جالپى وبلىس بويىنشا 30 استام ەسكەرتكىشكە تازارتۋ, قايتا قالپىنا كەلتىرۋ جۇمىستارى جۇرگىزىلىپ, وعان 5000 استام ادام قاتىستى. ونىڭ ىشىندە, ورتالىق, جەڭىس جانە ارداگەرلەر ساياباعىندا وتكەن تازالىق جۇمىستارىنا اۋعان سوعىسى, چەرنوبىل جانە ەڭبەك ارداگەرلەرى مۇرىندىق بولدى. سونىمەن قاتار كەربۇلاق اۋدانىندا ورنالاسقان ش.ءۋاليحانوۆ اتىنداعى «التىنەمەل» مەموريالدى مۋزەيىندە جاس تابيعات ساقشىلارىنىڭ قاتىسۋىمەن مۋزەي اۋماعىن اباتتاندىرۋ جۇمىستارى جۇرگىزىلىپ, سوڭى جاس ۇرپاقتى تاريحي مۇرالارمەن تانىستىرۋعا ارنالعان ەكسكۋرسيامەن جالعاسىن تاپتى.
وبلىس اۋماعىندا جالپى 1155 تاريح جانە مادەنيەت ەسكەرتكىشتەرى بار. وسى اپتادا 70 تازالىق شاراسى جوسپارلانعان: وبلىستىڭ ادەبي ۇيىم مۇشەلەرىنىڭ قاتىسۋىمەن وبلىس اۋماعىنداعى اقىن-جازۋشىلاردىڭ ەسكەرتكىشتەرىنە, مەكتەپتىڭ كادەت سىنىپتارىنىڭ وقۋشىلارى «داڭق» اللەياسى, «ۇوس ارداگەرلەرىنە» ارنالعان ەسكەرتكىشتەرگە تازالىق شاراسىن جۇرگىزەدى. ودان بولەك, وبلىس ورتالىعىندا بيىل وتباسىن قۇراتىن 30 جۇپ كوشەت وتىرعىزىپ, «جاس وتباسىلار» اللەياسى اشىلادى. تالدىقورعان قالاسىنىڭ, قىزىلتاس ساياجايى ماڭىندا «تالدىقورعان – پەتروگليفتەر ەلىنىڭ استاناسى» اتتى قايىرىمدىلىق ەكوفەستيۆالى وتەدى. ەكوفەستيۆال اياسىندا اۋماققا تازارتۋ جۇمىستارى جۇرگىزىلىپ, جاس اعاش كوشەتتەرىن وتىرعىزۋ جوسپارلانعان. اتالمىش تازالىق شارالارى وبلىستىڭ ءار اۋدان, قالاسىندا جالعاسىن تاپپاق.
