى. جوسپارعا سايكەس, الداعى ۋاقىتتا 200 ادامعا دەيىن جۇمىسپەن قامتىلماق. «POSCO» پروكاتىنىڭ زاماناۋي تەحنولوگياسىن پايدالانۋ «POSUK Titanium» جشس قازاقستاندىق-كورەيالىق بىرلەسكەن كاسىپورنىنا تيتان پروكاتى بويىنشا الەمدىك نارىققا شىعۋىنا مۇمكىندىك بەرەدى. بالقىتۋدىڭ جاڭا تەحنولوگياسى «وتمك» اق يننوۆاتسيالىق تەحنولوگيانى ەنگىزۋگە جانە تيتان ونىمدەرى ءتىزىمىن كەڭەيتۋگە, ەل ەكونوميكاسىنىڭ باسەكەگە قابىلەتتىلىگىن كوتەرۋگە جانە ەكسپورتتىق الەۋەتىن ارتتىرۋعا تىڭ سەرپىن اكەلمەك. زاۋىت ديرەكتورى ۆالەري سىچەۆتىڭ ايتۋىنشا, «POSUK Titanium» زاۋىتىنىڭ ءبىرىنشى كەزەگى تولىعىمەن پايدالانۋعا بەرىلدى. وسىعان دەيىن ءۇش سىناقتىق قۇيما الىندى. جۋىردا عانا ۇزىندىعى 5 مەتر بولاتىن سالماعى 20 توننالىق قۇيما قۇيىلعان. قازىر وڭتۇستىككورەيالىق «POSCO» كومپانيا­سىمەن كەلىسىمشارت جۇرگىزىلۋدە. ياعني قۇيمالار وڭتۇستىك كورەياعا جونەلتىلەدى. ولار ءونىمدى سەرتيفيكاتتاۋدان وتكىزگەن سوڭ وندىرىستىك جوسپاردى ورىنداۋ باس­تالادى. وسىلايشا, تيتان قۇيمالارى پروكاتى شەتەلدەرگە ەكسپورتتالا باس­تايدى. – بۇل ءبىزدىڭ ۇجىم ءۇشىن وتە قۋانىشتى ءسات. پرەزيدەنت تەلەكوپىردە جاڭادان قۇرىلعان ءوندىرىس ورنىنىڭ تيىمدىلىگىنە توقتالدى. البەتتە, تيتان قۇيمالارىن ءوندىرۋ ەلىمىزدە ەندى وركەندەپ كەلە جاتقان سالالاردىڭ ءبىرى. بۇكىل الەمدە تيتاننىڭ 15 پايىزى وندىرىلەدى. ياعني زاۋىت قازاقستاننىڭ تيتان وندىرىسىندە جەتەكشى ەل بولۋى ءۇشىن جاڭا مۇمكىندىكتەرگە جول اشادى, – دەدى «وتمك» اق وندىرىستىك-تەحنيكالىق باسقارما باستىعى ۆلاديمير كولچەۆ. ۆ.كولچەۆ بۇگىندە زاۋىتتىڭ ەكىنشى كەزەگىنە ازىرلىك جۇرگىزىلىپ جاتقانىن, ونىڭ قۇرىلىسى كەلەر جىلى پايدالانۋعا بەرىلۋى مۇمكىن ەكەنىن جەتكىزدى. سول كەزدە زاۋىتتىڭ جالپى قۋاتى 12-13 مىڭ تونناعا دەيىن تيتان قۇيمالارىن وندىرۋگە جەتەدى. زاۋىتتىڭ اشىلۋ سالتاناتىندا ءوڭىر باسشىسى دانيال احمەتوۆ پرەزيدەنت پارمەنىمەن جۇزەگە اسىرىلعان جاڭا ءوندىرىس ورنى ارقىلى ءونىم قۇنى جوعارىلاعانىن جەتكىزدى. – بۇل – وتە ۇلكەن جوبا. 6 مىڭنان استام تيتان قۇيماسى قارجىلاي ەسەپتەگەندە شامامەن 60 ملن. دوللارعا تەڭ بولادى. زاۋىتتىڭ وزىندىك ەرەكشەلىگى, دامۋ كەلەشەگى بار. كاسىپورىن تسەحىندا جاقىندا ەكىنشى الاڭ ىسكە قوسىلىپ, ءونىم كولەمى كوبەيە تۇسپەك. الەمدىك نارىقتا ورىن الۋ ءۇشىن شيكىزات قانا ەمەس, ونىڭ قۇنىن جوعارى باعادا ساتا الاتىن ءونىم ءوندىرۋ قاجەت. بۇل ورايدا ءبىزدىڭ وبلىسىمىز مەن كاسىپورىندارىمىزدىڭ الەۋەتى ۇلكەن. كەندى التايىمىزدىڭ قويناۋى قازبا بايلىققا تولى. سوندىقتان مەتاللۋرگيالىق سالا – ۇدايى نازارىمىزدا. الدىمىزدا اۋقىمدى مىندەتتەر تۇر. وڭىردەگى ءىرى كاسىپورىنداردىڭ جەتەكشىلەرى مەن ۇجىمدارىنىڭ جوعارى ماراپاتتارعا يە بولىپ جاتقانى قۋانتادى. بۇل – جوعارى ساپا بەلگىسى. 2015 جىلدىڭ 1 قاڭتارىنان باستاپ ەۋرازيالىق ەكونوميكالىق وداق ءوز جۇمىسىن باستادى. وسى وداق قۇرىلىمى اياسىندا باسەكەگە قابىلەتتى بولۋىمىز ءۇشىن ساپاعا دا جوعارى كوڭىل بولەمىز, – دەدى وبلىس اكىمى دانيال احمەتوۆ. دۋمان اناش, «ەگەمەن قازاقستان». وسكەمەن.