رەسمي دەرەككە جۇگىنسەك, 2022 جىلى جاۋاپتى دەپارتامەنت وكىلدەرى الكوگول ونىمدەرىن شىعاراتىن جەراستى تسەحىن انىقتاپ, زاڭسىز كاسىپپەن اينالىسقانداردىڭ ىسىنە توسقاۋىل قويدى. اتالعان تسەحتا جالعان تىركەۋ-باقىلاۋ ماركالارى بار 20 مىڭنان استام شولمەك سۋرروگات ءسپيرتى انىقتالعان. سول جىلى دەپارتامەنت قىزمەتكەرلەرى كونترافاكتىلىك برەندتەردى پايدالانىپ, الكوگولدىك ونىمدەردى زاڭسىز ساتۋعا قاتىستى 4 قىلمىستىق ءىستى انىقتاعان ەدى.
جامبىل وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ قىزمەتكەرى جاعىپار يساتاەۆتىڭ ايتۋىنشا, تىركەلگەن قىلمىستىق ىستەردى جەدەل ىزدەستىرۋ ءىس-شارالارى دەر كەزىندە جۇرگىزىلگەن. ناتيجەسىندە, 99 642 شولمەك نەمەسە 41 634 ليتر الكوگولدىك ءونىم, سونداي-اق 2 765 ليتر سپيرت قوسىلعان سۇيىقتىق تاركىلەنىپتى. سۋرروگات ءسپيرتتىڭ اينالىمدا ءجۇرۋى ادامداردىڭ دەنساۋلىعىنا دا ايتارلىقتاي كەرى اسەر ەتكەن.
«ناقتى ايتار بولساق, 2021 جىلى وبلىستاعى دەنساۋلىق ساقتاۋ ۇيىمدارىنا سۋرروگات الكوگول ونىمىنەن ۋلانۋ بويىنشا 93 ادام جۇگىنگەن بولسا, 2022 جىلى – 22, 2023 جىلى 36 ادام اۋرۋحاناعا تۇسكەن. كەيىنگى ۋاقىتتاعى ستاتيستيكا 2021 جىلمەن سالىستىرعاندا مۇنداي دەرەكتەردىڭ ايتارلىقتاي ازايعانىن ايعاقتاپ وتىر. ايتكەنمەن دەپارتامەنت قىزمەتكەرلەرى زاڭسىز تاۋار اينالىمىمەن توقتاۋسىز كۇرەس جۇرگىزىپ جاتىر», دەيدى ج.يساتاەۆ.
وكىنىشكە قاراي, اكتسيزدەلەتىن ونىمدەردىڭ زاڭسىز تاۋار اينالىمى 2023 جىلى دا تىركەلگەن. الكوگول جانە تەمەكى ونىمدەرىن زاڭسىز ساۋدالاۋعا بەل بۋعان ازاماتتاردىڭ زاڭعا قايشى ارەكەتتەرى جاۋاپتى دەپارتامەنت قىزمەتكەرلەرىنىڭ دەر كەزىندە ىسكە كىرىسۋىنىڭ ارقاسىندا توقتاتىلعان. ءبىراز ازاماتقا قاتىستى ءىس سوتقا جولدانعان.
«2023 جىلى الكوگول جانە تەمەكى ونىمدەرىنىڭ زاڭسىز اينالىمى فاكتىلەرىنە قاتىستى دەپارتامەنت قىلمىستىق كودەكستىڭ 214, 233-باپتارى نەگىزىندە قۇنى 5 ملرد تەڭگەدەن اساتىن اكتسيزدەلەتىن ونىمدەردى زاڭسىز اكەلۋ فاكتىلەرى بويىنشا 23 قىلمىستىق ءىستى تىركەدى. ناقتىراق ايتار بولساق, 6,5 ميلليون قوراپ تەمەكى مەن 174 مىڭ ۆەيپ اينالىمنان الىندى. ونىڭ ىشىندە 15 ءىس سوتقا جولدانىپ, 3 ءىس مەملەكەتتىك بيۋدجەتكە كەلتىرىلگەن زالالدىڭ تولىق وتەلۋىنە بايلانىستى وڭالتۋعا جاتپايتىن نەگىزدەر بويىنشا توقتاتىلدى. قازىرگى تاڭدا 5 دەرەككە قاتىستى تەرگەۋ امالدارى جۇرگىزىلىپ جاتىر. وسى جىلى اكتسيزدەلەتىن ونىمدەردىڭ زاڭسىز اينالىمىنا قاتىستى 6 قىلمىستىق ءىس تىركەلىپ, ونىڭ ەكەۋى سوتقا جولداندى», دەيدى ج.يساتاەۆ.
قالاي دەسەك تە كولەڭكەلى ەكونوميكاعا اڭسارى اۋعاندار ايىلىن جيماي تۇر. تاياۋدا عانا «ايشا ءبيبى» وتكىزۋ پۋنكتىندە شەكاراشىلار زاڭسىز جولمەن وتكىزبەك بولعان 3,5 ميلليون قوراپ تەمەكىنى تاركىلەدى. بۇل ءىس تە دەپارتامەنتكە تاپسىرىلعانى بەلگىلى بولدى.
مامانداردىڭ ايتۋىنشا, حالىقارالىق ستاندارتقا ساي كەلمەيتىن كەز كەلگەن ءونىم ادام دەنساۋلىعىنا ايتارلىقتاي زيان كەلتىرەدى. الايدا كەيىنگى ۋاقىتتا ازاماتتار تاۋاردىڭ ساپاسىنا ەمەس, قۇنىنا باس اۋىرتىپ وتىرعانى انىق. باعاسى تومەن بولعان سوڭ تۇتىنۋشىلار ارزان تاۋاردى ساتىپ الۋعا تالپىنادى. ونى كۇندەلىكتى ومىردە دە بايقاپ ءجۇرمىز. اسىرەسە تەمەكى ونىمدەرىن تۇتىناتىندار كوتەرمە باعامەن قىرعىز رەسپۋبليكاسىنان جەتكىزىلەتىن «Oris» تەمەكىسىن ءجيى ساتىپ الاتىنى بەلگىلى. وكىنىشكە قاراي, سەرتيفيكاتى جوق, ستاندارتقا سايكەس كەلمەيتىن مۇنداي ونىمدەردىڭ زاڭسىز اينالىمدا جۇرگەنىنە بىرنەشە جىلدىڭ ءجۇزى بولدى.
جامبىل وبلىسى
