«تەحنيكالىق جانە كاسىبي ءبىلىم بەرەتىن وقۋ ورىندارى ەڭبەك نارىعىنىڭ ناقتى سۇرانىسىنا بەيىمدەلۋى جانە ەلىمىزدىڭ جاڭا ەكونوميكالىق باعدارىنىڭ مىندەتتەرىنە ساي بولۋى كەرەك» دەگەن پرەزيدەنت ءسوزىنىڭ استارىندا ۇلكەن ءمان جاتقانى راس.
بايزاق اۋدانىندا ورنالاسقان №3 بايزاق كوللەدجىندە تەحنيكالىق جانە كاسىپتىك ءبىلىم بەرۋ ماسەلەسى نازاردان تىس قالعان ەمەس. بىلىكتى كادرلار ورتا بۋىن مامانداردى دايارلاۋعا بىلەك سىبانىپ كىرىسكەن. ىزدەنىس ىزىنە تۇسكەن شاكىرتتەر مەن وقىتۋشىلار ويلاپ تاۋىپ جاتقان جاڭالىقتار دا جەتكىلىكتى. بىلەككە ەمەس, بىلىمگە سەنگەن شاكىرتتەر باسەكەگە قابىلەتتى مامان رەتىندە قالىپتاسۋدى كوكسەيدى.
تاياۋدا عانا كوللەدجدىڭ «اۆتوموبيل كولىگىنە تەحنيكالىق قىزمەت كورسەتۋ, جوندەۋ جانە پايدالانۋ» ماماندىعىنىڭ وندىرىستىك شەبەرى اسحات سۇيىنبەكوۆ پەن كوللەدج ستۋدەنتى ءابدىمومىن يسمويلوۆ باستاعان قىز-جىگىتتەر وندىرىستىك ساباق بارىسىندا «د-22» شاعىن تراكتورىنىڭ سۇلباسىن قۇراستىرىپ شىعاردى. دەرەككە سەنسەك, بۇل تراكتوردى شارۋاشىلىق جۇمىستارعا پايدالانۋعا بولادى ەكەن. ءتىپتى شارۋا قوجالىق باسشىلارى دا جاڭا تەحنيكانىڭ تيىمدىلىگى زور ەكەنىن ايتىپتى.
«ۇستاز بەن شاكىرتتىڭ بىرلەسە اتقارعان جۇمىسىنىڭ ناتيجەسىندە پايدا بولعان شاعىن تراكتوردىڭ اۋىل شارۋاشىلىعى جۇمىستارىن جەڭىلدەتۋگە تيگىزەتىن پايداسى زور. كوز ۇيرەنگەن ۇلكەن تەحنيكانىڭ كوپ جاعدايدا جىلىجاي, ساياجايلار جانە وندىرىستىك قوجالىقتارداعى جۇمىستاردى يگەرۋگە مۇمكىندىگى بولا بەرمەيتىنىن ۋاقىتتىڭ ءوزى دالەلدەپ وتىر. مۇنداي كەزدە شاعىن تراكتورلار شارۋا ازاماتتىڭ سەنىمدى سەرىگىنە اينالاتىنى داۋسىز. وعان ەش كۇمانىمىز جوق.
سىناق جۇمىستارى كەزىندە سۋ جاڭا شاعىن تراكتور تەحنيكالىق قاۋىپسىزدىكتى ساقتاۋ, شارۋانىڭ قارجىسى مەن ۋاقىتىن ۇنەمدەۋدە ءوزىنىڭ تيىمدىلىگىن كورسەتتى. تراكتوردىڭ باسقارۋ مەحانيزمدەرى جەڭىل اۆتوموبيلدەردىڭ قۇرىلعىلارىنان قۇراستىرىلعان. بۇل دا ءبىر جاڭالىق قوي», دەيدى كوللەدج ادىسكەرى ءلاززات حيباتوۆا.
ونىڭ ايتۋىنشا, «د-22» شاعىن تراكتورى ساعاتىنا ءبىر توننا جۇكتى تاسىمالداۋعا قاۋقارلى ەكەن. ال قوزعالتقىشتاعى موتوبلوك اجىراتقىشى باسقارۋ تەتىگىنە ورناتىلعان. تەحنيكانىڭ جانارماي قۇيۋ باگىنە ءۇش ليترگە دەيىن ماي قۇيۋعا بولادى. جالپى العاندا, جاڭا تراكتور ۇنەم تۇرعىسىنان ۇلكەن تەحنيكالارعا قاراعاندا الدەنەشە ەسە ءتيىمدى كورىنەدى. از شىعىنمەن كوپ جۇمىستى تىندىرۋعا مۇمكىندىك تۋعىزادى.
«شاعىن تراكتوردىڭ الەۋەتى جوعارى ەكەنىن جۇمىس كەزىندە بايقاپ كوردىك. مۇنىڭ «ۋد-2» قوزعالتقىشىندا سەگىز اتتىڭ كۇشى بار. سونداي-اق تەحنيكانىڭ شىعىنى ءبىر ساعاتتا 1,5 ليتر جانارمايعا تەڭ ەكەنىن ايتا كەتكەن ءجون. جالپى, قۇرىلعىنىڭ اگرەگاتتارمەن قوسقانداعى سالماعى بار بولعانى 250 كيلوگرامدى قۇرادى. تراكتوردى ءىس بارىسىندا سىناپ كورگەن كەزدە شارۋالاردىڭ بارلىعى شاعىن تەحنيكانىڭ تيىمدىلىگى زور ەكەنىن تىلگە تيەك ەتتى», دەيدى ول.
جامبىل وبلىسى
