فوتو: massaget.kz
وبلىستىق ءماسليحات توراعاسى, «Amanat» پارتياسى وبلىستىق فيليالىنىڭ جەتەكشىسى ناۋرىزباي بايقاداموۆ بۇگىندە ۇلتتىق مادەنيەتتىڭ وسىنداي ەرەكشەلىگىمەن عانا دارالانا الاتىنىمىزدى اتاپ ءوتتى.
«وبلىس اۋداندارى مەن قىزىلوردا قالاسىندا 50-گە جۋىق جىر-تەرمە, 14 قوبىز ۇيىرمەسى جۇمىس ىستەيدى. وسى ۇيىرمەلەردە 400-دەن اسا جاس ءداستۇرلى ونەر سوقپاعىن جالعاماققا تالاپ قىلىپ ءجۇر. بۇگىن جۇمىسىن باستايتىن «جىراۋلار ءۇيى» وسىنداي ورتالىقتار باسىن قوسىپ, بابالاردان قالعان امانات ونەردىڭ ءورىسىن كەڭەيتىپ, ناسيحاتىن ارتتىراتىن بىردەن-ءبىر رۋحاني ورىن بولادى دەپ سەنەمىز», دەدى ول.
جىراۋ, قازاقستاننىڭ ەڭبەك سىڭىرگەن قايراتكەرى الماس الماتوۆ ءداستۇرلى ونەر وكىلدەرى عاسىرلاردان بەرى جاقسىلىققا جارشى اتانىپ, ەلدى بولاشاققا باستايتىن اعارتۋشى تۇلعا بولعاندىعىنا توقتالدى. وسىنىڭ ارقاسىندا مىڭجىلدىق مادەنيەتتىڭ ءىزى وشپەي, بۇگىنگە جەتىپ وتىر. بۇگىنگىدەي قولداۋ, قۇرمەتتىڭ ارقاسىندا العا قادام باسىپ, ۇلتپەن بىرگە جاساي بەرەدى.
«سىر سۇلەيلەرىنىڭ سوناۋ ەلۋىنشى جىلداردان بەرى قاراي جيناقتالعان مۇراسىن توپتاستىرساق, جىراۋلىق ءداستۇردىڭ جالپى ادامزات وركەنيەتىنە قوسقان ۇلەسى مەن اسەرى ايقىندالا تۇسەر ەدى. ال وسى تەلەگەي-تەڭىز مول ونەر مۇراگەر ۇرپاقتارى ارقىلى داستۇرلىك سيپاتقا يە بولادى. توقسانىنشى جىلداردان بەرى قاراي قولعا الىنعان شارالار ارقاسىندا تالاي جاس بۇگىندە قوعامداعى ساياسي-الەۋمەتتىك ماسەلەلەردى بەزبەندەپ, حالىققا ءجون ايتا الاتىن رۋحاني-اعارتۋشى دەڭگەيىنە كوتەرىلدى. ولاردىڭ ءىزىن باسقان تالاپتىلار دا بارشىلىق. بۇگىنگى ورتالىق وسى باعىتتاعى جۇمىستاردى جۇيەلەپ, بولاشاق ۇرپاقتىڭ ومىرشەڭ تالابىنا ساي بولادى دەپ ويلايمىز», دەدى الماس نۇرماحان ۇلى.
شارا قوناقتارى اراسىندا فولكلورتانۋشى عالىم, ەپيكالىق جىرشىلىق, ورىنداۋشىلىق ءۇردىستىڭ كورنەكتى وكىلى, جىرشى بەرىك ءجۇسىپوۆ, ءداستۇرلى ءانشى, ءسۇيىنباي, جامبىل ءداستۇرىن جالعاستىرۋشى اقان ابدۋاليەۆ, جىرشى اماندىق كومەكوۆ بولدى.
ونەر ورداسىنا ەنگەننەن-اق تۇركى حالىقتارىنىڭ ۇلى ويشىلى, جىراۋ, كۇي اتاسى قورقىت بابا, جانكەنت, ساۋران, شىرىك-رابات سىندى كونە قالالار سۋرەتتەلگەن كومپوزيتسياعا ايالدايسىز. ال اقپاراتتىق تاقتادا جادىگەر ونەردىڭ بۇرىنعىسى مەن بۇگىنگىسىنەن حابار بەرەتىن مالىمەتتەر توپتاستىرىلعان. ءار اۋدانداعى ۇيىرمەلەرگە قاتىستى اقپارات تا وسىندا ساقتالادى. ونەر يەلەرى تۋرالى دەرەكتەر, ءتىپتى كەيبىرىنىڭ داۋسى دا ساقتالعان.
جىراۋلار ۇيىندەگى كورەرمەندەر زالىنىڭ ساحناسى ۇلتتىق ناقىشتا بەزەندىرىلگەن. ساحنا ايناسىندا ورناتىلعان زاماناۋي ماتەريالدان جاسالعان جارتىلاي كيىز ءۇي ءتارىزدى قۇرىلعىنىڭ توبەسىن شاڭىراق تۇيىستىرەدى. بۇل كونتسەرتتىك زال تەلەۆيزيالىق تۇسىرىلىمدەر جاسايتىن ستۋديا دا بولادى. ەكسپوزيتسيالىق مۋزەي زالى دا ءبىراز قۇندى دۇنيەنى توپتاستىرىپ تۇر. قورقىت بابا مۇراگەرلەرى – نىشان, نۇرعالي باقسىلار قوبىزدارىنىڭ سۋرەتتەرى, جىراۋلىق ءۇش مەكتەپ باستاۋىنداعى نۇرتۋعان, جيەنباي, نارتايدىڭ بەينەلەرى, تۇتىنعان قۇرالدارى مەن جەتكەن جەتىستىكتەرىنىڭ قۇجاتتارى قويىلعان. مۋزەي زالىنان سىر ەلىندە 2006 جىلدان باستاپ ءداستۇرلى تۇردە ۇيىمداستىرىلىپ كەلە جاتقان تۇركى تىلدەس ەلدەردىڭ حالىقارالىق «قورقىت جانە ۇلى دالا سازى» فولكلورلىق-مۋزىكالىق ونەر فەستيۆالىنىڭ كەيبىر ساتتەرىن, باعزى ونەرگە قاتىستى باعالى زاتتاردى كورە الاسىز.
جىراۋلار ءۇيىنىڭ القالى الاڭىندا سىر سۇلەيلەرىنىڭ ءىزباسارلارى, جىرشى-جىراۋلار ونەر كورسەتىپ, جىردان شاشۋ شاشتى.
قىزىلوردا
