«ادام ءزاۋزاتى ۇيرەنگىش كەلەدى عوي. ونىڭ تەرىس اسەرى دە جوق ەمەس. سونىڭ سەبەبىنەن كەي كىسىلەر ءوز بويىنان, ياكي كيىمىنەن شىعىپ تۇرعان جاعىمسىز يىسكە دە ۇيرەنىپ الادى. ونى ءوزى سەزبەگەنىمەن, اينالاسى تىجىرىنادى. جان تازالىعى دا سونداي نارسە. كەۋدەڭدەگى جانىڭدى پەندەلىكتىڭ باتپاعىنان ۇنەمى ارشىپ وتىرماساڭ, ءبىتتىم دەي بەر. سوندىقتان ءاربىر اقىل يەسى ءوزى ءۇشىن جاساپ جاتقان قارەكەتىنىڭ تۇتاس قوعامعا اسەر ەتەتىنىن ءبىلۋى كەرەك ءھام سوعان ساي جاۋاپكەرشىلىك تە بولۋعا ءتيىس», دەيدى ول.
قۇداي-اۋ, سادحۋرۋدىڭ ءسوزىنىڭ ارتىندا شاكارىمنىڭ دانالىعى سىعالاپ تۇر عوي:
«ەرىنشەك تازا جۇرە الماس,
كىر-قوڭىن جۋا الماس.
قارەكەت جوق, عىلىم جوق,
ءوز بويىنان ۇيالماس».
ءيا, ءۇندىنىڭ دە, قازاقتىڭ دا اقساقالى ءبىر دۇنيەنى ايتىپ تۇر. سەبەبى اقيقات دەگەن كۇن ەمەس پە؟ ول تەك ءارتۇرلى تەرەزەدەن تۇسە بەرەدى. ماسەلە وندا ەمەس, ماسەلە – حاكىمدەردىڭ ايتقان حيكمەتىندە. راس, اباي ايتپاقشى, ءبىزدىڭ بويىمىز دا «ينەدەيىن تازا ەمەس, ارشىپ الىپ تاستايتىن اپانداعى ساز ەمەس». الايدا سۇرتكەن سايىن جەز قۇمان دا جىلتىراماي ما؟ ءتان مونشاسىندا سۇيەگىمىزدى قىزدىرعانداي, جان مونشاسىندا ءدال سولاي جۇرەگىمىزدى قىزدىرساق قوي...
