بەلگىلى عالىم مەكەمتاس مىرزاحمەتوۆ «اقىندىق سۇيەگىنە بىتكەن ارقالى اقىن» دەپ باعالاعان ءابىلدا ايماقتى ەسكە الۋعا ارنالعان اپتالىق تۋعان جەرى ورداباسى اۋدانىندا باستالىپ, وقۋشىلار اراسىندا ولەڭ وقۋدان سايىس ءوتتى. سونداي-اق كىتاپحانانىڭ جىلجىمالى پۋنكتتەرىندە پوەزيالىق كەرۋەن ۇيىمداستىرىلىپ, كىتاپ كورمەسى جانە وقىرماندار مەن كىتاپحاناشىلار اراسىندا اۆتوردىڭ ولەڭىن وقۋدان ارنايى فلەشموب باستاۋ الدى. ال ق.بەكتاەۆ جالپى ورتا مەكتەبىندە اۋداننىڭ قۇرمەتتى ازاماتى, مادەنيەت قايراتكەرى, «قۇرمەت» وردەنىنىڭ يەگەرى, حالىقارالىق فيزۋلي اتىنداعى سىيلىقتىڭ لاۋرەاتى ءابىلدا ايماقتىڭ تۋعانىنا 70 جىل تولۋىنا وراي «ولەڭ ماعان عاشىق-اۋ, مەن ولەڭگە» اتتى ەسكە الۋ كەشى ءوتتى. ءىس-شارا بارىسىندا اۋەزدى ءان شىرقالىپ, مەكتەپ وقۋشىلارى اقىننىڭ ولەڭدەرىن وقىدى.
اقىننىڭ ومىرشەڭ جىر شۋماقتارى جۇرتشىلىق جۇرەگىندە جاتتالىپ قالعان, 70-كە جۋىق ولەڭىنە ءان جازىلعان. اقىننىڭ جانىن ۇعىپ, ءاردايىم قاسىنان تابىلىپ, قولعانات بولعان جاندار باس قوسقان كەشتە ءابىلدا ايماقتىڭ تالعامى بيىك شىعارماشىلىعى مەن ءومىر جولىنان ەستەلىك ايتىلدى. ال شاكىرتتەرى اقىن تۋرالى تىڭ دەرەكتەرمەن ءبولىستى. 18 جاسىنان ولەڭگە قالام تارتقان ءابىلدا ايماق 22 جىل بويى جازۋشىلار وداعىنىڭ وبلىستىق فيليالىن باسقاردى. تالاي شاكىرت تاربيەلەدى. وقىرماندارىنا 20-عا جۋىق كىتاپ سىيلاعان اقىن 60 جاسىندا ومىردەن وزدى. قالامگەردىڭ كىتاپ قازىناسى مەن قولتاڭباسىن جالعاۋشى جاس تولقىن اقىننىڭ ءوزى ىرگەتاسىن قالاعان «تەمىرقازىق» ادەبي كلۋبىنىڭ جۇمىسىن جانداندىرىپ كەلەدى. ەسكە سالا كەتەيىك, ءابىلدا ايماق رەسپۋبليكالىق, وبلىس اقىندارى اراسىندا وتكەن جابىق كونكۋرس, ءمۇشايرالاردا باس جۇلدە الدى. ال 2003 جىلى فرانتسيادا وتكەن بۇكىل تۇركى دۇنيەسى ادەبيەتىنىڭ فورۋمىنا قاتىستى. تۇركيادا 2004 جىلى وتكەن تۇركى حالىقتارى اقىندارىنىڭ جابىق كونكۋرسىندا حالىقارالىق فيزۋلي اتىنداعى سىيلىقتىڭ لاۋرەاتى اتاندى.
اپتالىق قورىتىندىلانعان ادەبي جيىندى وبلىستىق مادەنيەت جانە تۋريزم باسقارما باسشىسىنىڭ ورىنباسارى ەرجان يساتاەۆ اشىپ, كەشكە ارنايى كەلگەن اقىننىڭ جارى اقمارال ساتىبالدىقىزىنا سىي-سياپات كورسەتتى. ولەڭدەرىنىڭ بىرىندە:
«مەن ولگەن سوڭ بىردەڭە بولار ما ەكەن,
الدە دۇنيە كوركەيىپ وڭار ما ەكەن؟
باياعىداي بايلارىڭ قۇدايسىنىپ,
پاناسى جوق كەدەيلەر توڭار ما ەكەن؟», دەگەن اقىننىڭ جارى ەستەلىكتەرىمەن بولىسسە, نەمەرەلەرى ولەڭدەرىنەن ءۇزىندى وقىدى. كەش قوناقتارى اپتالىق جايلى ويلارىمەن ءبولىستى. سونىمەن قاتار مەكتەپ وقۋشىلارى اقىن ولەڭدەرىنەن كومپوزيتسيا ۇسىندى. كىتاپحانا ديرەكتورى جانات شارداربەكوۆا جىل بويى ءابىلدا ايماق وقۋلارى وبلىس كولەمىندە جالعاساتىندىعىن جەتكىزدى. شاراعا بەلسەنە قاتىسقان وقۋشىلارعا العىسحات تابىس ەتتى.
تۇركىستان وبلىسى
