«تاسوتكەل سۋ قويماسى قازىرگى كەزدە 94 پايىزعا تولعان. تەحنيكالىق سيپاتتاماداعى جاعدايعا زەر سالساق, ءالى 30 ميلليون تەكشە مەترگە دەيىن سۋ قابىلداي الادى. نىساننىڭ سۋ وتكىزۋ قابىلەتى سەكۋندىنا 360 تەكشە مەترگە تەڭ بولسا, اپاتتىق سۋ وتكىزۋ قابىلەتى سەكۋندىنا 380 تەكشە مەتردى قۇرايدى. قازىرگى كەزدە سەكۋندىنا 85 تەكشە مەتر سۋ قۇيىلىپ جاتسا, سەكۋندىنا 70 تەكشە مەتر سۋ تاستالىپ جاتىر. سۋ قويماسىنىڭ جالپى سۋ وتكىزۋ قابىلەتى سەكۋندىنا 740 تەكشە مەتر ەكەنىن, ءتۇسىپ جاتقان سۋ كولەمى سەكۋندىنا 85 تەكشە مەترگە پارا-پار ەكەنىن پايىمداساق, تاسوتكەلدەن ايتارلىقتاي قاۋىپ ءتونىپ تۇرماعانىن بايقايمىز. تەرىس-اششىبۇلاق سۋ قويماسى قازىرگى تاڭدا 97 پايىزعا تولعان. ايتكەنمەن كەلىپ جاتقان سۋ كولەمى ايتارلىقتاي كوپ ەمەس», دەيدى «قازسۋشار» مەكەمەسىنىڭ ديرەكتورى اسقانات قادىروۆ.
ونىڭ كەلتىرگەن دەرەگىنە جۇگىنسەك, «قاراقوڭىز», «قاقپاتاس» سۋ قويمالارى 99 پايىزعا تولعان. ايتكەنمەن, ەكى نىسانعا كەلىپ جاتقان سۋ كولەمى مەن تاستالىپ جاتقان سۋ مولشەرىندە تەڭدىك ساقتالعاندىقتان, ازىرگە قارعىن سۋدان قاۋىپ ءتونىپ تۇرعان جوق.
سۋ قويمالارىنا جينالعان سۋ مولشەرى توقسان پايىزدان اسىپ جىعىلعانىنا قاراماستان, كەيبىر نىساندارعا كەلگەن سۋ كولەمى تىم از. اسىرەسە «اقكول» كولىندەگى جاعداي كوپشىلىكتى الاڭداتىپ وتىرعانى انىق. مامان كەلتىرگەن دەرەككە جۇگىنسەك, وڭىردەگى «بۇركىتتى» سۋ قويماسى قازىرگى كەزگە دەيىن 47 پايىزعا عانا تولعان. سونداي-اق «اقكول» كولىنە 25 پايىز عانا سۋ جينالعان. وسىعان قاراپ-اق ناقتى شارالار قابىلدانباسا, ۆەگەتاتسيالىق ماۋسىمعا دەيىن قاجەتتى سۋ جينالماي قالۋ قاۋپى بار ەكەنىن ەشكىم جوققا شىعارا الماسا كەرەك.
«بۇركىتتىنىڭ جاعدايىنا نازار اۋدارعان ءجون. ۆەگەتاتسيالىق ماۋسىمعا دەيىن كولگە ءتيىستى كولەمدە سۋ جينالماۋ قاۋپى بار. سونداي-اق «اقكول» كولى قازىرگى كەزگە دەيىن 25 پايىزعا عانا تولعان. ۆەگەتاتسيالىق ماۋسىمعا دەيىن كولگە ءتيىستى كولەمدە سۋ جينالمايدى. قازىرگى ۋاقىتتا كولگە سۋ جەتكىزۋ بويىنشا جۇمىستار اتقارىلىپ جاتىر», دەيدى ا.قادىروۆ.
قالاي دەسەك تە, ەلىمىزدىڭ باسىم بولىگىندە حالىق قارعىن سۋدان زارداپ شەكتى, توتەنشە جاعداي جاريالاندى. قامدانعاننىڭ قاپى قالمايتىنىن ۋاقىتتىڭ ءوزى دالەلدەپ وتىر.
