فورۋمعا ەلىمىزدىڭ 14 ءىرى جوعارى وقۋ ورنىنان, شەتەل ۋنيۆەرسيتەتتەرى مەن عىلىمي ۇيىمداردان جاس عالىمدار كەلىپ, سالاداعى اۋقىمدى تاقىرىپتارعا تەرەڭ بويلادى. تۇيگەن-بىلگەن ىزدەنىستەرىن ورتاعا سالدى. ءدال وسى كۇنى جاس عالىمدار مەن ستۋدەنتتەر اراسىندا وتكەن بايقاۋ جەڭىمپازدارىن ماراپاتتاۋ سالتاناتى ءوتتى. كوميسسيا قۇرامى 400-دەن اسا ءوتىنىش ىشىنەن حيرۋرگيا جانە ساباقتاس پاندەر, پاتسيەنتتەردىڭ قاۋىپسىزدىگى, قوعامدىق دەنساۋلىق ساقتاۋ جانە دەنساۋلىق ساقتاۋداعى جاساندى ينتەللەكت, ساۋلەلىك تەراپيا, ساۋلەلىك دياگنوستيكا, يادرولىق مەديتسينا جانە باسقا دا سالا بويىنشا جۇزدەگەن ۇزدىك عىلىمي باياندامانى ىرىكتەپتى. فورۋمدا دەنساۋلىق ساقتاۋ ۆيتسە-ءمينيسترى تيمۋر سۇلتانعازيەۆ «جاس دارىن» كورپوراتيۆتىك بايقاۋىنىڭ ءۇش جەڭىمپازىن ماراپاتتادى.
– سالاداعى جاس تولقىننىڭ زەيىنىن اشا تۇسەتىن فورۋم ۋنيۆەرسيتەتتىڭ 60 جىلدىعى اياسىندا وتكىزىلىپ جاتقانى زاڭدى دەپ سانايمىن. 1964 جىلى قۇرىلعان استانا مەديتسينا ۋنيۆەرسيتەتى بۇگىندە مەديتسينالىق ءبىلىم بەرۋدىڭ بارلىق سپەكترىن بىرىكتىرىپ, عىلىمي, الەۋمەتتىك جوبالاۋ مەن يننوۆاتسيا ورتالىعىنا اينالىپ وتىر, – دەدى ۆيتسە-مينيستر.
جاس عالىمداردى عىلىم جانە جوعارى ءبىلىم ءمينيسترى ساياسات نۇربەك تە قۇتتىقتاپ, بەينەۇندەۋ جولداعان.
«عىلىم – ۇلتتىق ەكونوميكانىڭ قوزعاۋشى كۇشى. بۇل سالانى حالىقارالىق دەڭگەيدە باسەكەگە قابىلەتتى ەتۋ ءۇشىن پرەزيدەنت قاسىم-جومارت توقاەۆ بىرقاتار باستاما كوتەرىپ, ۇكىمەتكە جان-جاقتى قولداۋ كورسەتۋدى تاپسىردى. وسىلايشا, عىلىمدى دامىتۋعا بولىنگەن قاراجات الدىڭعى ۇشجىلدىق كەزەڭمەن سالىستىرعاندا 3,3 ەسەگە ۇلعايىپ, 643 ملرد تەڭگەگە جەتتى. البەتتە, عىلىمدى قولداۋ مۇنىمەن توقتاپ قالمايدى. ۇلتتىق جوباعا سايكەس, 2025 جىلى عىلىمدى قارجىلاندىرۋ 1%-عا, ياعني 1 ترلن تەڭگەگە دەيىن ۇلعايتۋ جوسپارلانعان», دەدى مينيستر.
