بىرنەشە جىل بۇرىن جەرگىلىكتى جاستار مەن اتقارۋشى بيلىك قولعا العان «اۋليەاتا جاستارى» قاناتقاقتى جوباسى ماعجان جۇماباەۆ سەنگەن جاڭا تولقىننىڭ باسپانالى بولۋىنا مۇمكىندىك تۋعىزدى. وڭىرلىك تۇرعىن ءۇي باعدارلاماسى اياسىندا جەرگىلىكتى تالانتتار جەڭىلدەتىلگەن نەسيە ەسەبىنەن پاتەر الۋ مۇمكىندىگىن يەلەندى. باياندى باستامانىڭ شاراپاتىن كورگەندەر قاراسى قالىڭ.
جەرگىلىكتى بيلىك پەن «وتباسى بانكتىڭ» بىرلەسىپ ىسكە اسىرعان جوباسى 2022 جىلدىڭ وزىندە ايتارلىقتاي ناتيجە بەرىپ, قازىنادان قاراستىرىلعان 500 ميلليون تەڭگە 41 جاستىڭ باسپانالى بولۋىنا سەپ بولعان ەدى. بۇل جۇمىس بىلتىر دا جالعاسىن تاپتى. ناتيجەسىندە, «اۋليەاتا جاستارى» ارقىلى پاتەرلى بولۋعا تالپىنعان جاستاردىڭ سانى كوبەيدى.
وتكەن جىلدىڭ اياق تۇسىندا «جامبىل وبلىسىندا «اۋليەاتا جاستارى» تۇرعىن ءۇي باعدارلاماسى توقتايدى. ويتكەنى جەرگىلىكتى اتقارۋشى بيلىك باستامانى قولداۋدان باس تارتىپ وتىر ەكەن» دەگەن اڭگىمە جەلدەي ەسكەن بولاتىن. ءار سالادا جەمىستى ەڭبەك ەتىپ جۇرگەن جالىندى جاستار گۋ-گۋ اڭگىمەگە سەنە باستاعانداي ەدى.
جىل سوڭىندا باق وكىلدەرىمەن كەزدەسكەن ءوڭىر باسشىسى ەربول قاراشوكەەۆ باياندى باستامانى ءارى قاراي جالعاستىرۋدىڭ بارلىق تەتىگى قاراستىرىلىپ جاتقانىن, جولاي كەزدەسكەن كەيبىر كەدەرگىنى جويۋدا ناقتى جۇمىستار اتقارىلاتىنىن تىلگە تيەك ەتكەن ەدى. ناتيجەسى جامان ەمەس. جەرگىلىكتى بيلىك سوزىندە تۇرعان سەكىلدى.
«بۇل جوبانى ءبىزدىڭ ءوڭىر رەسپۋبليكا كولەمىندە ەكىنشى بولىپ جۇزەگە اسىرعانىن جاستاردىڭ ءبارى بىلەدى. قاناتقاقتى جوبانىڭ ارقاسىندا ءوڭىردىڭ «سەن تۇر, مەن اتايىن» دەۋگە لايىق بىلىكتى جاستارىنىڭ ءبىر پاراسى باسپانالى بولدى.
2022 جىلى باستالعان باستاما بيىل دا جالعاسىن تابادى. ويتكەنى باسشىلىق تاراپىنان قولداۋ بار. ءبىر سوزبەن ايتقاندا, ءار سالادا جەمىستى ەڭبەك ەتىپ جۇرگەن ءوڭىر جاستارى باعدارلاما ارقىلى بيىل دا ءۇيلى بولا الادى. قىسقاسى, جاستاردىڭ تۇرعىن ۇيمەن قامتىلۋى ماقساتىندا قولعا الىنعان جوبا توقتامايدى», دەيدى وبلىس اكىمدىگى جاستار ساياساتى ماسەلەلەرى باسقارماسىنىڭ باسشىسى جومارت زۇلپىحار.
سان سالادا جەمىستى ەڭبەك ەتىپ جۇرگەن جاستاردى قامتيتىن باعدارلاماعا العاشقى جىلى جۋرناليستەر قاۋىمى ەنبەي قالعان بولاتىن. وتكەن جىلى بىرنەشە ارىپتەسىمىز پاتەر كىلتىن قولىنا الىپ, قونىس تويىن تويلاعانى ەسمىزدە. جاۋاپتى باسقارما باسشىلارى «جەگەنى جانتاق, ارقالاعانى التىن» سانالاتىن جۋرناليستەردى نازاردان تىس قالدىرماعانى دا شىن قۋانتقان ەدى.
«راسىندا دا, «اۋليەاتا جاستارى» باعدارلاماسى زامانداستارىمىزعا تاماشا مۇمكىندىك تارتۋ ەتكەنى انىق. ماسەلەن, وتكەن جىلى اتالعان جوبا اياسىندا تۇرعىن ۇيمەن قامتىلعان جاستاردىڭ سانىن ارتتىرۋعا باسىمدىق بەرىلدى. ەندى ناقتى دەرەكتى سويلەتەيىك.
2022 جىلى جوبا اياسىندا 41 جاس وتباسى پاتەرلى بولسا, بىلتىر 144 مامان باسپانا كىلتىن الدى. وسىلايشا, باسپانالى بولعانداردىڭ سانى العاشقى جىلمەن سالىستىرعاندا بىرنەشە ەسە ارتتى. ول ءۇشىن جەرگىلىكتى بيۋدجەتتەن 1 ميلليارد, «وتباسى بانك» اق تاراپىنان 1 ملرد تەڭگە كولەمىندە قارجى قاراستىرىلعان ەدى.
ءدال وسى «اۋليەاتا جاستارى» جوباسى ارقىلى وسى جىلى 130-دان استام جاستى باسپانامەن قامتاماسىز ەتۋدى جوسپارلاپ وتىرعان جايىمىز بار. وسى ماقساتتا جەرگىلىكتى بيۋدجەتتەن 1 ميلليارد تەڭگە قاراجات بولىنسە, «وتباسى بانك» اق تاعى 1 ميلليارد تەڭگە قاراستىرۋعا بەل بۋىپ وتىر. قىسقاسى, جەڭىلدەتىلگەن نەسيە ەسەبىنەن تاعى دا ونداعان زامانداسىمىز پاتەرگە يە بولماق», دەيدى ج.زۇلپىحار ماسەلەنىڭ ءمانىسىن ءتۇسىندىرىپ.
شىنىندا دا, «اۋليەاتا جاستارى» قاناتقاقتى جوباسىنا ءۇمىت ارتقان جاس وتباسى از ەمەس. ولاردىڭ بارلىعى دا جەڭىلدەتىلگەن نەسيە ەسەبىنەن پاتەر العىسى كەلەدى. سول تۇرعىدان العاندا جوبانىڭ بيىل دا جالعاسىن تاۋىپ جاتقانى – قۇپتارلىق قادام.