«تاۋلى ايماقتارداعى قار جامىلعىسى 5-10 سانتيمەتردى قۇراپ وتىر. ال وزگە اۋدانداردا قار جوق. ءساۋىر ايىندا وڭىردە اۋا تەمپەراتۋراسى جوعارىلاۋى ىقتيمال. سونداي-اق جاۋىن-شاشىن نورمادان كوپ ءتۇسۋى ىقتيمال ەكەنىن ماماندار ايتىپ وتىر. وبلىس اۋماعىنداعى سۋ قويمالارىنىڭ جۇمىسىنا, ونىڭ ىشىندە شەكارالاس ايماقتا ورنالاسقان «شوڭ-قاقپا» سۋ قويماسىنان جەتەتىن سۋ كولەمىنە تۇراقتى تالداۋ جۇمىستارى جۇرگىزىلىپ جاتىر. ءوڭىر بويىنشا قارعىن سۋدىڭ الدىن الۋ ماقساتىندا 3 500 تەكشە مەتر قار شىعارىلدى, 1 790 شاقىرىم كانال, 1 833 شاقىرىم ارىق, 437 شاقىرىم درەناج جۇيەسى, 946 سۋ وتكىزۋ قۇرىلىستارى تازارتىلىپ, ەلدى مەكەندەردىڭ اينالاسىنا 10 شاقىرىم شاماسىندا ۇيىندىلەر جاسالدى», دەيدى وبلىستىق توتەنشە جاعدايلار دەپارتامەنتى باسشىسىنىڭ ورىنباسارى رۋسلان ورىنبەكوۆ.
كەرەك دەرەككە زەر سالساق, قارعىن سۋدان تونەتىن قاۋىپكە اۋليەاتا ءوڭىرى جان-جاقتى دايىندالعان. 6 900 توننا ينەرتتى ماتەريال, 16 140 توننا جانار-جاعارماي, 31 200 دانا قاپ قاجەتتى رەزەرۆ جاقساقتالعان. سونداي-اق 396 حالىقتى قابىلداۋ پۋنكتى ازىرلەنگەن. 32 شاتىر, 890 توسەكتىك ورىن, 460 كەرەۋەت دايىندالىپ, تاماقتاندىرۋ بويىنشا 58 كەلىسىم جاسالعان.
«وڭىردە سۋ باسۋ قاۋپى ىقتيمال 42 ەلدى مەكەننىڭ 34-ىنەن قاۋىپ سەيىلدى, 2 اۋىلداعى قاۋىپ دەڭگەيى تومەندەتىلدى, ال 6 ەلدى مەكەندەگى ماسەلە «2021-2023 جىلدارعا ارنالعان سۋ تاسقىنى قاۋپىنىڭ الدىن الۋ جانە جويۋ جونىندەگى شارالار كەشەنىنىڭ» جول كارتاسى اياسىندا رەتتەلەدى. قازىرگى كەزدە وڭىردە سۋ تاسقىنىڭ الدىن الۋ جانە جويۋ ماقساتىندا ءتيىستى شارالار جۇرگىزىلىپ جاتىر. 1 927 ادام, 437 تەحنيكا, 19 ءجۇزۋ قۇرالى, 132 موتوپومپا, حالىقتى ەۆاكۋاتسيالاۋعا جانە جەكە قۇرامدى تاسىمالداۋعا ارنالعان 48 جولاۋشىلار كولىگى دايىندالعان», دەيدى ر.ورىنبەكوۆ.
كەيىنگى دەرەككە زەر سالساق, قىرعىز رەسپۋبليكاسى وسى جىلدىڭ مامىر ايىندا «شوڭ-قاقپادان» (كيروۆ سۋ قويماسى) سۋ جىبەرۋدى جوسپارلاپ وتىر ەكەن. ول جاقتان قانشا مولشەردە سۋ كەلەتىنى ازىرگە بەيمالىم. سالىستىرمالى تۇردە ماماندار كەلتىرگەن دەرەككە سەنسەك, اۋليەاتا وڭىرىنە ازىرگە قارعىن سۋدان قاۋىپ ءتونىپ تۇرعان جوق.
جامبىل وبلىسى
