جانىمىز عىلىمدى قالاعاندىقتان, جۇمىس ىستەي ءجۇرىپ وقىدىق, زەرتتەۋ جاسادىق. ال قازىر 22 جىل بۇرىنعى ءبىزدىڭ كەزىمىزبەن سالىستىرعاندا عىلىمعا, عالىمدارعا جاسالعان جاعداي الدەقايدا جاقساردى. كەيىنگى ۋاقىتتا عىلىمدى دامىتۋعا ەلەۋلى, سەرپىندى وزگەرىستەر ەنگىزىلىپ, ءتيىمدى شەشىمدەر قابىلدانىپ جاتىر. وسى ۋاقىتقا دەيىن مەملەكەتتىڭ عىلىمعا كورسەتكەن قولداۋى ناتيجەسىندە بىرقاتار جوبامىزدى جۇرگىزۋگە, وندىرىسكە ەنگىزۋگە قارجى ءبولىندى. ءبىرىنشى رەت مۇناي قالدىقتارىن وڭدەۋگە قاتىستى ديسسەرتاتسيامدى ءارى قاراي وندىرىسكە ەنگىزۋ ءۇشىن «تاۋەكەلدى زەرتتەۋلەر» دەگەن كونكۋرسقا قاتىسىپ, 5 ملن 600 مىڭ تەڭگە العانبىز. كەيىن قابىلدانعان «عىلىم تۋرالى» زاڭ اياسىندا عىلىمدى قارجىلاندىرۋدىڭ جاڭا تۇرلەرى پايدا بولدى. سونىڭ ءبىرى گرانتتىق قارجىلاندىرۋ كونكۋرسىنا العاش 2012 جىلى قاتىستىق. 2020 جىلعا دەيىن وڭىردەگى اۋىل شارۋاشىلىعىن, مۇناي قالدىقتارىن وڭدەۋ سالاسىن دامىتۋعا, ءتۇرلى وزەكتى ماسەلەنى شەشۋگە باعىتتالعان كىشى جوبالارىمىزعا ۇزدىكسىز گرانت الىپ جۇردىك. گرانتتىق, كوممەرتسيالاندىرۋ جوبالارىمەن عانا شەكتەلمەي, كولەمدى باعدارلامالىق-نىسانالى قارجىلاندىرۋ جوبالارىنىڭ كونكۋرسىندا دا باق سىناۋدى ءجون كوردىك. ءسويتىپ, وسىمدىكتەردىڭ ءتۇرلى اۋرۋىنا قارسى بەلسەندى قوسىلىستار تۋرالى عىلىمي جوبامىزدى كونكۋرسقا وتكىزىپ, ءۇش جىلعا قارجىلاندىرۋ الدىق. ناتيجەسىندە, العان بەلسەندى قوسىلىستارىمىز كۇرىش, بيداي, ارپا, سويا, جوڭىشقا, تۇيەجوڭىشقا سەكىلدى وسىمدىكتەردى اۋرۋدان امان ساقتاپ قانا قويماي, ونىمدىلىگىن دە ارتتىردى. وتكەن جىلى كۇرىش قالدىعىن وڭدەۋ ارقىلى ودان بەلسەندىرىلگەن كومىر الىپ, قىزىلورداداعى كارىز سۋىن تازارتىپ, ونى وسىمدىكتەردى سۋارۋ بويىنشا جوبامىزعا 750 ملن تەڭگە گرانت يەلەندىك. وسى جوبانىڭ اياسىندا قىزىلوردادا تسەح اشىلدى, ارنايى قوندىرعى جاسالدى, جاقىندا قالانىڭ كارىز سۋى تازالانىپ, سۋدى, اعاشتاردى جانە مالعا ازىق رەتىندە وسىرىلگەن وسىمدىكتەردى سۋارۋعا پايدالانۋ جۇمىستارىن باستاپ كەتتىك. مىنە, وسىنىڭ ءبارى – مەملەكەتتىڭ عىلىمعا جاساعان قولداۋىنىڭ ناتيجەسى.
نۇربول اپپازوۆ,
حيميا عىلىمدارىنىڭ كانديداتى, پروفەسسور
