سۋ تاسقىنىنا كۇنى بۇرىن دايىندالعان جەرگىلىكتى اتقارۋشى بيلىك پەن توتەنشە جاعدايلار, پوليتسيا دەپارتامەنتىنىڭ قىزمەتكەرلەرى جامبىل اۋدانىنا قاراستى جاسوركەن اۋلىنا ەدەل-جەدەل جەتكەن. ءوڭىر باسشىسى ەربول قاراشوكەەۆ باستاعان اتقامىنەرلەر دە تەز ارادا ماڭايداعى اۋىلدان تابىلعان. بارلىق قاجەتتى تەحنيكاسىن الىپ جەتكەن ماماندار اۋىلدى سۋدان تازارتۋ جۇمىستارىنا كىرىسىپ كەتكەن. ناتيجەسىندە, بىرنەشە ساعاتتىڭ بەدەرىندە سۋ دەڭگەيى ايتارلىقتاي تومەندەپتى. وسىلايشا, اۋىل تۇرعىندارىنىڭ داۋرىققان كوڭىلى ورنىنا ءتۇستى.
– سۋدىڭ باستاپقى بيىكتىگى 40 سانتيمەترگە دەيىن بارعان. اۋىل بويىنشا 30 اۋلاعا سۋ كىرگەن. ونىڭ ىشىندە سۋ كىرگەن ءبىر عانا ءۇي بولدى. زارداپ شەككەندەر جوق. توتەنشە جاعداي دەپارتامەنتى مەن پوليتسيا دەپارتامەنتىنىڭ وكىلدەرى دەر كەزىندە اۋىلعا كەلگەن. اۋىلدىق اكىمدىك قىزمەتكەرلەرى دە ۋاقتىلى جۇمىسقا جۇمىلدىرىلعان. جالپى سانى 300-دەن اسا مامان جۇمىسقا كىرىسكەنىن ايتا كەتكەن ءجون. 22 موتوپومپا, 60-قا جۋىق بىرلىك تەحنيكا جۇمىس ىستەدى. شۋ, تالاس وزەندەرىندەگى سۋ دەڭگەيى تۇراقتى باقىلاۋدا, – دەيدى ە.قاراشوكەەۆ.
جامبىل اۋدانىنا قاراستى جاسوركەن اۋلىندا 310 اۋلا بار. مۇندا 2 209 ادام قونىستانعان. نوسەر سالدارىنان پايدا بولعان كولبەۋ اعىن سۋ ارىق-اتىزدىڭ ارناسىنا سىيماي, ماڭايداعى اۋىلعا بەت العان كورىنەدى. قۋانىشتىسى, تاۋ سۋىنان زارداپ شەككەندەر جوق.
وڭىردەگى ءىرى سۋ قويمالارىنداعى جاعداي جەرگىلىكتى اتقارۋشى بيلىك تاراپىنان باقىلاۋعا الىنعان. ماماندار كيروۆ, تاسوتكەل, قاراقوڭىز, قاقپاتاس سەكىلدى وزگە دە ءىرى سۋ قويمالارىنا جينالعان سۋ كولەمىنەن وبلىس حالقىنا ەشقانداي قاۋىپ ءتونىپ تۇرماعانىن العا تارتىپ وتىر. كەيىنگى دەرەككە جۇگىنسەك, اۋىلداعى اۋلالار, كوشەلەر سۋدان تازارتىلعان. جارىق, گاز تۇراقتى بەرىلىپ تۇر. اۋىلدا اۋىزسۋدىڭ ساپاسىن تەكسەرۋ قورىتىندىسى ناقتىلانعانعا دەيىن, تۇرعىنداردى تازا اۋىزسۋمەن قامتاماسىز ەتۋ ۇيىمداستىرىلىپ جاتىر. ۋاقىتشا ونلاين وقۋعا كوشىرىلگەن م.اۋەزوۆ اتىنداعى ورتا مەكتەپ بالالاردى قابىلداۋعا دايىن.
ە.قاراشوكەەۆ جاۋاپتى تۇلعالارعا زارداپ شەككەن اۋلالاردىڭ بارىنە قىسقا مەرزىمدە ءتيىستى كومەك كورسەتۋدى تاپسىردى. سونىمەن قاتار اۋىل ىشىندەگى ارىقتاردى تەز ارادا تازالاۋدى مىندەتتەدى. جاسوركەندەگى وقيعاعا بايلانىستى اۋدان اكىمى ەرلان قىدىرالى ۇلىنا قاتاڭ سوگىس, ونىڭ سالاعا جاۋاپ بەرەتىن ورىنباسارىنا قىزمەتىنە تولىق سايكەس ەمەستىگى تۋرالى ەسكەرتۋ, اۋىل اكىمىنە قاتاڭ سوگىس تۇرىندەگى تارتىپتىك شارا بەلگىلەدى.
مۇنداي جاعداي قايتالانباۋى ءۇشىن تاۋ بوكتەرىنەن بەلارىق كانالىنا دەيىن 2,5 شاقىرىمدىق درەناج (سىيىمدىلىعى 1 تەكشە مەتر) قازىلدى. وڭتۇستىك وڭىردە ءساۋىر-مامىر ايلارىندا جاۋىن-شاشىن مولىنان تۇسەتىنى ءمالىم. جاسوركەنگە دە تولاسسىز جاۋعان جاڭبىر سالدارىنان كولبەۋ اعىن سۋ جەتتى. كۇنى بۇرىن دايىندالعاندىقتان بولار, جەرگىلىكتى بيلىك دەر كەزىندە وقيعا ورنىنان تابىلىپ, قاۋىپتىڭ بەتىن قايتاردى.
جامبىل وبلىسى,
جامبىل اۋدانى
