قىزىل سۋدان قاۋىپ تونگەن كۇندەرى جۇدىرىقتاي جۇمىلىپ, ءبىر ءۇيدىڭ بالاسىنداي ارەكەت ەتكەن ازاماتتاردىڭ الدىڭعى لەگىندە ۆولونتەر جاستار ءجۇردى. ولار قالانىڭ ەلەك جانە قارعالى وزەندەرى بويىنداعى 11 باۋ-باقشا ۇجىمى مەن تۇرعىن ءۇي الاپتارى تۇرعىندارىن قاۋىپسىز جەرگە كوشىرۋگە كومەكتەستى, سۋ باسقان ۇيلەردەن وزدىگىنەن جۇرە المايتىن مۇگەدەك جاندار مەن قارت كىسىلەردى, جاس بالالاردى, ءۇي جانۋارلارىن الىپ شىعىپ, پوليتسيا قىزمەتكەرلەرى مەن قۇتقارۋشىلارعا جاردەمدەستى. تاسقىن كۇندەرى اقتوبە قالاسى مەن التى اۋدانعا 4 مىڭنان استام ۆولونتەر كومەككە كەلدى. سونداي-اق ولار قالاداعى 36 ەۆاكۋاتسيالىق بەكەتتە جاتقاندارعا كيىم-كەشەك, توسەك ورىن تاراتىپ, ازىق-ت ۇلىك, ءدارى-دارمەك جەتكىزدى.
ەرىكتىلەر وبلىس ورتالىعىمەن شەكتەلىپ قانا قويماي, اۋدانداردا دا بەلسەندى ارەكەت ەتتى. ماسەلەن, سۋ باسقان قوبدا اۋدانىنا 60 ۆولونتەر كومەككە كەلىپ, ادامداردى ەۆاكۋاتسيالاۋعا كومەكتەستى. ال توتەنشە جاعداي جونىندەگى وڭىرلىك شتاب جانىندا قۇرىلعان ەرىكتىلەردىڭ فرونت-ءوفيسى قاي جەردە كومەك كۇشى ءزارۋ بولسا, سول جەرگە ۆولونتەرلەردى جۇمىلدىرا بىلگەن ۇيلەستىرۋشى ورتالىققا اينالدى. ەرىكتىلەردىڭ قاتارىنا كوللەدج, جوعارى وقۋ ورىندارىنىڭ ستۋدەنتتەرىنەن باسقا ءتۇرلى ماماندىق يەلەرى, ەرەسەكتەر دە قوسىلدى. ۆولونتەرلىك ورتالىقتارمەن جۇمىس ىستەيتىن زەينەتكەرلەر ۇيلەرىندە اس دايىنداسا, ولاردى جاستار تاسقىنمەن الىسىپ, بوگەتتەردى بيىكتەتىپ جۇرگەن ازاماتتارعا تاراتتى.
قىزىل سۋدىڭ بەتى قايتسا دا, ۆولونتەرلەرگە ءالى جۇمىس كوپ. قازىرگى ۋاقىتتا تاسقىن سۋ زاردابىن ىرعىز اۋدانىنىڭ بەس اۋىلى تارتىپ جاتىر. توسىن قۇمدارىنان كەلگەن تورعاي وزەنىنىڭ سۋى بەلشەر, نۇرا, جايساڭباي, مامىر, قۇيىلىس ەلدى مەكەندەرىنە كىرىپ, تۇرعىندار ىرعىز اۋدانى ورتالىعىنداعى ءۇش ەۆاكۋاتسيالىق ورىنعا كوشىرىلدى. نۇرا, بەلشەر, مامىر اۋىلدارى سۋ استىندا قالدى. ەندى ءتاۋىپ اۋىلدىق وكرۋگىنىڭ قۇيىلىس جانە جايساڭباي اۋىلدارىنا قاۋىپ ءتونىپ تۇر. جۇرت قولدان بوگەت ءۇيىپ, سۋدىڭ وسى بەلدەۋدەن اسىپ كەتپەۋى ءۇشىن كۇنى-ءتۇنى ەڭبەكتەنىپ جاتىر. وزەن جاعالاۋلارىن بەكىتۋگە اقتوبەدەن اسكەري ءبولىم جاۋىنگەرلەرىمەن بىرگە 100 ۆولونتەر كەلدى. قوستانايدان جەتكەن تورعاي وزەنىنىڭ سۋى قۇيىلىس اۋىلىنىڭ شەتىندە ىرعىزبەن قوسىلىپ, قۇردىم دەگەن ەلسىزدە قۇمعا ءسىڭىپ جوعالادى. قۇمداۋىت جەر بولىپ كورىنسە دە, قۇردىم – جەر استى سۋى مەن جەر بەتى سۋىنىڭ قوسىلاتىن تۇسى. قۇردىمعا قۇلاعان سۋ جەر استىمەن ارال تەڭىزىنە بارادى دەيدى ۇلكەندەر.
ۆولونتەرلەر ىرعىزداعى ۋاقىتشا پانالاۋ ورىندارىندا جاتقان 500 ادامدى تاماقتاندىرادى, وبلىس ورتالىعىنان جەتكىزىلگەن گۋمانيتارلىق كومەكتى تاراتىپ بەرەدى. ويتكەنى قورعانىس مينيسترلىگىنىڭ تىكۇشاعىمەن شۇعىل كوشىرىلگەن اۋىل تۇرعىندارى ۇيلەرىنەن باسى ارتىق كيىم دە الماي شىققان. سۋ تاسقىنى حالقىمىزدىڭ باۋىرمال, مەيىرىمدى, ىزگىلىككە تولى ءبىر قىرىن اشتى. ءتۇرلى ۆولونتەرلىك ۇيىمدارعا بىرىككەن ەرىكتىلەر ساپىندا ەلىنە, تۋعان قالاسى مەن تۋعان جەرىنىڭ تابيعاتىنا بەيجاي قارامايتىن ازاماتتار كوپ ەكەن. ۆولونتەرلىك قوزعالىسقا كۇن ساناپ قوسىلىپ جاتقان ءارتۇرلى جاستاعى ازاماتتارعا قاراپ وسىلاي دەپ وي تۇيۋگە بولادى.
اقتوبەلىك ەرىكتى جاستاردىڭ ەندىگى ءبىر توبى «تازا قازاقستان» رەسپۋبليكالىق ەكولوگيالىق اكتسياسىنا بەلسەندىلىكپەن كىرىسكەن. ولار قىستان قالعان قوقىستاردى جيناپ, كوشەلەردى, ارىقتاردى, وزەن-كولدەر بويىن تازالاۋمەن اينالىسىپ جاتىر. ەلىمىزدە باستالعان جالپىحالىقتىق ەكولوگيالىق اكتسياعا اقتوبەلىك 80-گە جۋىق ۆولونتەر قاتىسۋعا نيەت بىلدىرگەن. ولار اسىرەسە قالا مەن دالادا تال ەگۋ, گۇل وتىرعىزۋ جۇمىستارىنا قاتىسۋعا ىنتالى. ءساۋىر, مامىر ايلارىندا تابيعات قورعاۋشى جاستاردىڭ باستاماسىمەن اقتوبە وبلىسىندا «تازا قالا – تازا جاعالاۋ», «بۇلاق كورسەڭ – كوزىن اش», «ارداگەرلەردى ارداقتايىق» تاقىرىبىمەن كوپتەگەن ءىس-شارا وتكىزىلمەكشى.
اقتوبە وبلىسى
