قور تابيعي اپاتتان ەڭ كوپ زارداپ شەككەن وڭىرلەرگە – 15 ملرد تەڭگە كولەمىندە ماتەريالدىق كومەك كورسەتەدى, دەپ اتاپ ءوتتى نۇرلان جاقىپوۆ. قوردىڭ كورپوراتيۆتىك ورتالىعى, «قازمۇنايگاز», «قازاتومپروم», قتج, «QazaqGaz», «KEGOC», «قازاقتەلەكوم», «Air Astana», «سامۇرىق-ەنەرگو» كومەك كورسەتىپ جاتىر. قاراجات قايىرىمدىلىق قىزمەتىنىڭ بىرىڭعاي وپەراتورى «Samruk-Kazyna Trust» ارقىلى باعىتتالادى.
«قازىرگىدەي قيىن جاعدايدا قىزمەتكەرلەردىڭ قاۋىپسىزدىگىن, ءتيىستى قۇرال-جابدىقتارمەن قامتاماسىز ەتۋ – پورتفەلدىك كومپانيالاردىڭ الدىندا تۇرعان باسىم مىندەتتەردىڭ ءبىرى. سىن ساعاتتا كۇشىمىزدى بىرىكتىرىپ, توتەنشە جاعدايعا قارسى كۇرەسۋ جۇمىستارىن جانداندىرۋىمىز كەرەك. وسى باعىتتاعى تاسقىن سۋدىڭ الدىن الۋ جۇمىستارىن, سونداي-اق زارداپ شەككەن وندىرىستىك نىسانداردىڭ جۇمىسىن شتاتتىق رەجىمگە كەلتىرۋ شارالارىن جالعاستىرۋ قاجەت», دەدى نۇرلان جاقىپوۆ.
«قازمۇنايگاز» باسقارما توراعاسى ماعزۇم مىرزاعاليەۆتىڭ ايتۋىنشا, قمگ كومپانيالار توبىنان سۋ تاسقىنىنا قارسى شارالارعا 540 قىزمەتكەر جۇمىلدىرىلعان, 160-تان اسا تەحنيكا مەن قۇرال-جابدىق, سونداي-اق 80 توننا ديزەل, 22 توننا بەنزين بولىنگەن.
«قازاقستان تەمىر جولى» اق-دا سۋعا توتەپ بەرەتىن 45 پويىز قۇرىلدى. تاسقىن سۋدان زارداپ شەككەن بارلىق وڭىردە سۋ ايدايتىن 47 ءورت ءسوندىرۋ پويىزى كەزەكشىلىك ەتىپ جاتىر», دەيدى قتج باسشىسى نۇرلان ساۋرانباەۆ.
سونداي-اق تەمىرجول ترانسپورتى ازاماتتاردى ەۆاكۋاتسيالاۋعا تارتىلعان. 9 cاۋىردەگى جاعداي بويىنشا قتج قاراجاتى ەسەبىنەن اتىراۋ وبلىسىندا 5,5 مىڭعا جۋىق ازامات تاسىمالداندى.
«QazaqGaz»-دا اپاتتىق-قۇتقارۋ جانە سۋ تاسقىنىنا قارسى جۇمىستارعا 750 ادام جۇمىلدىرىلعان. سۋ تاسقىنى زارداپتارىن جويۋ جۇمىستارىنا 135 بىرلىك تەحنيكا ءبولىنىپ, سۋ باسقان وڭىرلەردە ەرىكتىلەر توبى قۇرىلدى.
«KEGOC» اق ەلەكتر جەتكىزۋ جەلىلەرىن, عيماراتتار مەن قۇرىلىستاردى اعىن سۋدان قورعاۋ شارالارىن قابىلدادى, سونداي-اق سۋ باسۋى ىقتيمال اۋە جەلىلەرى جانە ەلەكتر جەلىلەرىندە اپاتتىق-قالپىنا كەلتىرۋ جۇمىستارىن جۇرگىزۋ ءۇشىن بريگادالار ۇيىمداستىرىلدى», دەپ اتاپ ءوتتى ءنابي ايتجانوۆ.
«قازاقتەلەكوم» اق-دا تەلەكوممۋنيكاتسيا قۇرالدارىنىڭ ۇزدىكسىز جۇمىسىن قامتاماسىز ەتۋ ءۇشىن كومپانيانىڭ تەحنيكالىق بلوگى جەدەل شتابتار قۇردى. بولىمشەلەر اراسىندا بايلانىس ورتالىقتارى ۇيىمداستىرىلىپ, اپاتتىق-قالپىنا كەلتىرۋ كوماندالارى قۇرىلدى. قىزمەتكەرلەر سۋ تاسقىنى سالدارىنان زاقىمدالعان جابدىقتاردىڭ اقاۋلارىن تەز ارادا جويىپ جاتىر.
قور توبىنىڭ قىزمەتكەرلەرى زارداپ شەككەن وتباسىلارعا ازىق-ت ۇلىك, تۇرمىستىق زاتتار جينايدى, باسقا دا كومەك كورسەتەدى.
نۇرلان جاقىپوۆ سۋ تاسقىنى كەزىندەگى احۋالدى تاۋلىگىنە بىرنەشە رەت حابارلاپ وتىرۋدى جانە توتەنشە جاعدايدى باقىلاۋدا ۇستاۋدى تاپسىردى. سونىمەن قاتار اپات زارداپتارىن جويۋعا قاتىسقان بارلىق توپ قىزمەتكەرىنە العىسىن ءبىلدىردى.