فورۋمنىڭ MedX فورماتىنداعى سەسسيالارىندا عىلىم سالاسىندا تانىلىپ ۇلگەرگەن 15-تەن اسا سپيكەر جاستارعا تابىستى كەيستەر تۋرالى ايتىپ بەردى. ىزىنشە DemoDay اياسىندا ۇزدىك ستارتاپ جوبالارى تانىستىرىلدى. عىلىمي جوبالاردىڭ تانىستىرىلىمىنا 40-تان اسا ءوتىنىش تۇسسە, ولاردىڭ ەڭ ۇزدىكتەرىنە ارنايى جۇلدە بۇيىرعان. جەڭىمپاز جاستار ءوزىنىڭ جوباسىن ىسكە اسىرۋ ءۇشىن قارجىلاي قولداۋدان قۇر قالمايتىنىن ايتا كەتكەنىمىز دۇرىس بولار.
فورۋمنان كەيىن ايەلدەردىڭ دەنساۋلىعىنا بايلانىستى ماسەلەلەر «راديولوگياداعى ايەلدەر دەنساۋلىعى» حالىقارالىق عىلىمي-پراكتيكالىق كونفەرەنتسياسىندا قارالدى. دەنساۋلىق ساقتاۋ مينيسترلىگىنىڭ دەرەكتەرىنە ۇڭىلسەك, ءسۇت بەزى وبىرى ايەلدەردەگى قاتەرلى ىسىك قۇرىلىمىندا 1-ورىندا (13,2%) تۇر. ورتا ەسەپپەن العاندا, جىل سايىن ەلىمىزدە 5 مىڭعا جۋىق ايەلدەن وسى دەرت انىقتالادى. وكىنىشتىسى, ونىڭ ىشىندە 1 200-گە جۋىق ايەل ومىرىمەن قوشتاسادى. دەمەك, كەيىنگى جىلدارى ايەل دەنساۋلىعىنا قاتىستى تەرەڭ زەرتتەۋلەر جۇرگىزىلىپ, ىزدەنىستەردىڭ ىزىمەن سالاعا وزگەرىستەر ەنگىزىلۋى ابدەن ورىندى. كونفەرەنتسيادا راديولوگيا سالاسىندا قىزمەت ەتەتىن 250-دەن اسا وتاندىق مامان باس قوستى. ولار ايەلدەردە كەزدەسەتىن ءتۇرلى اۋرۋلاردى دياگنوستيكالاۋ, ەمدەۋ, مەديتسينالىق مەكەمەلەردىڭ تاجىريبەسىنە جاڭاشىلدىقتار ەنگىزۋ جايىن قارادى.
استانا مەديتسينا ۋنيۆەرسيتەتىنىڭ باسقارما توراعاسى كامالجان نادىروۆتىڭ ايتۋىنشا, ايەلدەر دەنساۋلىعى بىزدە عانا ەمەس, الەمدە ماڭىزدى مەديتسينالىق-الەۋمەتتىك ماسەلەنىڭ ءبىرى سانالادى. ياعني وقۋ ورنىندا رەزيدەنتۋرا باعدارلاماسى بويىنشا 83 رەنتگەنولوگ دارىگەر دە تەكتەن-تەن ءبىلىم المايدى. ۋنيۆەرسيتەتتىڭ ماگيسترانتتارى مەن دوكتورانتتارى ءوز زەرتتەۋلەرىنىڭ باعىتى رەتىندە وسى سالانى ءجيى تاڭدايتىنى بەكەر ەمەس.
كونفەرەنتسيادا ۋنيۆەرسيتەت باسشىسى كامالجان نادىروۆ شەتەلدىك اتاقتى پروفەسسور راينەر ريەنميۋللەرگە استانا مەديتسينا ۋنيۆەرسيتەتىنىڭ قۇرمەتتى پروفەسسورى اتاعىن تابىستاسا, پروفەسسور راۋشان راحىمجانوۆا قازاقستان راديولوگيالىق قوعامىنىڭ قۇرمەتتى مۇشەسى اتاعىن يرينا ابەل مەن الەكساندر زۋبارەۆكە تاپسىردى.
