فوتو:halyq-uni.kz
مەملەكەت باسشىسى سەنبى كۇنى سۋ تاسقىنى سالدارىنان قالىپتاسقان اۋىر جاعدايعا بايلانىستى ۇندەۋ جاريالادى. وندا: «قاردىڭ كۇرت ەرۋىنە بايلانىستى ايماقتاردا سۋ تاسقىنى بولىپ جاتىر. بۇل – تابيعي اپات. مۇنداي احۋال ۇزاق جىلدان بەرى بولماعان. بۇل كولەمى جاعىنان كەيىنگى 80 جىلدان بەرگى ەڭ ءىرى تابيعي اپات دەۋگە بولادى. اتقارۋشى ورگاندار جىبەرگەن ولقىلىقتاردى تۇزەۋ ءۇشىن مەن شۇعىل تۇردە ناقتى تاپسىرمالاردى بەردىم. قازىر بارلىق قاجەتتى شارا قابىلدانىپ جاتىر. ۇكىمەت قارعىن سۋدىڭ سالدارىن جويۋعا بار كۇشىن سالىپ جاتىر», دەدى. سونداي-اق پرەزيدەنت ۇندەۋىندە تاسقىن سۋدان زارداپ شەككەن ازاماتتاردى مەملەكەت ەسكەرۋسىز قالدىرمايتىنىن ايتتى. ماتەريالدىق شىعىندار تولىق وتەلەتىنىن جەتكىزدى. قاسىم-جومارت توقاەۆ باتىس قازاقستان وبلىسىنا جۇمىس ساپارىمەن بارىپ, قارعىن سۋ باسقان اۋماقتاردى تىكۇشاقپەن ارالاپ, ەۆاكۋاتسيالانعان تۇرعىندارمەن كەزدەستى.
شىنىندا, بۇل – تابيعي اپات. تابيعاتقا ەشكىم قارسى تۇرا المايدى. دەگەنمەن ءتيىستى مەكەمەلەر تاسقىن سۋدىڭ الدىن الۋ شارالارىنا جاۋاپكەرشىلىكپەن قاراۋى كەرەك ەدى. بولار ءىس بولدى. قازىر پرەمەر-ءمينيستردىڭ باسشىلىعىمەن رەسپۋبليكالىق شتاب قۇرىلدى. ۇكىمەت باسشىسى, ونىڭ ورىنباسارلارى, قۇزىرەتتى ورگانداردىڭ وكىلدەرى اپات بولعان ايماقتاردى ارالاپ جۇرگەنىن بىلەمىز. سۋ تاسقىنىمەن كۇرەسۋگە ەلىمىزدىڭ ماتەريالدىق قورىنان قاجەتتى رەسۋرستار تارتىلىپ وتىر.
ءار ۋاقىتتا قايسار حالقىمىز قيىندىقتى بىرىگىپ جەڭگەن. ءبارىمىز ءبىر ادامداي تاسقىننىڭ بەتىن قايتارۋعا جۇمىلايىق. سابىرلىق ساقتاپ, داۋرىقپا سوزگە ەرمەيىك. اركىم ءوز قولىنان كەلگەن ءىستى اتقارسىن. «جۇمىلا كوتەرگەن جۇك جەڭىل», دەيدى. بىرىگەيىك, ءبىر بولايىق!
جانىبەك كارىبجانوۆ,
مەملەكەت جانە قوعام قايراتكەرى
