ەلىمىزدە زەينەتاقى 9 پايىزعا ءوستى

استانا. 5 قاڭتار. ەلىمىز بويىنشا 2015 جىلدىڭ 1 قاڭتارىنان باستاپ زەينەتاقى تولەمدەرى 9 پايىزعا كوبەيدى. بۇل تۋرالى egemen.kz ءتىلشىسى حابارلادى. «2015-2017 جىلدارعا ارنالعان رەسپۋبليكالىق بيۋدجەت تۋرالى» زاڭدا كورسەتىلگەندەي, 2015 جىلعى 1 قاڭتاردان باستاپ ەڭ از زەينەتاقى مولشەرى 23 692 تەڭگە بولىپ بەلگىلەندى. ەسكە سالا كەتەيىك, 2014 جىلى ەڭ از زەينەتاقى كولەمى 20 782 تەڭگەنى قۇراعان-دى. ال مەملەكەتتىك بازالىق زەينەتاقى تولەمدەرىنىڭ مولشەرى 2015 جىلعى 1 قاڭتاردان 11 182 تەڭگەگە دەيىن ۇلعايدى. 2014 جىلى مەملەكەتتىك بازالىق زەينەتاقىلىق تولەم مولشەرى 9 983 تەڭگە بولعان. بۇل زەينەتاقىنىڭ ەڭ تومەنگى مولشەرى 34 874 (23 692 + 11 182) تەڭگەگە وسكەنىن بىلدىرەدى. ەلىمىزدەگى زەينەتكەرلەردىڭ سانى 1,9 ميلليوننان اسىپ جىعىلادى. وتكەن جىلى ەڭ جوعارى زەينەتاقى مولشەرى 67 399 تەڭگە بولسا, ەندى 73 257 تەڭگەگە ارتتى. ونىڭ ورتاشا مولشەرى 45 633 تەڭگەدەن 49 532 تەڭگەگە كوتەرىلدى. سونداي-اق, مەملەكەتتىك الەۋمەتتىك جاردەماقى مولشەرى دە 7 پايىزعا ءوستى. ەلىمىزدە جاردەماقى الۋشىلار سانى 600 مىڭنان استام ادامدى قۇرايدى. جولدىباي بازار. دەرەك: egemen.kz. سۋرەت: news.nur.kz.